WOCHE 3 - 30. JULI BIS 05. AUGUST 2024
- EFii
- 24. Sept. 2024
- 42 Min. Lesezeit
I üsem nüije Bitrag giz um sexuelli Belästigung am Flughafä, d Fii wo sich mit dr Security aleit, näbschtere Panikattackä im Bus, erfahret dir wieme mit dr Achterbahn uf Chicago cha fahrä oder gratis iz Fitness cha ga trainiere. Äs git aber o stilleri u truurigeri Momente wie z.B. dr Abgang vom gliebte Hunter R.I.P. wo nem under üs isch, aber trotz allem het d Evä die perfekti Feriedestination für üser zuekünftige Chind gfundä.
30. JULI 2024
DAY 14 - NEW ORLEANS, LOUISIANA
Üses Fazit vo New Orleans: Die beschdi Livemusig immer u überall, besser als mä sichs cha vorstellä. Sehr cooli Usgangsmöglechkeite u überall guets Bier aber schwierig sich chli gsünder z ernährä, Kaffi isch o schwierig xi mal äs guets z findä. NOLA isch i jederä Hisicht einzigartig und unvergässlech für üs.
REIS NACH CHICAGO, ILLINOIS
Hüt Morgä himer üser Multitasking Fähigkitä brucht, si ufgstandä nach dä 09:00, hi üs parat gmacht u glichzitig no packt. Das himer i chli meh als 1h gschafft u üs ä Lyft la cho am 10:45 für a Flughafä. Üsi Lyft Fahrerä het scho knapp die roti Amplä ned überfahrä, ha haltet si näb dr Polizi u het sich derfür gha no z Telefon abznäh u z telefonierä zum fahrä. Das het ihrä nüt z tüä gäh u ar Polizi zu ihrem Glück o ned. Sie isch ä richtigi Schnurri Frou xi u het üs alls us ihrem Läbä verzellt ohni Punkt u Komma. Mengisch hez tönt als würd sie für üs rappe u de no guet! Sie het 10 Minutä vor Stadt wäg gwohnt aber züglet iz mit ihrem Fründ zämä wo 45 Minutä furt wohnt. D Fahrt id Stadt schaffi sie aber glich i 30 Minutä. So isch sie o gfahrä aber usicher himer üs nie gfüehlt. Hüt sigi äbä dr ledschd Tag bevor sie de zämä züglä u sie higi igtl. scho alls züglet usser d Gfrüri, die müess sie no ga richä will ihrä Fründ äbö keni het. Süsch vlich no paar Chischtenä aber das sig de o alls. No viel witeri Sachä wi sie z verzellä het gha ufem 30 minütig Wäg a Flughafä, wo sie i öppä 15 Minutä gschafft het. Mier hi z Gepäck ufgäh u dasmal ohni o numä ä chli müessä azstah! Hie isches allgemein schnäller gangä, o d Sicherhitskontrollä, het schier ke Lüt gha. Mier hi dört üsä Pass zigt u äs Foto müessä machä, wis so üblech isch. D Fii het sogar es Kompliment becho will sies älwä ussergwöhnlech guet het gmacht „Good Job!“. Weniger ä guetä Job het d Kontrolleurin gmacht wo d Fii het müessä durchsuechä u sä definitiv zu guet kontrolliert het u sä so aglängt het, dass sie perplex isch xi u mier üs när sicher si xi, dass das zwiit gangä isch. Da simer due scho derdür xi. D Evä hez ned gseh gha u gfragt wie sie aglängt isch wordä, d Fii het das aber ned am Flughafä vor allnä chönä vorfüehre ar Evä, das sit älwä scho einiges drüber us. Schlussendlech.. lieber z gnau kontrollierä, me wiss wük nie aber das isch definitiv ke schöni Erfahrig xi u het sie no füre räschtlech Tag beschäftigt gha. Äs isch schwirig z sägä wo d Grenzä si u wases wük brucht. Schlussendlech isch sie älwö usegno wordä, wäg ihrem OB und das älwä bim Scanner het Alarm gä. Mier si de no öpis z Ässä ga richä u hi ned us dr Stadt wellä ohni dr Klassiker vo NOLA probiert z ha „Muffuletta“. Mier hi das bstellt u hi glernt, dassmä das ned wie dirs wahrschiinlech o gläsä hit mit „Italienischem Akzent“ usspricht, sondern „Muffalada“ seit. Am 13:00 isch üses Boarding losgangä u mier si schnäll dracho u im Flugi vo American Airlines xi. Ir USA isch irgendwie jedes Flugi mit WLAN usgstattet für Filmä u Serie z gugä. Himer aber ned gmacht, sondern am Blog gschribä. Mier si 5 Minutä z früeh los u am halbi 2 gstartet. Äs het umi is ä Mooreri gä im Flugi mit Fii‘s Kaffi u wär hetz dörfä putzä? Ihrä persönlech Huuself d Evä. Ds Flight Attendant Team isch gad cho dr Küder isammlä u d Fii het sämtlech Serviettene furtgschossä, wo sie hetti chöne bruchä zum das putzä. Ir glichä Sekundä wie si das wäggschossä het, ischere due doch no i Sinn cho, dass das gäbig wer xi z bruchä aber äs isch ds spat xi u sie luegt d Evä fragwürdig ab ihrer igete Dummhit ah u d Evä het z glichä denkt u stillschwigend Nastüechli usem Rucksack grüblet u sogar putzt. Glandet simer am 15:45 u hi anders als z NOLA, mega schöns Wätter gha! Dr Flughafä isch cool xi u äs het sogar ä Wiederuffüllbari Wasserstation gha wo azigt het wie vil Plastikfläsche dür das scho si grettet wordä. Die Station himer bemerkt womer dört hurti uf z WC si u när aber igtl. wük diräkt zum Gepäckband si. Dört acho isch z komplettä Band ned numä leer, sondern o scho abgstellt xi. Üses Gepäck isch ganz einsam u ellei dört ufem Bodä glägä. Si die Lüt dört härä gsecklet nach dr Landig oder was hi mier verpasst?! Mier si würklech numä churz ga bislä u när isch wit u brit niemer meh xi vo däm Flug. Z nägschtä wo üs überrascht het isch d Logik xi vo dä ÖV Priisä. Mier hi es Ticket brucht für id Stadt ini z fahrä u ä Einzelfahrt mit 2h Gültigkit choschtet glich viel wie ä Tagespass wo 24h gültig isch. Falls da öper drus chunt werum das so isch, erklärets üs doch bitte. Scho am 16:45 hi mier dr „Zug“ chönä nä für id Stadt, was eher are Achterbahnsfahrt glichä het. No vorem erreiche vor erschtä Station, isch dä Zug nämlech gfüehlt fasch 3x entgleist! D Fii liebt Achterbahnä aber die Fahrt findet si gad richtig beschissä u reggt sech uf, dass dö oder die bsoffä darf fahrä. Wo sie fasch het müessä erbrächä u d Evä so het da als wer das ä gmüetlechä Sunntigsritt, het sie ihrä gsit, dass sie jitz gfälligscht o mit dr Fii i Europapark cha cho. Dört muessmä weniger angscht ha. D Evä hasst Achterbahnä, isch Seechrank u das hie macht ihrä nüt us?! cool. D Fii eher Zugchrank. Nach 6 vo 15 Statione womer müessä fahrä, gumpet d Evä plötzlech uf u rüeft „Mier müessä usä!“. Isch äch wük alls okay bir Evä oder dued si numä so? D Fii het sich due gfragt, obs ar Evä äch glich o pressiert, endlech us z stigä? Womer die Fahrt überläbt hi, himer müessä umstigä fürä Bus. Das wird sicher besser het sich d Fii denkt u sie fehrt ned gärn ÖV. D Fii üsä Schlaumeier het übrigens sitem Flughafä dr Backpack ned aglit sondern uf dä Armä treit u hie gmerkt, dasses bequemer u weniger astrengend wer we sie dä wie d Evä o würd alegä. Sie isch ifach z fuul xi dä uszpackä und azlegä aber sie hez due viel besser gfundä „Das isch ja viel gäbiger so!“, het si gmint u d Evä het sä usglachet. Hie isches viel agnähmer vor Temperatur u me merkt gad, dass mier im Nordä si. Äs isch warm aber ned mega hiss, dassmer üs gad eine abschwitzä wie die vorhärige Täg. Me cha trotzdäm ohni Problem churzi Sachä aneha. Was eher für Hitze sorgt isch d „Dummhit“ vo dä Amis. Dr Bus isch vornä voll aber ir Mitti hetis Platz we d Lüt würdä id Mitti rutschä, so chönte o nüiji Fahrgescht i Bus stigä. D Amis überlegä aber ned so wit u so fragt d Fii, ob sie äch chöntä id Mitti ga, dass anderi no chönä iischtigä. Kennä si ned, machä si ned. Beidi schtö mier vollpackt im Bus mit üsem riese Backpack u d Evä schtit ä so, dass nem viel fehlt us am eint Typ schier a Grind brätscht. D Fii het das gseh u wo näbä ihm ä Platz frii wordä isch, het sie ihn gfragt ober chön überä rutschä, dermit d Evä cha sitzä. Är het ned mögä u d Evä het aber i däm Moment o ned halb über ihn mögä chlätterä u so isch d Fii näbä ihn ga hockä u halb über ihn drüber. We är ifach grutscht wer, hetimä ifach ohni Chlätterstig chönä hockä und är hetti Eväs Backpack ned im Gsicht gha, d Fii het nämlech gseh, dasses scho in Berüehrig isch. Dr Bus isch vo Station zu Station zwar ging no rächt voll xi ä aber immer wie weniger. Öppä nach dr 6tä Station ischs ar Chaufferin z viel wordä, schtigt us und git ussä ga telefonierä. Wo sie umi ini cho isch, het sie verchündet, dass mier alli söllä usschtigä wills ihrä z viel Lüt si u sie ke Luft bechunt. Aller bis uf d Äxtrawurscht wo Eväs Backpack inhaliert het, si usgstigä. Sie isch ihm ga sägä, dass är o söll usstigä aber är het o uf das ke Bock gha u isch blibä hockä. Duss het sie de gmint, dass gli ä zweitä Bus chunt wo mier chönä umstigä. Dä isch wük nach wenigä Minutä cho aber schön a üs verbi gfahrä, säääälüüü! D Chauffeurin het nid guet usgseh u d Fii isch zu ihrä ga fragä, ob alls okay isch. Sie het mit „Nei nüt isch okay“ gantwortet. Da het d Fii gfragt wie si ihrä chön hälfä, ob sie vilech Wasser welli. Das het sie dankend agno aber wo sie gseh het, dass da scho ä Schluck drus isch trunkä wordä, het sie glich nem wellä. Gli isch nomal ä zweitä Bus cho und d Lüt si dört igstigä. D Fii het gfragt, obme d Chaufferin cha ellei lah oder ob mier öpis chöne machä. Sie het gsit, äs göngi u mier chönä witer. Also hi o mier gad wellä istigä, da merkt d Fii, dass ihres Ticket nem im Hosäsack isch. Sie isch schnäll zrug i vorhärig Bus u hez dört ufem Bodä gfundä. Leider het üs das gad umnes Haar dr Bus la verpassä und de simer 1 Station z Fuess wiiter. Dört acho isches öppä no 10-15 Minutä gangä u mier hi ufene witerä Bus chönä. Endlech bir Endstation acho aber d Tür wot ned uf. Chnopf drückä het ned funktioniert und da het üs ä Damä vo hindä grüeft, dass mier gägä d Tür müessä drückä. 1 wiiteri Herusforderig gschafft, chunt scho die nägschdi Challenge. Diräkt vor dr Tür si Velos und Trottis, mitem ganzä Gepäck gar ned so ifach drüber z stigä oder näbä düre z luufä. D Bustürä si übrigens schmeler hindä als sie vorä sie. Wieso wüssemer ned.. vlich stigtmä da fett i Bus u wird schlank zum usstigä? Uf jede Fall het d Fii als „Nid Fan“ vo Velos gar ke Bock meh gha u die „Velogöpplä“, wie si sä nennt wellä verwärfä aber hinder üs het no öper wellä usstigä u vlich ned gad es Velo a Grind gworfä becho. So simer mit Müeh u Not irgendwie o dür die Challenge cho u d Damä het üs gfragt, ob mier o iz „Getaway“ (üses Hostel) gö. So simer due mit ihre dä Wäg gloffä u hi vor Rachel us Neuseeland wo Schouspielerin isch u z Chicago irgend ä Verastaltig diesbezüglech bsuecht, underwägs no gad ä Hostel Ifüehrig becho. D Fii het versuecht z Gspräch uf d Schouspielerei z lenkä, will sä das interessiert het u d Ifüehrig ned no es zweits Mal het mögä losä bim Check-In. D Rachel isch aber Füür u Flammä xi üs z verzellä, dass mier z Zmorgä derbi hi, das sigi aber de numä Basic. Dass mier chönä wäschä im Hostel u witeri Sachä wo mier ja scho gwüsst hi, will mier die Buechig ja ned blind tätigt hi. Chum si paar Rägätröpf cho, het sie no priisgäh, dass ds Hostel Rägäschirmä verchuft und d Fii het gsit, dass si dr Rägä gärn het u sicher ke Schirm chuft imnä Hostel. Dört acho, het sie üs no wellä zigä wie mir dr Chnopf müessä drückä für ir Nacht ini z cho. D Fii het nem mögä u isch diräkt ad Rezeption ga icheckä u d Evä la machä mit ihrä. Übrigens het d Evä no nacheme Kaffi gfragt u d Rachel het vom Starbucks verzellt, d Fii het erklärt, dass mier nachere Rösterei sueche u kere Chötti. Das het sie als Rösterei gseh u druf behaart, dass das e so isch. Nei. Eifach Nei. Nach dr Hostel Ifüehrig und am ächtä Check-in, simer öppä am 18:15 ready xi u endlech im Zimmer acho. Beidi müed und hungrig, himer hurti üsi Bröfflä putzt u d Fii het no d Technik für d Evä müessä machä (ä Gruess ad Insiders, wo wüssä was gmint isch).
CHICAGO, ILLINOIS
Am 19:10 isches losgangä zum öppis ga ässä im 10 Minutä (z Fuess) entfärntä Sushi Resti. D Evä het dört bim ini luufä gseh, dasses Disaronno het u gluscht gha ufnä Amaretto Sour. Da hets due ä chliineri Diskussion mit dr Chällnerin gä, will sie ke Amaretto heige. Sie het gsit, dass sie dä bim inäloufä aber gseh het u uf das het d Chällnerin gmint, dass d Fläschä leer isch. När het d Evä mit Sicherhit erklärt, dass sie no halbvoll isch u sies het gseh. Da het sie gsit, ja aber sie heige ke Amaretto numä Disaronno. Das het d Evä ja wellä u ihrä erklärt, dass das Amaretto isch. Sie hez due bstellt u becho. Dä het hammer fein usgseh! 1 Schluck probiert u afah hueschte, das sigi ned Amaretto u het ar Fii zum probierä gä. D Fii u d Evä si sich einig xi, dass sie ihre ä Whisky Sour bracht hi. Da heimer ar Serviererin nomal grüeft u ihrä gsit, dass das ned Amaretto Sour isch sondern Whisky Sour. So sicher wi mier üs si xi, isch sie sich aber sicher xi, dass das Amaretto isch u het drufbestandä, dass das e so sig. Mier hi ned nachegäh u gsit, dass mier wüssä wie Amaretto schmeckt und das sigi ganz sicher Whisky. Da isch sie mit ihrer ufgsetztä Art zrug zur Bar u het üs churz druf nomal ä witere Drink bracht mitem Kommentar, dass sie ihm dasmal bim mixe zueguget heig us jitz richtig sigi. So isch d Evä doch no zu ihrem Drink cho u d Fii het es Glesli Wii us üsem Lieblingsstaat „Oregon“ gnossä. Wo üs d Bedienig isch cho Wasser nachäschenkä, het d Evä dr Drink scho rächt gspürt und z Wasser gsuecht zum trinkä. Dass üs d Bedienig genau i däm Moment nachäschenkt, het sie i ihrem Zuestand ned gmerkt u vergäbä nach ihrem Glas gsuecht. Z Ässä isch wük usserordentlech guet xi! So guet, dass mier sogar z glichä nomal nachäbstellt hi: Hawaiian Rolls für d Fii u Eden Rolls für d Evä. Derzue hi mier üs no dr Hot Stone teilt u d Fii het 2x no ä wissä Fisch probiert. Am viertel vor 9i simer satt u miterä tüürerä Rächnig als erwartet gangä (180.00 $). Mier versuechä ja immer ä Grund z findä, wieso mier üs jitz sones tüürs Ässä gönnä. Dasmal isches xi, dass mier die Achterbahnfahrt zum Hostel überläbt hi. Gad gägäüber hez ä Ladä gha mit Bier u andernä Getränk. O we miers scho gwüsst hi, dasses das ned git, simer glich ar Fii ihres Pop Sour Bier ga suechä. D Uswahl isch riesig xi aber äs hets natürlech ned gha. Dr Verchüfer het versuecht ar Fii z verzellä, dasses in Chicago z Beschdä Bier git. D Fii het ihm das ned glubt u o klar gsit, dass es z Beschdä in Portland git und das z New Orleans schwer z toppä sig. Mier söllä doch z "Monkey sour" probierä u sie isch offä xi für das, also hi mier das wellä chufä. Da mä das aber numä im 6er Pack het chönä, hi miers aber lasi u si gangä. Am 21:15 simer due zrug im Hostel xi, hi no duschet u chli uspackt u si aschliessend iz Bett.
Üses hütigs Highlight: Für d Evä z Sushi u für d Fii d "Rapperin" aka Lyft Fahrerin
31. JULI 2024
DAY 15 - CHICAGO, ILLINOIS
Mier si am 8i ufgstandä will üsi erschtä Aribnb Gescht für id Wohnig den (15:00 ir Schwiiz) icheckä. Sie si aber verspetet. Ar Evä ihri Mam isch bi üs ir Wohnig am wartä u het das SMS mit dr Info ned übercho, dass dr Zug verspetig het u sie ersch am 15:00 in Bärn si. Numä es paar komischi Satzzeiche sigä cho, het si gmint u das glöschä. Drum het d Fii die Info hurti prüeft u witerglitet. Mier si übrigens imne Hostel miteme Privatzimmer aber Gmeinschaftsbad. Dört simer üs dämna o ga parat machä u hi im Zimmer no hurti gwartet bis d Gescht acho si u alls zwüsche ihne u Eväs Mam klappt het. Ir Zwüschezyt simer ga zmörgelä ids „Basic Zmorgä“ wies d Rachel am vorhärig Tag gnennt het. D Fii het gwüsst was sie mint u d Evä het aber gmint äs sig guet. D Evä het 3 Toast gässä u d Fii 2 Eier, beidi no es Kaffi. D Eier hi gschmeckt als werä si sit Stundä im Süderwasser am umäsüderä (si si o) aber huptsach öpis z ässä, mier wi da ned motzä wes eich nüt z motzä geb! D Fii wer zfride xi mitere Banane willmer speter wi ga joggä aber das hi si ned ka. I där Zyt hi Eväs Mam und Schwo d Wohnigsübergab gmacht und d Gescht si super zfridä xi mit dr Wohnig u erliechteret, will si angscht hi ka die Wohnig isch fake u gar ned z vermietä. Zrug id USA: mier hi no ä Orange gässä u d Evä isch sich ned sicher xi, wieme die ufschniidet, d Fii heterä irgend ä Chabis Erklärig abgä u d Evä hets glubt aber glich fragwürdig gluegt. Sie hez aber due de gschafft. Mier si öppe am 10:15 losgloffe richtig „Lincoln Park“ u hi dört chli ufgwermt. Underwägs simer no vomnä Ehöri agriffä wordä, äs isch uf üs fixiert xi u womers aguget u beobachtet hi isches ging wi necher zu üs cho u schlussendlech ar Evä nachägsecklet. Mier si wük sehr nach glägä vo däm schönä Park u si dört ga joggä. Zämä himer 4 Rundeni gmacht um z Seeli im Park. Dä isch wäsentlech grösser xi als dä in Nashville u so hettä die 4 Rundeni glängt für 5 Kilometer. D Fii het no ä witeri 5ti Rundi gmacht u d Evä isch gmüetlech z Fuess no ä Rundi umä See. D Evä het 6,5 Km u d Fii 7,8 Km gmacht. När simer fürä gloffä zum Michigan Lake wo riesig isch u fasch agränzend zu Kanada liegt. Dört simer chli entlang spaziert u da mier ä Abchüehlig brucht hi, himer üses Joggingoutfit uszogä u si i dä See ga badä. D Evä heti zwar vorhär lieber z Bikini wellä holä aber das isch ar Fii z doof xi für hurti ga abzchüele nomal alls zrug z lufä, also simer so dri. DAS het öppä guet da u d Evä isch duä o froh xi himers ä so gmacht. Richtig schöni Abchüehlig mit wunderschönem Blick uf d Hochhüser vo Chicago! Äs het übrigens ä Sandstrand gha, me chönt also minä am Meer z si nöime u ned irä Grossstadt! Dr Strand het „North Avenue Beach“ ghissä. Dört simer öppe 45 Minutä blibä u hi nam badä no hurti dehnet, das isch sogar vor Fii initiiert wordä! Mier si witergloffä u ufnä frischgmachtä Früchtä Smoothie ghofft wie in Nashville. Es het hie u da zwar mal ä Stand gäh aber jedä isch zue xi. Irgendwenn simer zumne Stand cho wos wük Smoothies gäh het aber o dä isch zue xi. Da dä aber gad bime Restaurant vordran isch xi, het sech la vermuetä, dass die zämäghörä u hi im Resti Platz gno. Oh hette mier das gwüsst… Spontanität het sich o hie umi mal bewährt will mier imene super feinä Lokal glandet si! D Evä het sich äs Burrata Täller gönnt mit frischä Tomatä u leckerem Burrata. D Fii het sich für d „Tuna Bowl“ entschiede, mit Sojabohnä, Quinoa, Chrüttli, Rucola, perfektem Thunfisch, Mango, Zibelä, Glasnudlä etc. ifach perfekt nachem Sport und soo fein! Derzue hi mier ä „Tropical Breeze“ Smoothie gno mit Passionsfrucht / Mango, o dä isch ä wahrä Gnuss xi! Am 14:00 simer gange und zrug is Hostel gloffä womer am 14:45 si acho und under d Duschi si. Mier hi üs übrigens beidi verbrennt. När isches Zyt xi chli z erholä und ufem Bett umä z plütterä u bis am 17:30 no hurti chli döset. Am halbi 7 simer ga gugä fürnes Kaffi u hi dört gseh, dasses Smoothies git. D Evä het gfragt ob die frisch gmacht wärdä u sie wo dört schaffet het gmint nei und sie empfiehlt sä üs o ned, das isch üs gad diräkt sympathisch xi! Dr Kaffii isch wie geng ir USA ifach viel z hiss, sogar ar Fii. Me muess wük ungfähr 20 min. wartä bismä sich mit Vorsicht a erscht Schluck cha wagä. Usserdäm himer o gmerkt, dass mier immer dr „chlii“ Kaffi müessä nä will das ir Schwiz ar Grössi vomne normalä entspricht. Mier si witer i Target gloffä zum ga ichufä für z Znacht. Zerscht mal womer umi sälber chönä chochä sit mir am reisä si! Mit dr Fii giz i dä Lädä ging chli lenger, für anderi wer das ganz ä normalä Ladä aber ned für d Fii. Sie het so früüd am Target & Walmart, hez chum chönä erwartä dört ini z gah! Das isch für sie äs richtig Erläbnis. Am 20:00 simer zrug xi im Hostel. Mier hettä so gluscht gha ufem Wäg zrug äs chüehls Bierli z trinkä wo mir kuft hi zum teschtä (Sour Peach Ale). Aber d Evä het angscht gha, dass die üs gad iz Gfängnis düe will das ja verbotä isch ir öffentlechkit Alkohol ohni Tütä drum um z konsumiere. So himers halt zum chochä gnossä u äs isch fein xi! Nid jedes Bier chame einzeln chufä drum himer z Monkey Sour ned gno aber dises himer iz o im 6er Pack gchuft, also z nägschde wird z Monkey sour! Bim chochä himer inä kenneglernt vo Ghana wo d Fii sich ufgregt het ab ihm willer ifach die ganz Zyt drigredet het u mier üs ir Chuchi versuecht hi z Rächt z findä und zämägredet hi wägem chochä. När het sie ihm is gsit „Sorry i bi gad mit ihrä am redä!“ När heters älwä gmerkt u isch ruhiger xi u iz Eggeli ga ässä. Mier hi feinä Riis mit Hackflisch, Brokkoli, Rüebli, Tomatä u Bluemchöhli gmacht u si das usi ga ässä, i gmüetlech Gartä vom Hostel. Nach däm himer nomal äs Bierli gno, d Fii het 1 währendem chochä verdrückt, z zweitä zum ässä u när no z drittä mit dr Evä nachem Znacht gmüetlech dussä. Dr Wärter isch all 30 Minutä cho sägä, dasses de am 22:00 zuedued u woner am 21:53 isch cho sägä, äs düeng i 5 Minutä zue het d Fii natürlech gfragt, obs de ned ersch i 7 Minutä zuetuet? Da het är zerscht Mal älwä i sim Läbä glächlet u gsit, ja i 7 Minutä. Schön wemä öpper wo ä apisstä Idruck macht, äs Lachä cha iz Gsicht zouberä. Pünktlech wi d Schwiiz simer natürlech chli ehnder gangä (das isch wi im Gfängnis hiä) u uf z Zimmer. D Evä het no äs witers Bierli gno u d Fii o. Schlussendlech himer dr räschtlech Abä ufem Zimmer verbracht mit Blog schribä, Bierli trinkä (das kuftä 6er Pack isch scho leer). um die 3 ume himer Fiirabä gmacht u pfuset.
Üses hütigs Highlight: Z joggä im Park mit aschliessender Abchüehlig im Wasser u feins Ässä am Strand
01. AUGUST 2024
DAY 16 - CHICAGO, ILLINOIS
Mier hi usgschlafä, da mier ledschd Nacht no so lang beschäftigt si xi u ersch am 11:30 ufgstande. Da simer üs hurti ga zwäg machä u när ganes Kaffi holä und ga ichufä fürnes Avocado Tost z machä. Churz nadä 12 simer acho u hi umi is ä guete Kaffi vorä Rösterei dörfä gniessä, z Kaffi hisst „Printers Row Coffee“ u witer ischs gangä i Target. Chum acho dert ischs 1 Minutä gangä u d Fii isch nach Eväs Ussag „uh scho isch si umi usgflogä..“. Das Vergnüegä mit dr Fii im Target ga izchufä het umi lenger duuret als es brucht hetti, mier hi nämlech ki riesigä Ichuf gmacht. D Evä het versuecht chli uf d Fii und ihrä Drang izgah u sä gfragt, ob sie no öpis möcht aluege da innä. Und ab, uf u dervo isch sie zum Regal mit öppä 50 verschiedene Duschsortä! A jedem einzelnä het sie müessä ga schmeckä u het derbi immer no z Gfüehl, dass da ja vilech o no gad öpis für d Evä derbi wer (igtl. wüssemer aber sie macht das numä zum meh Zyt use z holä). Me chönt sä guet 2-3 Stund imnä Ladä absetzä u sie chönt sech dört problemlos vertörlä, wie anderi imenä Vergnüegigspark oder d Evä bim Hüser agugä vo Chicago. D Evä hez de ohni Gwaltawendig gschafft, d Fii usi z bringä. So simer zrug u am 13:00 im Hostel acho. Underwägs himer übrigens zum ke Ahnig wie vielte Mal ä Chilchä gseh, wo aller Willkommä heisst, egal welli sexuelli Orientierig,Härkunft, Gschlächt oder was o immer. Das hi mier i de vorhärigä Stedt o scho viel gseh u mier findes super u denkä, dass so viel meh Lüt id Chilchä würdä u dr Gloubä findä, wemä sich wük o darf Willkommä füehlä wieme isch. Schad isch das ir Schwiiz no ned so. Mier si ab id Chuchi u hi kochet. Äs isch wük toll chönemer umi mal sälber chli chochä, das himer vermisst. Am viertel vor 2 himer chönä ässä. Äs het Pasta mit Pilzä, Tomatä und Rindsflisch gä, seeehr fein xi! Nachem abwäschä simer under d Duschi gsprungä wills üs scho zum ässä dussä d Hitz umi fertig gmacht het. Churz nach dä 3 simer due ready xi u richtig „Loop“ gangä. Für das himer ufä Bus verzichtet u hi d Achterbahn gno. D Fullerton Station mitm Zug isch ca. 15 Minutä vom Hostel entfärnt. Vor dä 4i simer dert xi und diräkt bim Start vor „Route 66“ acho und hi vo dört üsi Tour düre Loop gstartet. Mier si richtig „Millenium Park“ gloffä wo leider zu gröschtäteils bsetzt isch wäg eim vo dä gröschtä Festivals „Lollapalooza“. Ä Til himer aber gseh u si under anderem z „Cloud Gate“ ga agugä, sehr cool gmacht u weme z lang guget wird eim scho fasch schturm. Dernäbä hez äs Kaffi gha womer üs ned hi la entgah (Fairground Craft Coffee & Tea). Da simer churz vor dä 17:00 ga Kaffi holä. O ä Zwüschästop für uf ds WC isch üs da glägä cho aber äs richtigs Labyrinth isch de das xi! D Fii isch Minutä lang gloffä z WC ga suechä u chunt zrug wo dr Kaffi zur abwächslig mal scho schier chalt isch xi. Ned nume sie sondern o andernä isches glich gangä, sie het paar gfragt nachem Wäg u die hi aller gsit, dass sies o am suechä sigä. Da het sie d Polizi gfragt, wo z 6 am Tisch ghocket isch für älwä ihri Donut Pouse izlegä? Sie hi ned beschäftigt usgseh aber älwä zur Sicherhit da xi i däm Komplex wo ned nur z Kaffi sondern no äs Hotel isch drin xi. Die hi chönä witerhälfä u so himer üsi Blasä chönä leerä u Platz für Kaffi machä. Am halbi 6 simer bereits im nägschdä Ladä xi fürnä Protein Smoothie. D Fii het öppä 1 Minutä vorhär gsit, dass sie gluscht het ufnä Smoothie u när simer per Zuefall gad a dä Ladä härägloffä u vorhär himer nie so inä gseh. Was mier aber underwägs entdeckt hi si Kunstwärk xi vom Picasso oder dr ehemalig Zahnarzt vom „Al Capone“. Am viertel vor 6i simer bim Riverwalk aglangt u si usem stuhnä usi cho! Was fürne wunderschöni Stadt mitem Fluss derdür. Wie Thun aber viiil grösser u mit Wulchächratzer. Währendere WC Pousä het sich d Evä ufgregt will d Lüt vo dussä hi probiert dr Code izgäh u älwä ned hi tschegget, dass die roti Farb mit Ufschrift „Occupied“ bedüdet, dass o d Igab vom Code nüt hilft zum d Tür z öffnä. Mier si im schönä Biergartä Park am Chicago River abghockt u hi üsä Durscht glöscht mitemä „Cushy Island fruited sour ale“ u derzuä ä Rundi „Hacky Sack“ gspilt, wo mier im 2018 entdeckt u vil gspilt hi ir USA. Schad giz das ir Schwiiz ned. Mier bouä de eis u ladä ufnä Rundi ih! Eich hissts ja „Cornhole“ aber im 2018 hi mier das under anderem Namä kenneglernt. Es het 7 Type ka wo ufeme Polterweekend, obwohls ned Weekend isch, si xi. Mier hi sä gfragt fürne Match u sie hi üs ned glubt, dass mier das z erschtä Mal spiele willmer sä fertig gmacht hi. U sie hi Rächt ka! Aber äs isch 6 Jahr här u den himers vlich 3x gspilt u uf dr jitzigä Reis z erscht Mal. Mier hi öppä ä Stund mit dänä gspielt u gredet. Am 19:15 simer witer u nachdäm mier underwägs no ä Schlegerei beobachtet hi, wo d Polizi näbedran gstandä isch u nüt undernoh het usser für Versterchig z fragä, simer am 19:45 acho bim Navy Pier. Das isch ä wahnsinns schöni Ussicht uf See u Stadt! Mier hi chli Platz gno u das gnossä während anderi lieber hurti 50 Fotos knippst hi u witer si. Derzue hez näbäzuchä Livemusig gäh wo üs nach där coolä Musig i dä Südstaate nid e so zuegsit het. D Evä isch gfragt wordä für paar Föteli z mache vo fremdä. Sie hez uf d Fii welle schiebe will sie schiins die bessere Fotos macht aber d Fii het volls vertrouä gha id Evä u het sie das la machä. Speter het d Fii ä Familiä beobachtet bim Selfies mache und dört isch sie ga supportä. Leider het die chlini ca. 1,5 Jehrig ned glachet u gluegt. Da het d Fii no es paar gmacht u ar chliinä zuegrüeft u dr Clown für sä gmacht u die het afah strahlä u winkä sogar u het so früüd gha, di ganz Familiä het mega Früüd gha u isch zfridä xi. Am 20:20 simer uf Nahrigssuechi witer. D Mugä hi nämlech o hunger becho u üs afa frässä. Nachere Halbstund simer acho im „Quartino“. Mier hi üs für d Spaghetti Pomodoro mit Meatballs entschiede u äs Glas, 2.. 3 vom Remole Wii gno. D Servierchräft serviere hie alli im Schuut Trikot, das isch mal öpis anders u cool! Öppe am viertel ab 10i simer gangä u iz „Blue Chicago“ gloffä, wo öppe 5 Minutä entfärnt isch xi für Live Blues. Dört hi mier so cooli Musig becho u d Evä isch zum tanzä ufgforderet wordä, het aber ned wellä. Aber um Mitternacht hets e Birthday Dance Special gä mit dänä wo hi wellä tanzä, d Fii isch natürlech derbi xi trotz riesiger Unsicherhit! D Evä het due o mitgmacht u so hi mirs gschafft zämä Bachata Figurä z tanzä zu Blues u si abgangä wi z Zäpfli. D Fii het sogar Gas gä bim Footwork. När hez ä Pousä gä bis am 00:30 u mier hi no paar Songs glost bismer am 01:00 gangä si. Am 01:25 isch dr Orlando üs cho richä u het üs is Hostel zrug gfahrä womer am 01:40 si acho u nägschtens is Bett si.
Üses hütigs Highlight: Cornhole spiele mit de Type, Livemusig am Abä
02. AUGUST 2024
DAY 17 - CHICAGO, ILLINOIS
No chli schläfrig simer um die 9 erwachet, emel d Fii u het chli am Blog garbeitet. D Evä het öppä äs bizi z viel Alk gha het si gmint u drum simer no chli gmüetlech im Zimmer blibä bis am 11. Aschliessend simer üs ga parat machä u näb üs isch ä Frou am schminkä xi wo scho 45 Minutä vorhär dört isch xi, womer mal ufs WC si. Also die het viel z schminkä u es wird no meh cho, dr Tag isch no ned fertig. När simer am 11:40 losgangä mit Bananä, d Fii mit 2 Bananä u si richtig Fitness gloffä. Vorhär himer no äs Kaffi gholt gägäüber vom „LA Fitness“ u si am 12:00 dört xi. Ds Kaffi het „Olor Coffee Bar“ ghissä und isch no besser xi als dä geschter! No 1 Tag u när himer aber de sowieso umi dr beschd Kaffi ever! Mier si ufeme Bänkli ghocket u hi chli dä Lüt bi ihrem mache u tue zueguget. Under anderem himer die gstresstä Frouä bim fahrä gseh wo unnötig hupä, numä will ds Outo vordran ned cha abbiege ufgrund vom Gägäverchehr. Dä Männer wo ifach ned chönä siitwärts iparkierä oder Grosis wo über d Strass secklä u fasch überfahrä wärdä. Für die Sprintilag isch sie aber no churz vorhär für 20 Sekundä näbä üs ufs Bänkli cho höcklä u Energie tankä. Am halbi 1 isches de ab gangä iz Training. Ar Fii isch ufgfallä dasses i däm Komplex älwä ä Chino git wills nach Popcorn schmeckt weme ine chunt. D Evä het das o gschmeckt aber bim Gruch eher a verschissnigä Windlä denkt… was het äch die für feini Windlä gwächslet? Oder was het d Fii für grusigi Popcorn gässä? Churz vorem Empfang het d Evä no gsit „Hilfsch wettä, mir wärdä wieder es huere Züg ha u äs git ned?“ u d Fii so „Nä ä mier wärdä ke Problem ha, hanes guets Gfüehl, das chunt guet glubmer.“ Letschteres isch dr Fall xi. Mier hi gfragt fürnä Tagespass u är het gägägfragt ob mier i Betracht zieh no meh cho z trainiere u da himer erklärt, dass mier am nägschtä Tag uf Portland gö und dört i Betracht zieh ga z trainierä u bi witerä Standört. Mier hi sini Sympathie gwunnä will är z Portland ufgwachsä isch und anschtatt 20$ pro Person himer beidi gratis iz Fitness chönä. Mier söllä doch ifach ä gueti Bewärtig schribä. Mier hi ke Bewärtig wellä schribä bevor mier o ke ehrlechi Minig derzue chönä abgä u drum himer ihm gsit, dass mier das speter wärdä machä will mier ja no nüt chönä sägä. Är het üs ineglah u mier hi bis am 13:00 ufgwermt u Mobility gmacht. När 2,5h trainiert bis am 15:30. Ds Fitness isch riesig xi, äs het 2 Stöck gha u d Flächi vo eim Stock isch öppä d Helfti vom Bundesplatz xi! Äs het z miz drin äs Schwimmbad gha u d Trainingsflächene si rundume bout xi. Näbedran hez no 2 Squash Halli u es riesigs Studio mit Spiegle rundume u meh als gnue Platz fürnes Konzärt z verastaltä. Äs het so viel Grät gha u sogar e igeti Bahn zum secklä! Viel vo dä Grät söttä mal gwartet oder ersetzt wärdä aber mier hi glich guet chönä trainierä. Teil Lüt im Fitness si meh zum telefonierä oder umäligä dört. D Musig isch zum Glück sehr luut u de het sich d Fii o ned so ab dänä telefonierende Lüt ufgregt. Nachem Training hi mier de üsä Review gschribä u hi das mit Stolz am Typ vorhär wellä vorlegä. Är isch neme da xi u de simer o gangä. Undä dran isch z „Tropical Cafe Smoothie“ xi womer üs ä Protein Shake si ga holä und d Fii no äs „Mixed berry greek yogurt“. Bevor mier dört inä si isch d Evä allerdings no inä Donut Ladä gflüchtet, will sie dr Typ vom Fitness entdeckt het u gmint het, dä wot öpis sägä wäg dr Rezension. Sie isch ini gsecklet zum sich ga versteckä u d Fii isch gar ned drus cho u heter die ganz Zyt grüeft, dass sie im falschä Ladä isch u ds „Tropical Cafe“ näbedran isch u mier witer fürä müessä. D Evä het ihre die ganz Zyt versuecht z signalisiere, dass d Fii ruhig söll si und das het no für meh verwirrthit gsorgt bir Fii. Da isch d Fii o i Ladä u d Evä isch i däm Moment usegsecklet will das für meh Ufmerksamkit gsorgt het u dr Typ i däm Moment o zur Türe ine isch cho. Mittlerwilä het d Fii zwar gseh, dass dä da isch aber ned verstandä was d Evä gnau het. Mier hi üsi Review ja gschribä. D Evä het gmint mir bechöme uf d Löfflä will mier ned 5/5 Stärnä gäh hi u är chömi üs iz nachä. D Fii hets härzig gfundä was sie sich für Sorgä macht. Nachdäm simer zrug gloffä is Hostel u am 16:20 dört xi. D Evä het üs fürä Flug am nägschtä Tag icheckt u när simer uf di 17:00 ga chochä: Pasta mit Brokkoli, Rüebli, Bluemchöhli u Tomatä. Zum ässä himer no guget was machä am ledschd Abä u hi ä Bootsfahrt buechet wome d Architektur vor Stadt guet gseht. Äs isch scho 6i xi u mier hi chli müessä pressierä u si üs ga parat machä für a Hafä z fahrä. Frisch duschet simer mitem Lyft dört hi gfahrä und no z früeh acho u was machä mier mit übriger Zyt? KAFFI holä! Blue Bottle in Sicht (Eväs Lieblingskaffi bis vor Portland) aber dä het zuegha u de himers halt lasi. Am 19:50 simer ufem Boot xi u hi gwartet u gwartet u gwartet u d Evä het ging wie meh afa merkä, dass sie äs Kaffi brucht will sie nem mah. D Fii het no mögä aber isch irgendwie biisig xi im Hals. Am 20:00 ischs due losgangä. Mega schön scho numä ds losfahrä zwüschä denä ganzä Hochhüser und dr Sunnä wo no gschuunä het u ihres Liecht uf d Hüser am Fluss gworfä het u dür z Glas alls het la reflektierä! Jedes Gebäude isch anders vor Architektur und uf sini Art u Wiis inzigartig bouä. Äs het zum Bischpil eis gha wo usgseh het wiene Bienestock, das isch äs Parkhuus xi u rundume hi d Outäheck no so usä gluegt. Die räschtleche 2/3 vo däm Gebäude si Wohnige xi. Richtig cool! D Fii het am Afang gad ä chli öppis verpasst will sie üs isch ga d Getränk holä, äs Kaffi für d Evä u äs Tee für d Fii. Aber mier si zumnä speterä Zytpunkt ono mal dört dürä gfahrä. Äs isch äxtra ä Bootsfahrt für d Architektur z besichtigä xi u da himer meh becho als erwartet! Scho numä will mier dr Sunneundergang o indiräkt hi mitbecho, d Stadt ir Dämmerig und im Fiischterä mit all där Belüchtig gseh hi. Zwüschdürä isch umi mal ini vo dene bekanntä Fallbrüggene cho. Das himer vorhär o no nie würklech gseh. Mit dr Zyt hi sich vor üs ä Gruppä vo 5-6 Typä agsammlet wo älwä zum posierä si cho. Inö nam anderä isch härägstandö u het sini beschdä Posene uspackt u dr giftigscht Blick pro Knipser füregholt zum möglechscht „cool“ dri z luege. Nach mehrere Kontrollene derzwüsche u 20 Versüech pro Bild, hi sis de gha für die nägschtä paar Minutä u när si sie zur nägschtä Kulissä. Irgendwenn isch dr Job älwä erledigt xi und sie hi z Handy gnützt zum chli uf Social Media z si. D Fii het dr Bünzli uspackt u ischnä ga sägä, dass sie doch bitte üs ned d Sicht söllä versperrä we sie eh numä uf Instagram si u das nöime anders sölle ga machä, mier würdä gärn d Ussicht gniessä u das git ned wo sie vor üs schtöh (mier hi ä Sitzplatz gha). Das hi sie igseh u sie ines Eggeli gangä bis sie irgendwenn umi hi müesse cho Selfies machä. Am 21:30 si mier due pünktlech umi a Land xi und äs ischs mega dr Wärt xi! Während dr ganzä Fahrt het öper ufem Schiff d Gebäudene erklärt u chli Gschichte derzue verzellt. Mier hi das ned so verfolgt aber hi gmerkt, dass är si Job nid nume gärn macht sondern o guet! Är het mit dä Lüt interagiert und hez ufne interessanti Art verzellt. Zwüschdürä hetmä umi kört wie öpis luschtig isch und d Lüt Früüd hi. Mier chönes empfählä! D Evä het d Täg vorhär Luscht gha ufnes Cookie will die z New York vor Fii e Biss probiert het u ihre das nem zum Chopf us isch. Mier si zum „Crumbl“ wo gad uf dr anderä Flusssiitä isch xi je 1 „Chocolate Chip Cookie“ ga holä u d Fii no e Milch derzue. Mmmmmh isch das fein xi! D Evä het gmint äs sig fein aber chunt ned a das in NYC härä! Für d Fii isches es 9/10 xi!
Z Beschdä dran isch aber, dass d Cookies hie warm verchuft wärdä! Frisch usem ofä und das isch nomal ä anderi Liga. Als Abschluss vom Tag u vo Chicago hi mier ä Drink wellä ga nä u hi üs ä Rooftop Bar gsuecht. Die womer gfunde hi isch vomene Hotel xi (RAISED | An Urban Rooftop Barm) u zwar ned so richtig Höch aber derfür mit Blick uf die vorhär erwähntä Bienestöck Hüser. D Evä het dr „Seiryu“ u d Fii dr „Arianagroni“ Cocktail gno. D Fii hetnä easy gfundä aber würdne nem nä. D Evä het ihre ned so gärn gha. We d Chuchi ned zuegha hetti, hetemer üs no öppis feins z Ässä gönnt, das het nämlech alles hervorragend usgseh. Mier si am 23:00 gange richtig Achterbahn u hi am viertel ä vollgstopftä Zug verwütscht. Me het gmerkt, dass ds Festival ir Stadt isch will aller älwä gad vo däm am himfahrä si (us üsere Sicht sehr früeh oder?). Gad näbä üs isch e Frouegruppä xi und die inti het sich ds chotzä verhäbt. Wos nem isch gangä het ä Typ wo vor ihrä gstandä isch aber ned zu ihne ghört het, ä Plastiksack uspackt u ihrä gä. Da het si due richtig losglit u vo rundume hetme ghört „you got it Maddie you got it!“. Die inti wo bis üs ghocket isch het sä bim erbrächä gfötelet u d Fii het gad wellä igriife will sie gmint het das sig ä fremdi Person urä gad wellä d Levitä läsä. Da het sie tscheggt, dass die o zur Gruppä ghört us lasi. D Maddie wo erbrochä het, het sich bim Typ bedankt füre Plastiksack, für das het sie sich mega zämägrissä und o bim usstige nomal danke gsit, dass das mega lieb sig. Är hets härzig gfundä u gsit, dass das kes Problem sig u är ihre lieber si Plastiksack git als, dass sie ihm uf d Schueh chotzt. Nach der Aktion chame wük sägä, Achterbahnfahrt u d Fii isch sich sicher, dass die ned vom Alkohol erbroche het sondern will dä Zug fehrt winer fehrt. Ihre ischs ismal ja fasch glich gangä. Womer is Hostel am lufä si xi, himer gseh, dass „Bud Light“ Sponsor isch vom Festival und da het d Fii gmint „Kes Wunder het die kotzt bi so grusigem Bier!“ u d Evä het däm zuegstummä. Mier si gad ar Amplä gstandä für über d Strass u ufzmal fehrt eini ellei im Outo verbi u schreit was das Zeug hält. Mier wüsse ned was die het ka aber äs het emel witzig usgseh und bringt üs ging no zum lachä wemer dra denke. Churz vor Mitternacht simer zrug xi u si üs ga parat machä für iz Bett. Wär träffemer im Bad? Die Frou vom Morgä wo sich entwäder immer no am schminkä isch xi oder so lang brucht het, dass sie mittlerwile scho muess abschminke. Sie schiint jedäfalls ä Bluemä Fan z si will beidi Outfits voll Bluememuster si xi, das und o dr glich Platz wie am Morgä, hi mit allem zämä no beschäftigt, dass sie dr ganz Tag ned usem Bad use isch cho. Guet Nacht vo üs.
Üses hütigs Highlight: Für d Fii z Fitness und d Architektur Bootsfahrt dür d Stadt. Für d Evä numä d Bootsfahrt.
03. AUGUST 2024
DAY 18 - CHICAGO, ILLINOIS
Mier si früeh ufgstandä (05:15) u hi dr Sunneufgang wellä ga gugä am Strand vornä. Drum simer am 05:45 losgloffe u hi scho vo wiitem die brennendi Sunnä dörfä betrachtä wo üs dr ganz Wäg entgägä gschuunä het u womer am Strand acho si, isches zämä mitem Wasser nomal wunderschöner xi als vorgstellt! Mier hi Platz gno u dr Moment gnossä u es paar Fotos gmacht zum festhaltä. Äs isch unglublech xi die Kulisse no mit dä Vögel wo zfridä umägflogä si. Mier si irgendwenn chli witergloffe ar Stadt entgägä ufem Riverwalk u dr Tag het agfangä, ging wie meh Lüt si cho für z spörtlä, spazierä oder ifach i Tag z starte wie o immer. Da simer zrug gloffe u no hurti i Lincoln Park wo mier ismal si ga joggä, fürne Spaziergang zmache u dört no chli z fötelä, das himer ismal nämlech ned gmacht. Scho ismal simer hie vomne Ehöri verfolgt wordä u dasmal het d Fii tscheggt, dass die chömä wemä nä rüeft. Das het si natürlech müesse uskoschtä u het dänä grüeft, nid zu Eväs Vergnüegä.. dä Chib het üs fixiert u isch cho z secklä! Da het d Evä hurti ä Sprint häräglit! Obwohl mier scho gahnt hi, dass z „Olor“ Kaffi zuehet, simer glich dört härä gloffä u his versuecht. Natürlech heter zuegha um die Zyt u mier hi üs mitem Starbucks zfridä gäh näbedran. D Fii het no öpis z Zmorgä kuft wo besser isch xi als es usgseh het (2 Eier, Frücht, Chees, Müeslibrot u Peanut Butter). Was ir USA bim Starbucks immer gfragt wird: obme z Kaffi hiss wot oder chalt. Empfindä mier komisch aber ja d Amis trinkä wük fasch nume Iced Coffee. Mier si ufeme Bänkli ga hocke u hi zmörgelet u si am 08:15 is Hostel zrug glofe, wo nume 15 Minutä wäg xi isch. Dört himer nomal zmörgelet, vor allem d Evä. D Fii het due no ihri gliebti Bananä verdrückt. Am 9i simer scho umi kabut xi vom Tag u äs het ä Nap erforderet! Streng üsi Reis.. :) Scho am Morgä so hiss, früeh uf, wenig Schlaf und und und.. das brucht üs altä Seck halt. När himer üs endlech ufgraft zum packä u vor dä halbä 11 fertig xi. Mier si 30 Minutä z früeh xi fürs us z checkä u d Fii het i där Zyt no ä Lachafall gha wie no fasch nie i ihrem Läbä! Sie het äs Video gseh u so fescht glachet, dass sie sich 10 Minutä ufem Bett umhär gwälzt het, ihrä d Tränä si cho und sich nem het chönä beruhigä. Nume d Zyt wo üs am dervolufe isch xi langsam het sä due irgendwenn umi zrug id Normalität chöne füehrä. Am 11:15 himer üs verabschiedet u si gangä. Wos due für d Fii gar nüm zum lachä het gäh! Mier hi dört ewig ufä Bus gwartet (ganzi 25 Minutä) obwohl vor Gägärichtig här scho 3 vo där Linie si cho z fahrä. D Evä het sich gfragt, ob äch die anderi umi ä Zwüschestop häräglit het will dr Bus voll isch xi. D Fii het gfluechet u gmacht u sich gnärvt will sie doch lieber ufä Lyft het wellä aber willmer so früeh dran si xi u no chöne sparä für 2-3 Kaffis meh in Portland z trinkä, het sie due z Iverständnis o gä für mitem ÖV. Endlech isch dä cho und mier hi chöne fahrä u si o mitem Zug no besser als ismal underwägs xi. Scho am 13:00 simer am Flughafä xi u hi z Gepäck umi ohni azstah chönä abgäh. Äs isch Zyt xi fürne Smoothie und für d Fii derzue o no ä Smoothie Bowl, für die nötige Vitamine u Proteine. D Evä het sich nachem Smoothie no 2 Burger im McDonald‘s gönnt. Völlig übermüedet si mier när ifach nöime häräghocket hi d Zyt chli la vergah u d Fii het no chli döset.
Üses Fazit vo Chicago: Zersch heimer denkt, dass d Lüt mega unfründlech si aber die si gar ned so schlächt. D Lüt si z Chicago chlei mit ihrem eigete Ding beschäftigt u me chönt dört gad chlei uf d Wält wemä gad vo dä Südstaate chunt. D Architektur isch dr wahnsinn und äs git o hie immer öppis z erläbä.
REIS NACH PORTLAND, OREGON
Am 15:40 simer früeh dran xi mit boarde u si ines mega super cools Flugzüg ihgstigä! U sie hi Chopfhörer vertilt, das hisst: Me cha Film gugä! u das uf mega modernä Bildschirmä mit dr nüijschte Technologie, me het sogar die igetä Chopfhörer chönä verbinde mit Bluetooth, das himer no nie ka! U so viel Uswahl a Filme u Serie! Mier werä beidi fasch igschlafä u ufgwachet womer mit chli Verspetig (25 Minutä) gstartet si. När isch verbi xi mit dösä u mier hi zämä ä Film guget (Tony Hawk - Dokumentation) wo mier beidi interessant gfundä hi. Bis ufnä völlig unerwartiti Turbulenz wo richtig fescht xi isch u ar Evä dr Puls hurti uechi gjagt het (d Fii isch sich ja iz z Zug fahrä in Chicago gwahnet), himer ä mega agnähmä Flug gha. Sogar d Frou näbe üs wo scho am Afang gad afa dr komplett Sitz inkl. alls drum u dran desinfiziert het, het sich ruhig Verhaltä. Mier hi Getränk becho u e Snack aber wük öppis z Ässä ned (himer ufeme 4h Flug o ned erwartet) will z Catering am streikä isch u nüt kochet het. Endlech isches richtig Landig gangä u scho vo Obä himers afah füehlä, wie schön miers hie ifach findä u Oregon üsä Lieblingsstaat isch! Die Farbä u Landschaftä si ifach puri Nostalgie xi für üs u womer am 18:30 glandet si hez scho chli Fröidestränö gä bir Fii. Mier si zwar fang am Flughafä xi aber hi üs scho Dahimä gfüehlt! Mier si glücklech dürä Flughafä gloffä, chli ga schnöiggä u z erschtä Kaffi wellä holä will inä vo üsere Lieblings Rösterei (Stumptown) ä Shop het gha im Terminal. Dä het aber leider scho zuegha u mier si langsam z Gepäck ga holä. Das hi si übrigens scho fasch beschlagnahmt will mier so lang brucht hi u zersch Sightseeing am Flughafä si ga machä. Mier hi üs ä Lyft bstellt für möglechscht schnäll id Stadt z cho. Mier chöi älwä ned usdrückä wie sehr mir die Stadt liebä! D Evä het zur Fii gsit: „Üsi Chind wärdä mal numä 1 Ferie Destination kennä!“ u mier hi üs scho am Flughafä überlit lenger hie z blibä u dr Räscht vor Reis z stornierä. Derzue himer üs überlibt ob mier äch mal hie chömä cho wohnä. Vlich git das ä ungfähri Vorstellig drüber wie mier Portland findä. Sogar d Sifä am Flughafä schmeckt fein womer no hurti uf ds WC si bevor üsi Fahrerin cho isch. När ischs losgangä u mier hi interessanti Gspräch gha im Outo, mitem Fokus uf d Verenderige wo dür Corona, Black Lives Matter usw. in Portland stattgfundä hi. Äs si halt glich 6 Jahr vergangä aber mier hi üs so gfröit da z si! Am 20:00 simer im Hotel Lucia (Downtown) acho u ga ichecke. Mier hi ke Zyt wellä vergüdä u si üs hurti ga frisch machä u diräkt los.
PORTLAND, OREGON
Zerschtä womer gmacht hi isch iz „Old Town Pizza & Brewing“ für ar Fii ihres Lieblingsbier „Hunter 75“ ga trinkä u es Stück Pizza ga ässä wo dört genial isch! Da het scho die erschti Enttüschig uf üs gwartet.. ds Bier giz nem. D Fii isch trurig xi u het nacheme andere Fruit Sour Bier gfragt, das hi si ledschd Wuche gad ka u die Wuche hi sie eher anderi Sache im Agebot. Sie wächsle immer chli ab. De himer es Lager gno u si üsi Pizza Slices ga gniessä. Mier hi je 1 Stück Peperoni bstellt.. für d Amis isch das aber Salami. Äs isch trotzdäm sehr fein xi! Iz folgt älwä ä chlini verstörendi Vorstellig… mier hi gsit mier müessä die Stadt richtig gniessä u ufsuugä! Also hi mier us Blödsinn u Früüd dr Tisch abgschläckt u zämä glachet u ifach e gueti Zyt gha. Das het d Fii chli vom Verluscht vo ihrem Lieblingsbier abglenkt. Mier si witer u d Evä het no hunger gha, drum simer ifach chli dür die Altbekanntä Strassä gloffä u zumnä Indischä Restaurant wos den zwar scho gäh het aber mier nie si xi. Sie het es „Paneer Masala“ gno zum mitnäh u dr Chällner het üs no äxtra Chees gäh u 2 Samosa derzue. Womer umegloffe si, hi mier no üses alte „Dehei“ gsuecht (ä Platz voll mit Parkplätz u rund ume voller Food Trucks). Mier hi gwüsst wo aber his ned gfundä u hi üs am Target wellä orientiere will mier dört jedä Abä si ga Zehnputzä. Dr Target isch furt xi u irgendwie het öppis nüm gstummä. Mier hi ä Security gfragt wo gad umegloffe isch u dä het üs erklärt, dass wäg Corona u Black Lives Matter mega d Ufschtend si xi in Portland u vil zue isch, unter anderem si d Food Trucks wäg u üse Parkplatz gitz nem, da hi si äs Gebäude boue. Dr Target isch o siteme halbe Jahr zue. So schad aber ja. Zämä simer zum Pioneer Square gloffä (häbet euch die erschti Szene vo „Free Willy 1“ vor Ouge wo dr Jesse am bättlä isch für Gäld - dert simer härä) u hi dört gässä. Im Summer giz den immer gratis Events (Konzärt, Chino usw.) aber äs isch scho leer xi u de himers z Zweit gnossä dört z si u chli philosophiert. D Evä het z Bier vo vori scho gmerkt u mier si gli zrug is Hotel wo fasch näbedran isch. Am 23:00 simer im Zimmer xi u gli druf zfridä u glücklech is Bett.
Üses hütigs Highlight: Dr Sunneufgang in Chicago und natürlech endlech in PORTLAND z si!
04. AUGUST 2024
DAY 19 - PORTLAND, OREGON
Endlech hi mier umi mal gnue Schlaf übercho! Beidi über 8,5h u si am 10:30 uf. D Evä het Chopfweh gha älwä wägem Muskelkater u d Fii het sä massiert am Rügge u Chopf. Äs isch ihre när scho besser gange u mier si ga duschä u am 12:15 los. Im Hotel himer no hurti z Fitness bestunt u ä rundi Arcade Games gspilt womer gratis chönä bruchä. Äs het 2 Flipperchästä und 1 Streetfighter. Via Pioneer Square simer richtig Stumptown gloffä. Mier hi ned lang i Stumptown (keni 5 Minutä) aber hi 30 Minutä gha willmers so gnossä hi. Äs isch so unglublech für üs umi hie z si i üsem gliebtä Portland, mier chönes ned gnuä sägä! Mier hi scho umi überlit obmer dr Räscht wi stonierä u hie blibä bis im Herbst. Dr erscht Schluck Kaffi gno u nomal gneuer vertüüft u mier si älwä wük churz dervor xi das z wük z machä. Mier hi hunger gha u si witer iz „Nong‘s Khao Man Gai“, wo mier kennt hi vom Food Truck 2018. Die hi mittlerwilä chönä äs Resti ufdue u drum simer dört ga ässä. D Evä het z glichä gno wie den zumal Chicken & Rice (Khao Man Gai) d Fii wisses nem was sie vor 6 Jahr het ka aber älwä o das wo sie o dasmal gno het (Chicken Peanut). Beides sehr grossi Portitione und gsund mit viel Gmües! U numä 15$ pro Menü. Churz vor dä 2 simer gangä für zum Barista ga z käffelä. Scho am 2 simer dört xi u hi nomal 2 Kaffis bstellt. Dört hez ä fruchtigä u bluemigä Gschmack ka, gägä Schluss wes scho fasch chalt isch, hez nach Melonä gschmeckt. Mier hi am Blog u Polarsteps gschaffet und si irgendwenn vo 2 Type agsprochä wordä, ob mier ä hertä Sunntig hi u müessä schaffä. Mier hi chli mitnä gschnurrt u sie hi sich vorgstellt etc. u gfragt was mier z Portland machä u werum die Stadt üs so gfallt. Nach üsnä Erzähligä hi si sälber no bigfüegt, dasses härzigi Typä git u das o ä Grund isch. Da himer erklärt, dass das üs egal isch will mier äs Päärli si und da hi si gsit ou das hette si älwä zersch söllä fragä und obmer glich mal öpis wellä undernäh. När himer gsit, dass mier ifach d Stadt gniesse ohni gross abzmache u miers für üs welltä machä. Da si si de irgendwenn wiiter. Bis am 17:15 himer gschribä u ersch den gangä. Leider himer o hie so schlächts WLAN gha, dass mier ke Fotos hi chöne ladä. D Fii het 3 Kaffis trunkä ka und langsam himer chli Bewegig brucht. D Evä het ir Gluscht inä äs Glacä kuft wo sie aber ned so gärn het gha u mier si ifach chli ir Gägend umegschlenderet. Under anderem simer am Jamison Square verbi wo ä Obdachlose am Spörtle isch xi bzw. am dehne im Wasser din. Äs het witzig usgseh u när hez no Familiene ka wo mit dä Chind am plantschä si xi. Womer im Hotel si acho isches scho 18:45 xi u mier hi chli d Füess ueche da. D Fii het ufzmal gmerkt, dass sie ganz ä schlächtä Luun het. Mier hi ned gwüsst wieso aber äs isch halt mengisch so, sie het sältä aber das isch inä vo dänö Momente xi. Gli hez aber besseret womer am 20:00 si ga ässä iz Bamboos. Mier hi zum Glück vorhär reserviert ka will äs isch zimli voll xi. O das isch äs bekannts Resti für üs womer mal z beschdä Flisch u Sushi gässä hi und leider hez ä anderi Chartä u das womer hettä wellä, neme ka. Me merkt.. äs het sich wük sehr viel verenderet aber nach wie vor: das isch üsi Lieblingsstadt! Mier hi glich fein gässä o wes nem das isch xi vo den. Az A-Roi in Nashville isches aber nem härächo! Am 21:00 simer gange u sie hi o scho zuegmacht. Wo mier den si xi, simer sicher mal am 23:00 ga ässä. Näbedran isch z „Beer O‘Clock“ xi wo mier je 4 Bierli probiert hi. D Evä het 4 Ciders u d Fii 4 Suurbier teschtet. Beidi hi ä Favorit gfundä, ar Fii het das am beschdä passt wo im Nachgschmack isch xi wi z „Hunter 75“. Bir Evä het eis nach Windlä gschmeckt u das het si ar Fii gä. Zrug im Hotel simer vom 22:15 ga Yatzy spiele u hi dört ono äs Bierli (Rouge Hazelnut) gnossä bis am 00:00. Ä super Abä isch z End gangä und mier si glücklech iz Bett.
Üses hütigs Highlight: Kaffi, Kaffi, Kaffi! Bier, Bier, Bier! Zämä Yatzy z spiele im Hotel
05. AUGUST 2024
DAY 20 - PORTLAND, OREGON
D Fii isch am 7i ufgwachet und nomal chli pfuset bis am 9i. När het si afa füre Blog schribä. D Evä het am 10:15 ging no nüt dergliche da u da het d Fii mal versuecht sä z weckä. „Nume no 10 Minutä“ het si gmint, da sis 60 wordä u d Fii het zwar viel chöne schribä i där Zyt u no mit dr Schwo gluegt wäg dä Kontaktlinsä wo z Memphis bim Zoll feststeckä. Die wartä uf irgendwelchi komische Dokument u niemer chunt richtig drus wäder Fielmann no d Fii oder ihri Schwo. D Fii het ifach irgendöpis mal welle schicke u schlussendlech het FedEx ihrer Tante aglüte ir USA u die het ihre när gsit was si brüche (nomal öpis völlig anders). Het sie gschickt u iz hoffemer es chunt guet. O we sie viel het chöne erledigä, het d Fii de aber o mal uf welle u d Evä den nomal gweckt. Mier si beidi froh, dass mier z Portland nüt aktiv müesse ga mache willmer scho viel gseh hi u kenne u hie ifach wük chli chönne si u d Stadt gniesse, mier füehle üs hie so Dehei! So himer ke Druck öpis müesse z erledige u chöne ifach si. Mier si losgange fürnes Kaffi im Stumptown am 12:15 u churz vorhär het FedEx ar Fii gschribä, dasses guet isch und sie ersch iz schribe will sie no hurti si ga Zmittag ässä u drum ersch iz schribä. Mier si am 12:30 im Stumptown acho u hi beidi es Kaffi bstellt, si häräghocket u hi am Blog / Polarsteps gschribä. D Fii het due no vo FedEx Bschid becho, dasses guet chunt mit dä Linsä u sis witerschickä. Bis am 14:15 simer im Stumptown ghöcklet u hi gschribä. När simer mal gangä für no öpis ga z ässä. Für das himer ä Lyft gno u sie so schnäll uf die anderi Siitä vo Portland gfahrä zu dä Food Carts (Cartopia) u 14:30 acho. D Fii het sich Tacos gönnt u die hi so guet usgseh, dass d Evä o überzügt isch xi! Mier hi beidi sehr feini Tacos gha u si nomal ga hole u hi je 6 ka. Am 15:15 simer umi gange u langsam wärdeter wohl chöne erahnä was bi üs so ufem Programm schtit… mier gö ids Kaffi „Coava Coffee Roasters“ womer nach 20 Minutä lufä erreicht hi. Stumptown, Barista und Coava si die 3 Kaffi Röstereie xi im 2018 wo üs zu üserä Liideschaft für Kaffi gfüehrt hi. Ar Evä ihrä Favorit den zumal isch dr Barista & Stumptown xi u ar Fii dr Coava. Jitz 6 Jahr speter isch ar Evä ihrä Favorit Stumptown u d Fii isch am Coava immer no tröi bliebe. Mier hi dr „Morro dos Padeiros“ becho wo folgendi Gschmäcker het: Tröchneti Cranberries, Schoggi Pudding und Clove“, wük ä usserordentlech guetä Kaffi! Äs gäb sogar inä mit Tiramisu Gschmack wo sicher für d Fii als Tiramisu Liebhaberin dr Hit wer! Währendem käffele isch ar Evä ufgfallä, dass sie mega viel Zonäminutä het uf ihrer Fitbit Uhr. Das giz nume weme ä erhöhte Puls het vom Sport. Da mier hüt aber nume am käffele si, het sie älwä vom Koffein die Zonäminutä becho. Für aller Sportfuulä, göt ifach ga Kaffi suufä! Mier si witer iz Bier am halbi 5 u si öppe 20 Minutä underwägs xi für dörthi. Mier hi no ä Zwüschästopp gmacht vo 30 Minutä bimne Thrift Shop. Ca. am 17:40 simer acho bir „Little Beast Brewery“ u hi ä Flight vo 4 Suurbier bstellt! No besser xi als die geschter. Am 18:30 himer zahlt u si mitem Lyft zrug iz Hotel womer am 18:55 acho si. Hurti dusched simer 1h speter los für ga z ässä is „Piazza Italia“, o das isch äs bekannts Resti. Am 20:10 simer dört xi u dr Chällner het scho Früüd gha a üs will mier ifach mier si. Hi enand ufzmal o vorgstellt, äs git dr Roberto (het üs empfangä), dr Giovanni (het üs bedient) u dr Jayden (ihm si Grossvater het ds Rest ufta) und bim bedienä het dr eint Chällner dr ander gfragt wo ds Glas Wii härä chunt u dr Giovanni är so: Das chunt zur Fii! Das hei mir so mega sympathisch gfundä! Generell hi si üs när immer mit dä Nämä agsprochä oder grüeft. Ds Resti isch voll xi übrigens u sie hei üs mega guet bedient u sich bedankt für d Geduld usw. D Evä het „Straccetti“ (Rucola, Pasta, Rindsflisch Striifä mit Chnobli) u d Fii das wie vor 6 Jahr (Spaghetti Pomodoro). Mier si im 2018 iz 24 Hours Fitness ga trainiere u nachem Training ga Pasta ässä. Ds Resti isch diräkt näbedran u hi mier den per Zuefall bsuecht. D Fii het immer gsit, dass sie no nie so gueti Pomodoro het gha u äs isch ihrä immer blibä. O dasmal isch sie ned enttüscht wordä u es het 10/10 gä! D Evä het sich nem so chöne erinnerä aber isch begeisteret xi u het de mit dr Zyt umi chli a Erinnerig zrug becho. Dr Rotwii isch o sehr fein xi (Barbera d’Alba). Im Resti dinn isch e Gruppä xi vo öppä 12 im Azug kleidetä jungä Mannä wo nachem Ässä gägäüber em Resti ines Huus si mit offener Fensterfront. Die si dört ga höcklä u hi gredet u d Fii het us irgendeme Grund wellä wüssä i wellem Zämähang die zunand schtöh, wieso die i das Huus si, wieso die si ga ässä. Das isch öppä 20 Minutä lang ihres inzigschtä Thema xi wo se interessiert het. Die Manne si nämlech öppe so 17/18 xi. Schlussendlech het sie de dr Roberto gfragt u dä het ihrä z Rätsel chönä lösä. Die sigä ihre High School Abschluss am fiirä u eine vo ihne wohnt dört im 2 Millione Huus. D Fii het erliechterig gfundä. Äs het sich no ergäh, dass am Nachbarstisch inä us Dütschland isch xi wo aber z St. Galle gwohnt het, sini Schwo in Luzärn wohnt u är sälber hie in Portland. Är het üs iglade zu sir Usstellig (Druckerei) ir Porsche Garage. Är wird am nägschtä Tag zwar ned dert si aber mier söllä am Kevin (Barista bir Usstellig) ä Gruess sägä vom Kelly und mier bechöme beidi es gratis Kaffi. Eich hetemer no chli wellä blibä u ifach d Atmosphäre gniesse aber am 21:30 isch ä Bachata Social 10 Minutä witer und dört hi mier drum o no härä wellä. Mier hi gad d Rächnig verlangt, da chunt dr Giovanni mit Glacä usä wo ufs Huus gangä isch. Äs sig ihm sini Lieblingssortä (Nocciola) u o ini vo Fii’s Favoritä. Schnäll schnäll het d Fii die verschlungä (o die isch genial xi!) u när simer due wiiter. Übrigens isch d rächnig numä 51$ xi! Mier hi gha: Wasser, Rotwii, die 2 Menüs, Bruschetta zur Vorspies u när no Glacä ufs Huus. Das isch NÜT! Mier si so satt xi u alles so fein, sie si mega lieb xi u de hi mier meh Trinkgäld gäh als normal (normal muessme ir USA so 15-25% gä u mier hi 50% gä). Dr Giovanni het üs ono verzellt, dass är bis 9i z Sardinien ufgwachsä isch und sie när alli id USA usgwanderet si. Sini Elterä hige sich när gschidä , dr Vater mittlerwilä gstorbä u d Muetter u Schwo umi zrug uf Sardinie. Är het üs sis Whatsapp gä u we mier mal uf Sardinie id Feriä gö, het sini Mam es Airbnb zum vermietä. Öppä am 21:45 simer due bim Bachata Social acho u äs isch ned wük ä Social xi sondern eher es Practica (üebä nachem Kurs). Dr Bodä isch super xi o ohni Tanzschueh! Me het i dä Sneakers wunderbar chöne dreijä. Dr DJ het die Songs wome kennt het mega verhunzt miteme doofe Remix, süsch si viel Songs cho wome ned kennt het u d Wächslä si o zu schnäll xi. Ds Liecht isch die ganz Zyt an xi u das het wük meh anes Kurs Feeling erinnerert. D Tänzer si nid so dr wahnsinn xi u mier hi de beidi mischtens zämä tanzt. Dr Bryant isch Tanzlehrer xi dört u mier hi beidi no mit ihm tanzt u si de nach öppe eire Stund scho gangä. Äs het o ned viel Lüt gha, halt die 15 Lüt vom Kurs u meh ned. Vom Josh himer no ä Social Info becho wo de am Mittwuch isch, är isch sälber us Philadelphia aber wis so isch, chunt me bim Tanze immer mit allne iz Gspräch u bide Amis sowieso! Was o no witzig isch xi, dass är mal ir Schwiiz isch xi u üs gad wellä äs Foto zigä vo eirä wo mier vlich kennä vom Tanzä. D Fii het genau die im Chopf ka no bevor är üs z Bild zigt het u het die Frou kennt. Äs isch ä DJane wo albä o z Bärn a de Bachata Socials ufleit aber meh z Basel u Züri. Är schiint sä guet kennt z ha willer Sache vore gwüsst u verzellt het wo d Fii zwar o gwüsst het aber mä nume wiss weme se ned nur als DJ kennt. Das isch umi e riese Zuefall u zigt wie Lüt ir Tanzszene connected si. Mier si de himgloffe u nach 25 Minutä acho (23:25) u nomal ga Yatzy spielä. Derzue hez nomal das Bier gä vo geschter und äs Päckli „Sour Patch Kids“. Bis am 00:45 himer gspielt u si när ga ligä.
Üses hütigs Highlight: Kaffi, Bier Tasting und z Ässä bim Italiener!
Kommentare