Ir zweitä Wuchä hi üs üsi Erläbniss zu undankbarä Obdachlosä, türä und o günstigä Jazz-Brunches einisch ä kulinarischä Hit u einisch eher ä Flop gfüehrt. D Fii het Sympathie bimene ÖV-Fahrer gfundä, hi üs ir Nachbarschaft fasch i Schwierigkeite bracht, ungeniert gvaped und groucht als gäbs kes Morn. D Fii het sogar mal ä Burger entdeckt wo sie gliebt het und z bishär Beschtä Bier! Während d Fii happy im Rägä isch, het d Evä zum Zmorgä ifach o numä mal Puderzucker gnossä. Und ob miers wük uf d Verbrächer-Fahndigslischtä gschafft hi oder ned, läset dier i däm Bitrag :)
23. JULI 2024
DAY 7 - MEMPHIS, TENNESSEE
Hüt isch Ufbruch nach Nashville xi!
Öpis nach dä 8ä simer ufgstandä u hi üser Sachä packt u d Wohnig grumt. Am halbi 11 simer ga us checkä und i üses Kaffi „Crazy Gander Coffee“ ga zmörgelä u käffelä. D Fii het äs Porridge gno u d Evä isch leer usgangä, will sis ned gärn het gha u isch bim Kaffi blibä, wo hammer isch! Bis jitz dr Lieblingskaffi vor Fii sitmer uf derä Reis si. D Evä hez o mega gärn aber isch immer no bim „Blue Bottle Coffee“ in New York als Favorit. Im Kaffi himer am Reiseblog gschribä.
Üses Fazit vo Memphis: Z Fazit ufä erscht Blick het sich bestätigt, äs het wük viel fetti Gangster-Chärä , (gueti) Musig giz hie überall wills hie zum Standard ghört. Dr heftig Slang, wo üs mengisch chli Müeh bereitet het, isch o überall vorhandä xi. Jedä het üs gwarnt wie gfährlech, dass die Stadt isch u mier müessä ufpassä aber mier his zum Glück überläbt u chieme wieder! Was üs im gsamtä überzügt het, si die coole Lüt hie.
REIS NACH NASHVILLE, TENNESSEE
Churz vor dä 12ä simer los u hi no dr Lyft bstellt u si scho am 12:20 bir Greyhound Bus Station acho. Mier brüchte unbedingt no Wasser u hi üs bewusst drgägä entschiede in Memphis sälber nomal i Walgreens ga Wasser z chufä, wills ar Bus Station sicher o ä Müglechkit für das het. D Evä het wellä ga Wasser richä aber äs sigi ned gangä. Da isch d Fii o ga probierä wills öppe 8 Outomate het gha, dervo eine mit Ässä, eine mit Ladäadapterä u die anderä mit Getränk - also inä muess ja gah! Äs isch würklech a kem gangä, wäder mit dr Kreditchartä (Läser überall defekt), no mit Cash (z Gäld isch zwar ini gangä aber ds Getränk, sowie z Gäld nieme usecho). I där Zyt isch d Evä das ga mäldä. D Fii het gwartet u wo d Evä isch zrugcho, het sie ar zuestendigä Firma müessä alütä. Da isch plötzlech dr Boarding Prozäss losgangä u d Fii het dr Evä grüeft, dass mier müessä gah. Aber sie het no ds Telefonat gfüehrt us ned kört. Irgendwenn hets de d Evä o tscheggt, dasses Zyt wer ufzlegä. Mier hi boardet u d Fii hez ned für müglech ghaltä, jitz 4h z fahrä ohni Wasser. Da het sie dr Chauffeur gfragt, obs no ä Shop git oder öpis. Schlussendlech het är im Büro gfragt aber die hi o nüt gha, drum isch är no iz Büro vo dä Chauffeure ga gugä u mit 2 Fläschli Wasser usecho, mega lieb vo ihm u jitz isch o d Fii ready xi für loszfahrä! O we d Fii jitz zwar ihres Wasser het becho, närvt sie sech, dass d Amis allbot uf Lutsprächer müessä telefoniere und dr ganz Bus löh am Gspräch la tilha. Zum Glück giz Airpods, süsch würd d Fii nid ÖV fahrä. Pünktlech am 13:00 simer los u dr Chauffer het d Durchsag gmacht, dassme ned lut söll telefoniere oder Musig losä, dä Chib isch sympathisch winä Morä! Am halbi 3 hez 20 min Pouse gä u da isch üsi Challenge xi ar Tankstell öpis gsunds z Ässä z findä... forget it - giz ned! So si mier halt miteme einigermassä gsundä Riegel u für d Evä ipackts Plastig Flisch ad Kassä. Dört himer zum Glück no gseh, dasses Banani git u je 1 gno. Churz nach dä 17:00 simer acho im verrägnetä, nassä Nashville. Nach chli WLAN Problem hi mier de gli chönä ä Lyft bstellä u si am 17:30 vom Jose bir Station abgholt wordä für iz Airbnb, womer äs Zimmer hi bim Jake Dahimä.
NASHVILLE, TENNESSEE
Hurti bekannt gmacht u alls zigt becho, simer när witer am 18:45 ga ässä iz „A-Roi“ (Sushi und Asian Kitchen) wo knapp 10 min. z Fuess entfärnt isch xi u währenddäm mier dür d Nachbarschaft gschlenderet si, hi jenschti Hünd d Schnoutzenä uf üs grichtet u si churz dervor xi überä Zuhn z gumpä. Bim intä Huus isch sogar ä Alarm agangä wo öpis zu üs gredet het. Gli druf simer acho u hi sehr fein gässä! Mier hi sonä cooli Chällnerin ka, wo ar Evä jedä Wunsch het wellä erfüllä. Sie isch ersch sit 3 Wuchä da und isch bi allnä vo Eväs „special requests“ ga nachäfragä. Scho bir Vorspies himer üs entschiede, dass mier jedä Tag dahärä wärdä cho. Well… we will see. Dessert hez nem gä wills wäder Espresso no Vanille Glace het gä, da isch ar Evä d Alternative zwenig amächelig xi (Chuglä Grüentee Glace). Mier si zrug spaziert u hi no üsä Heimwäg uskäset, wöusech d Evä göttlech drüber ufgregt het, wi d Fii im Dunkle no dür Strasse wot, womer ni kennä. D Evä het ke Bock uf witeri kläffendi Hünd gha. Churz vorem Airbnb himer no bir High School ä Halt gmacht zum gugä wie ds Football Training, womä vo witem het kört, so luft. Leider hi mier nüt gseh wägem Zun und will sie ohni Liecht trainiert hi. Ar Evä ischs nem so wohl xi ufzmal u het gnue gha vo Fii's Neighborhood-Umestreunere, drum si mier när wük him gangä. Öpis vor dä 9ä simer acho und hi no chli guget was mier am nägschtä Tag chöntä machä.
Üses hütigs Highlight: Im A-Roi hi mier ned numä mega fein, sondern endlech o sehr gsund chönä ässä!
24. JULI 2024
DAY 8 - NASHVILLE, TENNESSEE
D Fii erchennt sich sälber ned meh u isch scho am 6:30 ufgwache. Ohni Wecker, ohni öpis. We das ir Schwiz o so wer! Aber o d Evä het früeh Tagwach gha u isch am 7i ufgwachä. Mier si beidi no rächt müed xi u hi drum no chli witer pfuset u de am 09:30 defintiv uf, duschet u guget wases hie so z machä git. But first coffee! Därum ab iz „Honest coffee roasters“, womer churz vor dä halbä 11 vorä wiitere coole Lyft Fahrerin si häräbracht wordä. Ihrä Namä erinneret a „Quinoa“, nämlech „Quionna“. Für üs isch si d Quinoa xi! Mit ihrä hi mier so cooli Gspräch ka über Musig, Tina Tuner, Mariah Carey, Beyonce, Dolly Parton. Sie het vo ihrnä Begägnigä mit dr Mariah Carey verzellt, wo ä mega Diva sig u chli „gemein“ het sie empfundä. Ganz anders sigi da d Dolly Parton, wo so cool druf isch und uf ihri Ussag, dasses so schön sigi sie z träffä gantwortet het mit „Oh I know it is honey!“. O süsch het sie üs no paar Gschichtä verzellt, wär welli Bar her ir Stadt (Luke Combs, Justin Timberlake etc.) u irgendwie het sie o über alls ä chli Bschid gwüsst i derä Stadt, bischpiilswis het irgend ä prominenterä ir Bar vom Luke Combs ä Schtuehl umegschossä dürs Fenster. Drum isch die jitz älwä zuä. Mier his all 3 schad gfundä, dass mier üs iz hi müessä verabschidä wills wük so cool isch xi! Aber was o richtig richtig guet isch xi u sogar gsund, üses Zmorgä ir Kaffiröschteri! Für d Evä sogar ä chli zu gsund, mier hi sone Smoothie gno u dört si irgendwelchi Gmües drin xi u die Mischig het sie als „zu gsund“ beschribä u sich gfüehlt wi ihri inti Schwo Lea. Ihrä wirds drum albä schnäll o z gsund, im Gägäsatz zur Evä. D Fii hetnä trunkä u bis ufs Wässrige relativ gärn gha. Derzue hi mier äs Avocado Toast gno mit so feine Chrütli obä druf und no äs Franklin Toast (Proteintoast mit Peanutbutter, Ärdbeeri, Heidelbeeri, Haferflockä, Bananä, Honig und Hanfsamö). Beides isch so abartig lecker xi und dr Kaffi ersch! Dä het richtig nach Schoggichuechä gschmeckt u bis jitz chunt dä am nechschtä a Kaffi in Portland härä! Für d Fii dr bishärig Favorit! Aber scho gli chunt de umi ä anderi Liga wemer z Portland si, dä spielt aber scho fasch i derä Liga mit, glubet üs! Am 13:00 simer mit tankter Energie witer richtig Broadway u hi no ä Zwüschästop gmacht ir Gibson Garage. Die isch usgstattet xi mit dä verschiedenschtä Gitarrene i jedem Eggä, i verschiedene Usbuchtige u sogar ar Tili obä, sie si cho z fahrä wie amne Lufband - richtig cool! Mier si witer zum Broadway u die Stadt läbt wük für d Musig, sogar dr Mc Donald‘s womer underwägs dran verbigloffe si spielt lut Musig, zwar chli äs anderes Genre als erwartet aber werum o nid mal Opere Musig übertue imnä Fastfood Ladä? Äs isch so hiss xi und ä Glace wer jitz das Wahre! Wie passend chunt üs da gad dr „Ben & Jerry‘s“ entgägä. Beidi hi üsä Favorit „Cookie Dough“ gno. Ds Oberschläckmuul Fii het obedrüber no M&M‘s + Reese‘s gno. När simer chli ine beliebteri Gägend cho, wos paar Lädä het gha fürs Ässä oder shoppä. Mier hi ä Ladä entdeckt wo üs mit dä nötigä Vitaminä und Proteine het chöne versorgä „Urbanjuice + eatery“. Da het sich d Evä ä frischö Früchtesaft gönnt u d Fii ä Proteinshake, wie sinä sich numä im Trum heti chöne vorstellä, so fein! Dr räscht für a Broadway himer mitem Lyft gmacht, wills zytlech bald chli eng wordä isch. Was fürne luschtigä u tollö Zuefall, dass mier nomal d Quinoa verwütscht hi als Lyft Fahrerin! Mier hi üs so gfröit u sie sich o! Dört simer när chli umägloffä u mega gflasht xi will mier endlech Nashville gseh hi, wimers üs vorgstellt hi. Am halbi 5i simer när inä Bar ghocket wo „Bootlegers“ hisst will mier vo dussä ä mega schöni Stimm mit Country Musig ghört hi. Mier hi vorhär zwar o scho viel schöni Stimmene ghört u o vil cooli Rock Musig, wo d Fii am liebschdä ini wer aber mier hi ned ids erscht oder zweit beschdä wellä, wemer ersch am Afang vor Strass si. Hie hi mier när 2 lokali Bier bstellt, d Fii äs „Hap & Harry‘s“ wo vom glichä Maa härgstellt wordä isch, wo o ir „Jack Daniels“ Familie isch. D Evä het sich amnä „Gerst Amber Ale“ usprobiert. Mier hi paar Lieder gwünscht us gnossä ihm zuezlosä. Öpis nach dä 6ä simer gangä u richtig Riverfront gloffä. Dört ir Nechi si mier zwü Amateure ga Zigis u Vape chufä. D Fii het sit Memphis Luscht ufnä Zigi i ihrer Jeans Jaggä, zumnä Bier u Live Musig. Eich d Läderjaggä aber die het si ned derbi, de dueds d Jeans Jaggä o. Äs isch ifach dört äs Feeling wome bechunt, süsch gruset sä das ging. Sie isch also nach dä schwechschtä Afänger Zigis ga fragä u het wissi Marlboro übercho. Dr Verchüfer isch übrigens super xi im beratä aber his o süsch luschtig mit ihm gha u no chlu gschnuret. D Evä het sich ä Vape kuft mit Ärdbeer & Kiwi Gschmack. Nach chli umäschlenderä simer iz „ACME Feed & Seed“ ga Znacht ässä. Mier hi nach öpis gsundem gsuecht aber das isch am Broadway ä ned möglech. Drum simer i dä Burgerladä ga Burger probiere u d Livemusig derzue het o umi amächelig tönt! D Fii het Früd lokali Bier z teschtä oder isch dank are Kollegin drufcho, dass ihrä Biertyp „Sour fruit beer“ si u probiert sich iz dört chli us. Hie het si umi äs Bier entdeckt „Dr. Robot Blackberry Lemon Sour“ wo nach a ihres Lieblingsbier us Portland härächunt. Portland isch ned numä für Kaffi hammer, dört giz ifach o z beschdä Bier! Mier hi beidi ä Burger gno u für d Fii isches nachem erschtä Biss klar: DAS isch dr beschd Burger wo sie je het ka! Und genau so het sie sich ä Burger vorgstellt, inä wi usem Bilderbuech! Wär d Fii chli kennt, wiss, dass sie ned gärn Burger isst, us Fuulhit ifach ned. Aber dä isch iz zu ihrem Lieblingsburger wordä. Sogar so gärn, dass sie ke witerä Burger ir USA wird ässä, da eh kene a dä wird härächo! Sie heig iz dr Beschd gha u besser giz nem. D Evä belächlet ihri Ussag u glubts ned aber d Fii mints Ärnscht. 1 Usnahm giz aber us Gründe vor USA Reis im 2018: Nume im „In n Out Burger“ nimmt si eine, will mier die Chetti im 2018 ned probiert hi u üs sehr vil gsit hi, dasses dört wük sehr feini Burger git u de wärdä mier das no müessä nacheholä u gad teschtä. D Evä het dr Burger übrigens o gärn ka aber ned so sehr wie d Fii u sie het sogar bemängelt, dass ihrä chli verbrennt isch. Das isch ar Fii bi ihrem o ufgfallä aber trotzdäm ischer richtig fein xi u hez ufä 1. Platz gschafft. Randbemerkig hie oder die wo d Evä kennä, wüsses: D Evä isch süsch die wo gärn chli abrennts Züg het, ganz anders als bir Fii wos de gar ned gärn het u dört dürä heikel isch. Also so bechunt mä vlich ä ungfähri Vorstellig dervo, wie guet dä Burger isch xi, emel für d Fii! Übrigens het d Evä 2 Haar i ihrem Burger entdeckt u scho z zweit Mal im Muul ka, zum Glück vor Fii will das dr Moment isch xi, wo ar Fii dr Räscht vom Burger gä het. Ar Fii si d Haar egal xi, her damit! Am 20:00 simer witer i „Whisky Saloon“ wo d Fii ä richtig guetä Whisky het wellä probierä. Für inä si üs d Täschenä kontrolliert wordä aber igtl. numä Allibi mässig. Sie hi gar ned richtig guget, nume hurti ä Blick inä gworfä wo d Fii dr Riisverschluss ufta het aber dä Rucksack het paar Sachä drin ka, u z underscht hetime guet chöne öpis inä schmuglä. Uf dr Rooftop Bar het d Fii ä Whisky gno u d Evä äs Cola u derzue z Vape usprobiert. Dr Whisky isch natürlech lokal xi us dr Nechi und guet xi. Ds Cola vor Evä isch o guet xi. Am halbi 10i simer witer u hi gseh, dass sogar im Taco Bell ä Liveband Musig spielt! Wie hammer isch das?! Die Stadt läbt würklech für d Musig. Stelletnech vor, Ir Schwiiz gäbs im Mc Donald‘s ä Band wo Live spielt. Bevor mier inä nägschti Bar si, simer uf dr Strass agsprochä wordä fürnes Foto z machä vomene Päärli. Das het d Fii gärn id Hand gno u sich Müeh gäh, es paar cooli Föteli z schiessä. Sie hi sich sehr gfröit u bedankt. D Fii fragt ging nache ob si zfridä si we si Fotos macht vo andernä u bietet ah süsch nomal z machä. Sie his aguget u gmint das sig super. De simer witer u wük churz druf umi zrug will mier üs entschiede hi i die Bar z gah, wo d Fii z Fotoshooting gmacht het. Da gseh mier, dass z glichä Päärli scho umi gfötelet wärdä isch vo öper anderem. Mier si inigloffä u d Fii het zum Päärli gsit „Glich ned guet xi ;)?“ Da hi si aber gmint „Doch doch“. Whatever :). Mier beobachte so viel, dass uf dä Strassö tilwis richtigi Shootings gmacht wärdä Minutelang als Päärli aber o Einzeln. Das schiint hie äs Ding z si. Mier si när i die „Fedora Lounge“ bis am 22:45 u hi scho umi sone super Livesänger dörfä gniessä. Speter isch de d Fii nomal gfragt wordä vore grösserä Kollegägruppä u dört si si richtig begeisteret xi u het sogar Kompliment becho, dass das scho Profifotos si und mega cool, dass sie sich so härägäh het. Da het sie d Hand usgstreckt u gsit „20$“ & sie heires zahlt! När isches himgangä.
Üses hütigs Highlight: Für d Fii ganz klar dr Burger u für d Evä d Country Musig ir "Bootlegers" Bar
25. JULI 2024
DAY 9 - NASHVILLE, TENNESSEE
Am Morgä simer lang im Bett umätrolet u ersch am 11:30 uf, hi duschet u si ab äs Kaffi ga nä is „Retrograde“ wo gad i üsem Viertel isch, u ga zmörgelä. Z Kaffi isch mega cool igrichtet (Vintage Style) u me chem älwä ned druf wemes ned wüsst, wills voll im Wohnviertel isch. Mier hi beidi es Avocado Toast gno mitmä Cappuccino. Am halbi 2 simer witer u hurti ad Tankstell näbedran ga Banane u Wasser chufä was übrigens günschtiger isch xi are Tankstell als imnä normale Ladä. Ir Schwiiz wers gad umgekehrt. Bim usega himer d Wand gseh mit dä „Ulitmate Thieves“ dran, also mit gsuechte Diebe, da i däm Shop viel klaut wird. Dehei himer üs schnäll aglit füre Sport u si när miteme Lyft zum Centennial Park für ga z jogge. Ufem Platz himer hurti 15 Minutä ufgwermt u när simer am halbi 3 los jogget. D Evä het nach 3 Rundinä ghört u nem so mögä, äs si o 31 Grad xi u tüppig wi imä Suuschtall! D Fii het no 2 äxtra Rundeni derzueghenkt, dass si uf 5 chunt. När simer no öppä 40 Minutä gloffä fürnä Protein Smoothie ga z näh, dört vo geschter ir „Urbanjuice + Eatery“. D Fii het nomal dr glich gno „Powerline“ u d Evä „Dreamslicer“. Mier hi so Glück ka wills gad am 4i zueda het u mir no knapp nach de 4e ine si. Sie hi aber nüt gsit u üs normal bedient. Ersch speter het d Fii no sone Power Shot wellä, wo si frisch mache u den heter gsit, dass sie d Maschinene gad abgstellt u putzt hi wills am 4 zuedued. Äs het ihm mega leid da aber mier si froh xi, himer überhupt no öpis übercho will mier äxtra 40 Minutä dört härä gloffä si für das. Churz vor dä halbä 5 simer zrug gloffe u am viertel vor 6 Dahimä xi, hi hurti duschet u när scho umi witer ga ässä am 18:15 iz Resti vom erschtä Abä - „A-Roi“. Äs isch umi sooo fein xi u dasmal himer z viel gässä. Mier hi zum erschtä Mal „Wagyu“ Flisch gha als Negiri, 2 Stück hi 25$ gchoschtet aber inkl. gströitem gold drüber (mier hi dr Pris ned gwüsst süsch hetemers älwä ned gno, aber äs het sech definitiv glohnt!). Was üs mega gfallä het isch usserdäm, wie dr japanisch Choch mega für z Sushi machä läbt! Das hetmä gmerkt u är het dä anderä de o über d Schulterä guget, dass sis ja richtig machä. Ihm schiints wichtig z si, dass es guet wird. D Chällnerin vo ismal isch o da xi, het üs erchennt u sich wie mir ou drüber gfröit enand z gseh. Leider isch sie dä Abä ir Chuchi beschäftigt xi u ned am serviere aber het üs fürs „Hallo“ sägä, hurti d Vorspies bracht. Am 19:15 himer gässä gha u si churz him u vo dört us när id Stadt zrug. Uf die 19:45 si mier abgholt wordä für id Stadt u si dört im „Roberts Western World“ ga Musig lose u es Bierli kille. Eich hetemer i „Tooties Orchid Lounge“ welle, dert wo dr Willie Nelson isch gross worde. Aber mit Rucksack het üs dr Türsteher ned ineglah. D Evä het de gmeint, dases sis Päch isch. Am 21:00 simer gange u chly umegloffe u am 21:45 i di nägschdi Bar, mitere Blues Liveband. Es isch gueti Musig gsy, optimal für d Fii u für d Evä chly zu rockig. Si häti chly meh öbis i Richtig Whiskey Blues wöue, wesi scho dä Gruch vo Fii’s Getränk mues ushalte. Am 23:15 simer gange, no chli umegschlenderet ir Printers Alley u no ar Fii ihre Burger im ACME wellä holä. Leider hets 30 min vor Ladeschluss scho Ladeschluss gha. Mir si halt när gange und am 00:15 Dehime xi. Mier hi üs no bim Flug fürä nägschtä Tag icheckt für uf New Orleans u si is Bett.
Üses hütigs Highlight: Jogge im Centennial Park
26. JULI 2024
DAY 10 - NASHVILLE, TENNESSEE
Hüt simer gmüetlech no im Bett glägä bis 09:30 willmer guget hi wimers mache, da üsä Flug uf New Orleans verschobä wordä isch uf 16:00 u mier dür das no Zyt gwunnä hi. Es verschiebt üs so viel Flüg irgendwie. Mier hi äxtra d Flüg passend buechet mit dä Zytä für möglechscht viel usezhole i dene Stedt womer si aber gäg die Amerikanische Airlines, si o mier 2 machtlos. Ä Duschi, hurti packä u am viertel vor 11i nomal i das coolä Kaffi vom erschtä Morgä (Honest Coffee Roasters), het üs für die Zyt glängt. Mier hi ifach es Kaffi „TOGO“ gno u d Fii isch Fan vom Kaffii aber o vom Spruch uf dä T-Shirts wo si verchufä „Integrity matters“, z Design het sä o agsproche u hets gad kuft. Dr Kaffii isch bishär ifach wük dr beschd… naja bis Portland sicher mal. Mitem räscht vor Zyt simer no a Farmers Market gangä, dört simer am 11:30 acho u si dür die verschiedene Stend dürä. Äs het wük sehr viel verschiedeni Sachä gha u mier si froh xi, het das no i Plan passt. Vo Flisch, Gmües, Frücht (ja.. sogar mal gsundi Sachä), Töpferets Züg, Honig, Eier, Kaffii, Gebäck etc. hets alles gha! Näbedran isch no ä „Food Hall“ xi vom Market u dört himer nachem gsündischtä Stand usschou ghaltä - Koreanisch! Da himer üs ä Rice Bowl mit Beef für d Fii und Chicken für d Evä gönnt. Bi beidem hez viel Gmües u Eier gäh derzue. Äs isch würklech super fein xi und mier hi beidi miteme gsättigte Gfüehl chöne witergah. Äs wer ke Farmers Market us Nashville, wenns ned o ä Tasting Stand für Whisky gäb oder? Da het d Fii natürlech müessä probierä u sich fürä Whisky mit „Maple Syrup“ (Ahornsirup) entschiede u no chli mit dä Verchüfer gschnuret.
Üses Fazit vo Nashville: Mier hi üs äs richtigs Western Dörfli / Stedtli vorgstellt und si dahär chli enttüscht xi vo däm Tourismus Ghetz am Broadway irä sehr modernä Grossstadt. Sie "hate" hie underschwellig gäg Memphis, will sie sich für die besseri Stadt haltä u das het üs ned so sympathisch dünkt (u äs stimmt ifach o ned, vor allem im Bezug uf d Musig). Nashville chamä machä als Zwüschestopp aber hetmä de o schnäll gseh (wemä üs 2 fragt), mier his ned scheisse gfundä aber mier müesstä ned nomal unbedingt dört hi. Üses Highlight hie isch ganz klar z Jogge im Park xi.
REIS NACH NEW ORLEANS, LOUISIANA
Scho gli isch 13:00 xi u für üs ischs Zyt wordä zrug is Airbnb z fahrä für üses Gepäck abzholä. Dr Jon, üsä Lyft Fahrer het üs vom Market gholt, id Morena Street gfahrä u de no gad gwartet für üs a Flughafä z bringä. Scho am viertel vor 2 simer trotz chli Verchehr am Flughafä acho. Nachdäm mier z Gepäck ufgäh hi, himer nomal üse #1 Smoothie Maker gseh am Flughafe „Urbanjuicery & eatery“, da hi mier ned chöne verzichtä. Leider hez dr Proteinsmoothie vor Fii ned ka, da z Agebot am Flughafä chli igschrenkter isch als ir Stadt. Da hi mier beidi dr „Dreamslicer“ Proteinshake gno. Am Gate himer chli am Blog wellä schaffä, dr Text wer scho lang fertig aber d Fotos fehlä. Die hi mier ned chöne ladä will z WLAN bishär fasch überall u schwach isch xi, so o am Flughafä - Sorry! Mier hi üs halt um anderi Sachä kümmeret u fasch dr Flug verpasst. De simer äxtra z früeh am Flughafä u när hez üs glich fasch umi wie uf dr Rückreis im 2019 vo Fiji. Im Gägäsatz zu den hi mier, also d Evä dasmal kört wi sie üs am ufrüefe si xi. Am 15:40 simer ufgrüeft wordä u ini gsecklet. Mä het sich ä Platz chöne ussueche, egal wo! Das himer no nie erläbt birä Airline (Southern Airways). Das isch zerscht Mal xi wo dr Flug o mal pünktlech gange isch, obwohl mier dr Flug ja eich ender hette gha (13:00). Natürlech het d Evä wie immer pfuset u d Fii ned. 2 Minutä vorem landä het d Fii gmerkt, dassmä chönt Filmä gugä über z WLAN vor Airline, het sä agschissä, dass sis ned ehnder gmerkt het. Glandet simer am 17:20 in New Orleans miterä Rap-Ilag vom Pilot. Mier hi ned vil verstande was är gsit her, wills wük meh nach rappe tönt het aber mier nämä ah, dasser üs Willkomme ghissä het in New Orleans. D Landig isch übrigens no erwähnenswärt wills so cool het usgseh mit dä ganzä Sümpf undedran! Äs het sogar ä Freeway gha übere Sumpf! Da simer also endlech acho im lang ersehnte „NOLA“. Im stockfiischterä u nassä New Orleans, hie het Wältundergangsstimmig gherrscht! We dr Flug mal ned Verspetig het, dehalt z Gepäck! So himer chli lenger müessä wartä u si am 18:10 mitem Airport Shuttle diräkt id Stadt für numä 2.50$ pro Person (40 Minutä Fahrt). Ä Lyft hetemer eich zersch wellä nä aber mä wer numä 10 Minutä schnäller u es hetti 40-60$ gchoschtet. Bim Häräflug het d Fii no gseh, dasses ä Warnig git ir Stadt für „Sturzfluet“, isch o kis Wunder so wie das het mögä schiffä! Mier si am 18:50 ir Stadt acho u hi fürä Räscht no ä Lyft gno ufgrund vom Unwätter u mier beidi Schueh hi anka wo gad komplett dürnetzt werä xi. Üsi Lyft Fahrerin isch mal Managerin xi vome Stripclub, was mier cool gfundä hi wills mal öpis anders isch als di übleche Brüef. So simer schnäll u einigermassä trochä im Hotel acho.
NEW ORLEANS, LOUISIANA
Mier hi sofort chönä icheckä u si iz Zimmer - WOW! Was fürnes Zimmer! Das isch riesig und meh ä Suite xi. Ds Badzimmer isch scho öppe so gross xi wi üses Hotelzimmer in New York. U z Bett isch wahnsinnig bequem xi, mier si richtig happy mit däm Hotel! Scho bim inäluufä het üs ä riesige Saal erwartet u alls so gross, dasses sogar im Hotel sälber mehreri Gebäude het u Rollstäggi etc. Was no z beschdä isch xi: gad gägäüber vo üsem Zimmer isch z Fitness xi, die kenne üs! Im Zimmer sälber hez nem die Schilder ka für ad Türä z henkä wo drufstit ob öper z Zimmer söll mache oder mä ned wot gstört wärdä. Sondern ä Chnopf wome het chöne drücke, ob Room Service oder Privacy gwünscht isch. När lüchtet usenache bir Tür uf, was dr Hotelgascht möcht. Wi genial?! Die hi öppä gwüsst, dass d Fii chunt.. z New York hi aller usser mier sones Schild ka im Hotelzimmer u sie het när halt ifach das vo dä Zimmernachbarä gno u a üsi Tür ghenkt. Will d Evä müed isch xi u nem so het usemöge, himer üs entschiede öpis z bstelle u im Zimmer z ässä. Usserdäm hi vili Restis scho zueka. Äs isch bis uf Nashville scho fasch Tradition, dass mier nöime achöme u öpis vom Taco Bell ässä. Also himers hie o so gmacht, d Alternativene hi üs usserdäm eh ned agsprochä. Ufem Wäg id Lobby für ga d Bstellig entgägä znäh, isch üs ä Frou begägnet wo mier nätt begrüesst hi aber sie het gar ke Bock ka u üs nume aguget. Womer zrug is Zimmer si, isch sie üs nomal begägnet u het üs mega lieb „Hey!“ gsit. Vermuetlech het si o Bock ka uf Taco Bell u ghofft, sie bechunt öpis ab? Da mier so Platz hi im Zimmer u Bad hi mier üs entschlossä das o z nützä u si uf z Brünnli ghocket im Badzimmer u hi dört zämä üser Nacho Fries verdrückt, Tacos u Burritos zum Znacht gässä. När het d Evä chli müessä chillä u nem uf oder furt mögä. D Fii isch därum no ihri beide Choreos ga üebä u aschliessend no ga dehnä bis nach de 1 ir Nacht. So isch üsä Tag de o z End gange u mier si is bequeme Bett ga pfusä. D Fii isch zwar dürä xi aber het Stundelang ned chöne ischlafä u isch 10x ufgstandä ga dr Spion abchläbä vor Tür wills z häll isch xi, het ä Techi vore Türschlitz da, ds Bad zueda wägem Lüftergrüsch etc. Sie het ke Rueh gfunde irgendwie u d Evä het zum Glück guet chöne pfusä.
Üses hütigs Highlight: Dr Farmer's Market in Nashville und Tacos im Bad vo üsem wunderschöne Hotelzimmer z'ässe
27. JULI 2024
DAY 11 - NEW ORLEANS, LOUISIANA
D Evä het super gschlafä u isch früeh ufgwacht. D Fii het scheisse gschlafä u isch de wachwordä vor Evä aber het no ned ufmöge. Nach no chli kuschlä u sogar ä Massage het o d Fii de mal öpis vom Tagesliecht wellä wüssä u mier si am 11:30 uf u ab ga duschä. Die Duschi isch ifach dr Hit u bietet öppe Platz für 7 Lüt! Also perfekt für aller wo gärn z zweit duschä oder o einzeln, me cha no Gescht iladä sogar! Am 12:30 isches losgange u äs het so richtig grägnet därum isch üsi erschti Mission vom Tag xi, Schueh für d Evä chufä für Hudelwätter! Därum isches o i däm Moment miteme Lyft richtig „Riverwalk Outlet“ gange. Ä Mall direkt äm Mississippi River. Üsi Fahrerin isch zwar nach Fii‘s Erkundigung ke Sängerin xi aber sie het ufem ganzä Wäg zum Radio mitgsungä u het ned nume dr Text vo jedem Lied uswendig chöne, sondern o no richtig guet gsungä! Öppe am 1 simer acho u hi zersch es Kaffi gno im „Café du monde“, was berüehmt isch für ihri „Beignets“. Das si ä Art frittierti Doughnuts i quadratischer Form, lut ihrem Beschrieb. Für d Fii hez gar nüt mit Doughnuts z tüe u isch ned iverschtandä mit där Beschribig. D Evä meint es isch e Art Berliner, o das gseht d Fii anders. D Evä hets no gärn u derzue trinktmä klassisch äs „Cafe au lait“. D Fii het paar Bissä probiert u derzue ä schwarzä Kaffi gno. D Fii heti lieber öpis gsunds wellä zmörgelä aber da hez nüt gä. D Evä stört sich ned mal abem Puderzucker wo älwä äs halbs Pack drüber gströit wird. Das isch eich meh äs Puderzuckertäller mit Beignets. D Evä isch richtig Fan dervo u äs erinneret sä a früher ad Feriä in Frankriich. Ufzmal wird „Happy Birthday“ gsungä am Tisch näbä üs u d Fii isch voll im Element u macht mit u applaudiert. Sie findets cool, dass ir USA alli mitmache bi fremde Lüt wome ned kennt. D Fii isch no schnäll uf WLAN Suechi, dassmer hette chöne google welli Lädä, dasses no git. Da het sie 4nä Rollstuehlfahrer d Tür ufgmacht für is Ichufszentrum u dänä hez fasch einä gäh, dass da öper d Tür für sä ufmacht, dermit sie ini chönä. Sie hi sich mega bi ihrä bedankt und ihrä gsit was sie fürnes riese Härz het, dass si gsägnet wird usw. Dr Fii hez drufabe o schier inä gäh, dass ihnä das so viel bedüdet het u het gar ned richtig gwüsst was sägä will sie ja nüt ussergwöhnlechs gmacht het u das ja sälbschtverschtendlech isch. Witer simer de när ga gugä für d Schueh u das isch mit dr Evä ä churzä Chut xi. Mier si i erscht Ladä u i wenige Minutä dr für sie Usserwählt Schueh gfundä! D Fii hetnä scho entdeckt ka u o mega Gfallä dran gha u sich gfragt wieso d Evä nüt zu däm het gsit, wills ihrä Style isch. Das het si ar Evä wellä sägä u glichzitig het sinä gad sälber entdeckt. Mier hi beidi so Früd gha, dass sich beidi es Paar kuft hi. Ab iz si d Schwiizer G’s im Partnerlook underwägs i dä Staatä! Mier si no i die anderä Lädä ga schnöiggä aber hi nüm kuft oder gfundä. Drum simer witer am halbi 4 z Fuess id Fulton Street. Das isch ä mega cooli Strass mit cooler, farbiger Architektur und überall äs härzigs Beizli. Am viertel vor 4i simer iz „Cochon Butcher“ wo beliebt isch für ihri Flischware und Sandwich. D Fii chunt in NOLA älwä chli drunder mit dä Sandwich, da sie ned so Fan dervo isch, o wider us Fuulhit. Sie het zwar gärn Brot, Burger, Sandwich etc. aber us Fuulhit isst sis sältä, wills doof isch zum ässä. Tja.. beidi himer äs „Smoked Turkey Sandwich“ bstellt mit Avocado drin. Soooooo fein! U ned mal ungsund xi, so wi sis zueberitet hi. Perfekt! Übrigens het natürlech es wiiters „Sour beer“ müessä testet wärdä u dasmal is mit Mango, Tangerine u Rüebli. Äs isch viel besser xi als es usgseh het. Am halbi 5i isches scho zrug gangä Richtig Hotel u äs het zu Fii‘s aber ned Evä‘s Vergnüegä afa rägnä, i Strömä! Ds Beschdä dran isch ifach no wills so hiss isch xi! D Fii liebt die Konstelation extrem u isch so glücklech xi, si brucht ned vil! Sie isch gredi usi i Rägä gstandä u hets ifach gfüehlt. D Evä hets am Schärmä usgharet u isch froh xi, dasses immerhin warm isch. Speter simer äs Kaffi ga nä iz „Gospel Coffee“. Witer ischs gangä aber no ned iz Hotel wimer denkt hi sondern id „Bourbon Street“, das isch di beliebtischti Strass in NOLA, öppä so wi z Nashville dr Broadway isch xi. Äs isch so cool xi wills i jederä Bar umi Livemusig gä het, hie meh Blues, Rock & Jazz als Country. Usserdäm hez verschiedeni Strassäkünstler gha, vor allem Zouberer. D Stadt isch bekannt für die Magic Shows und was üs aber gfallä het u mier ä zytlang zueguget hi, si Tänzer xi wo 2 Lüüt ifach zu 2 Lieder vortanzt hi u d Touris mitgmacht hi. Äs isch cool xi u ds Lied luft üs immer no nachä (Flex-Cupid). När hez no ä Hip Hop Choreo gä, was mier dört definitiv ned erwartet hi. Churz vor dä 20:00 simer acho im Hotel u hi chli chillt. Am 21:45 simer iz Fitness ganes Workout machä u his für üs ellei gha! Ab under d Duschi u när simer i Usgang, los simer am 23:45 u hi ä easy Lyft Fahrer gha, bis ar Fii ufgfallä isch, dass dä am Alkohol suufä isch! Sie het öpis wellä sägä aber mier si zum Glück gad acho und am 00:00 sicher ir Frenchmanstreet acho. Das isch ned ä grosse Ort aber es het so um die 5 Bars, 2 Fastfood Lädä, ä Shop und jedä Abä bis Mitternacht ä Kunstmärit. Dürä Märit himer hurti derdür wellä aber sie si am ufrume xi scho u de himer glost i welli Bar, dass es üs am mischtä zieht. Das isch d „Spotted cat club“ xi mit Blues Livemusig. Dört het d Fii d Entdeckig vom Jahr gmacht! Äs Bier wo si gfragt het obs es „Sour Fruit Beer“ isch, wills so tönt het (Rocket pop sour) u sie het zersch dörfä ä Schluck probierä, mega cool vom Barkeeper! Sie hez diräkt gliebt u das bstellt. Das Bier schmeckt nach blaue Himbeeri, Chirschi und Limettä. Äs isch ihrä klar Favorit und d Evä het z „Ostern east cider“ gno wo o ä liechtä fruchtigä Gschmack het ka. Z Bier vor Fii chunt sogar no necher a ihres Lieblingsbier us Portland „Hunter 75“ härä als das ismal! Für beidi Bier zämä himer inkl. Taxä u Trinkgäld 21$ zahlt! Mier hi hunger becho nachem Workout und lenger nüm gässä, z inzigschtä dört wos het gha isch dr „Willies fried chicken“ xi, süsch hez nüt ka oder isch scho zue xi. O die si churz vor Ladäschluss xi u hi scho afa ufrumä u putzä. Mier hi ifach öppis gno für, dassmer ned müessä hunger liidä u sie hi üs älwä o genau i däm Sinn zuebereitet… ds Dessert (äs Chüechli) wo inkludiert isch xi im Menü, hi sie üs uf d Pommes Frites u Chicken gschossä. Guet.. Satt simer xi u chli agwiederet vo däm Lädä o aber sisch numä Mittel zum Zwäck xi. Zrug id Bars womer zämä tanzt hi zur Livemusig. Da d Fii nüt cha usser Bachata, het sie Bachata gfüehrt us apasst uf d Musig, äs het super klappet! Sie het sich när aber sogar getrout ellei z tanzä zu Blues & Jazz ohni öpper u d Evä meint es higi sogar guet usgseh! Will mier no äs Getränk hi gha vor vorhärigä Bar hi mier das ned dörfä ini nä u vordran tanzet gha. D Band het mega Früd gha a üs u ging usi guget wimer tanzä. O dr int Maa het üs ussä zueguguged gha u gsit, dass mier 2 so schöni Frouä sigä. Da het d Evä zu ihm gsit, dass mier äs Päärli si u de simer ned numä schöni Frouä sondern o äs wunderschöns Päärli xi, het är duä gmint. D Fii isch Fan wie d Evä cha tanzä, richtig talentiert und so schön zum zue gugä! Zämä hi mier dr coolscht Tanzusgang i üsnä über 7 Jahr Beziehig gha!! D Bar het übrigens „Apple Barrel“ ghissä. Nachem ledschdä Song vor Band hi d Lüt öpis grüeft (wahrschiinlech „Zugabe“), mier hi aber beidi öpis anders verstandä. D Evä het „Hardcore“ u d Fii „Arnold“ verstandä. Drum het sie o random „Arnold, Arnold, Arnold“ afa id Mengi rüefä. Ir USA ki Zuegab, we fertig isch, isch fertig! Mier si alls himgloffä über d Bourbon Street u ufzmal hi ar Fii ihri Bachatasensor-Ohrä Alarm gschlagä! Vo irgendwo här ertönt Bachata! Leider hi mier nem i Club inä dörfä will sie „zuetüe“. Sie het mit dr Evä gad vorussä wellä afah tanzä, da chunt scho ä Typ usem Club wo mit üs beidnä glichzitig het afah tanzä u d Fii het sich so gfröit aber anders als erwartet het är dr Grundschritt ned mal chönä u de himer ghört u mier hi für üs wellä tanzä, da chunt är wider u d Fii hetnä dasmal klar wägdrückt u klar gmacht, dass mier ellei chöi tanzä. Äs het Spass gmacht aber irgendwenn ischs dr Evä nem wohl xi i all dene Lüt u mier si witergloffä. nach de halbe 4e simer Dahimä xi (ca. 40 Minutä z Fuess). Mier si ja gad näbem Fitness u hi ghört, dass dört öpis vor sich git… da isch d Fii ga gugä u äs het öppä 10 Jugendlechi drin ka wo am Pommes Frites u Chicken Wings ässä si xi u ä huerä Party hi ka! D Fii sit numä so „Party!!!“ u sie si erchlüpft. Mier si umi gangä u da het üs dr int älwä wellä iladä aber das isch üs de zu uncool xi. Mier altä Plegerä si iz Bett.
Üses hütigs Highlight: Für üs beidi die nüije Schueh und dr coolscht Usgang, womer je zämä gha hei! Plus für d Fii no z "Rocket Pop Sour" Bier
28. JULI 2024
DAY 12 - NEW ORLEANS, LOUISIANA
Am 10 uf ga duschä u am 10:30 los für zum River. Äs git nämlech äs witers 1/7 Gschenk für d Evä zum Jahrestag no, nämlech ä „Jazz Cruise Brunch mit Liveband“ ufem Mississippi River. Z Boot isch übrigens is vo dä eltischti Dampfschiff xi. Chum simer dört acho hez äs Fotoshooting gä u z Check-in womä gmacht het. Äs isch alls schnäller gangä als erwartet und so simer de gli bir Täschäkontrollä xi. Das isch umi is sehr fragwürdig xi und wemer hettä wellä, wer das Schiff id Luft! Öpis nach dä 11 himer boardet und üsi Zyt fürs ässä isch am 11:30 xi also simer scho mal ga aschtah will mier da derzue si avisiert wordä. Nach lengerem aschtah hi si üs de gsit, dass mier ersch am halbi dran si u den nomal söllä cho. Also si mier uf ds Deck ga Platz nä u d Sunnä gniessä. Gli isch halbi xi u de simer achi u hi due dörfä Platz nä. Dr erscht Idruck vom Brunch Buffet isch weniger guet xi als erwartet. Mier hi üs öpis ufs Täller gladä u churz druf, öppä am viertel vor 12 simer losgfahrä. D Band isch zwar die ganz Zyt da xi aber het ersch 30 Minutä speter afah spielä. Das hi mier üs chli anders vorgstellt, normalerwiis isch das ar Fii glich aber sie het das als Gschenk für d Evä wellä u chli öpis anders erhofft. D Evä hez aber glich cool gfundä u chönä gniessä. Sie isch zfridä xi u da het sich d Fii o chönä entspannä. Orangäsaft kennä d Amis ned bimnä Zmorgä / Brunch u das heti zuesätzlech gchoschtet. Mier hetä das gärn zahlt aber womer erfahrä hi, dasser ned frisch presst isch u öppe no mit Zucker, himers due lasi. Äs isch alls ä chli speziell xi aber mier hi z beschdä drus gmacht. Üsi Serviererin isch super fründlech xi u het o gsit we mier öpis z trinkä wi, sölle mier de wartä uf d Servierchraft… öh okay. Isch nie öper cho u das hi mier ihrä gsit will mier gärn äs Kaffi hettä ka. Da isch sies öperem ga sägä… komisches System. Sie serviert üs Wasser (isch immer umi cho gugä obmer no hi), öper anders alli anderä Getränk. Nachem ässä simer umi uf z Deck u hi d Fahrt ufem Mississippi River u dr schönä Sicht uf NOLA gnossä. Gäg z endi vor Fahrt hez due nomal ä Jazz Session gä u d Fii isch voll abgangä derzue. Ihres Talent: dumm umätanzä. Zum Schluss ersch himer tschegget, dass sie d Showilag für sämtlechi im Resti hockende Lüt isch xi. Die hi nämlech dört dür d Schiibä gseh wo d Band gspilt het inä u d Fii isch genau vordran xi. Wos richtig Land isch gangä het das Dampfschiff no chli Dampf abglah u zigt wases druf het! Mier si heil acho und sie hi üs ds Foto vom Afang wellä verchufä für 38 $, das hi mier abglehnt. Mittlerwilä isches 13:30 xi u ar Evä isch im Magä / Darm ned so guet xi drum simer schnäll miteme Lyft zrug iz Hotel. Dört acho het sie sich chli erholt u d Fii üsi Wäsch sortiert. Mier hi iz Fitness wellä aber das isch am Bodä voll mit Pommes u Chicken xi vor Party ledschd Nacht. D Fii isch das ar Rezeption ga sägä u de simer när zämä ga trainiere u derzue no 2 Maschinene Wäsch überta. Das isch üsä erscht Wäschtag xi uf derä Reis. Nacheme usgiebige Chrafttraining u erledigtä Wäschämtli, simer ga duschä u am 18:40 los mitem Lyft zum „St. Roch Market“ für z Znacht. D Fahrt dört hi isch richtig cool xi mit Graffiti uf beidnä Strassäsiitenä. Richtig coolä Graffitis wo wük kunstvoll gmacht si und vieli o ä Botschaft z vermittlä hi. Nach lengerem suechä himer üs dört füre Ägypter entschiede will dä am gsündischtä isch xi. Är het üs äs super feins Znacht gmacht u mier hi am viertel vor 8 scho umi witer chönä z Fuess bis am 20:30 womer när ire Bar si acho wo schiinbar die beschdä Bartender vor Stadt het, emel am Sunntigabä we si chöme cho chillä nacheme hertä Weekend. Die Bar hisst „Bar Tonique“ und mier hi zwar gseh, dasses uh vil Uswahl het aber niene ä Beschribig was drin isch. Usserdäm: Äs isch fiischter xi dört inä mit wenigä Cherzli, was üs schön dünkt het abers schwirig gmacht het d Chartä z läsä, zum Glück giz Handys! D Beschribig het glich gfehlt, därum isch sich d Fii ga erchundä bim Barkeeper u sich fürä Cocktail „The last word“ entschlossä. Leider het är ihrä ned gsit, dass Ingwer drin isch. Das nimmt d Fii nämlech numä churz vorem Halswehtod. Sie het dr Drink ned gärn gha u i grosse Schlück achägleert. D Evä het ging wi ging dr „Amaretto Sour“ gno u ned mega gärn gha aber chli meh gnossä. D Fii het halt öpis nüijs wellä probierä aber äs isch ned ihres xi. Was üs aber cool dünkt het isch, dass dr Barkeeper d Drinks gmacht het u üs ifach zuegrüeft het „yoooooo!“, dass si fertig si. Am 9i simer us därä Hundzverlochetä usi richtig Bourbon Street.
Ufem Wäg dört härä himer zersch ä Typ gseh wo uf sim Outo am grillierä isch xi und speter himers schier ned glubt.. da luft tatsächlech ini näb üs verbi i die nägschdi Bar u was het sie uf dr Schulterä?! …. ä Schlangä! Üses Ziel isch d Bar „Fritzels Pub“ xi wos Live Jazz het gä. Inä hets usgseh wie irä Chilchä willmä bim hockä so Bänkli het gha miterä Halterig vordran. Mier his cool gfundä, mal öpis anders und d Band isch super xi! Derzue het sich d Fii mal amene „Old fashioned“ usprobiert, wo sie no nie het gha u si Ursprung us dr Nechi vo New Orleans het. Är isch sehr fein xi u sie het sich dä ganz anders vorgstellt, meh so trochä u starch. Dr Orangeschnitz drin het aber eher nach „young“ u „fresh“ gschmeckt als „old“. Sogar d Evä het ä Schluck probiert u gärn ka. Am 10i simer gangä u are altä Apothek verbi cho wo natürlech zue het ka aber richtig so usgseh het wie i dä altä Filmä, we sie ä Apothek vo innä zigä. Äs het ganz alti Möbel no ka u älwä ned mal Internet dört in. Womer ir Frenchmanstreet si aglangt, himer d Bar vom Vorabä ufgsuecht u nach paar Songs am 11i witer iz „Apple barrel“, wo für d Fii Rockmusig isch cho irä Bar, chli too much für Eväs Gschmack. Hurti vorusse xi, isch ä Obdachlosä d Fii cho fragä für öpis z Ässä. Sie isch mit ihm ids nägschtä Resti u het ihm Spies u Trank wellä chufä. Sie het ihn gfragt, was är de gärn möchti u de ischs ihm älwä ned Rächt xi u sie het ihm versuecht z versicherä, dasses kes Problem isch u är sich ruhig öpis darf usläsä, was o immer är möchti, sie zahli ihm das gärn. Irgendwie ischs ihm z lang gangä zum wartä u isch usi gangä… okay. Mier hi üs hüt am 23:45 la abholä u si am 00:00 Dahimä xi u ga pfusä. im Bettready machä, het d Fii bemerkt, dass sie die falsche Tageslinse übercho het. Sie het den nume dr Lieferschin kontrolliert u ned alls möge ufdue will sis gad so het ipackt für z reisä. Ufem Liferschiin hez gstummä gha u sie isch sit 15 Jahr Chundin dört u es het nie ä Fehler gäh drum isch sie da sehr zueversichtlech xi u hets ned gneuer kontrolliert. Das si de Problem vor Zuekunft u mier si ga ligä.
Üses hütigs Highlight: D Strassä bim "St. Roch Market" für d Fii und für d Evä d Fahrt ufem Dampfschiff mit Live Jazz Musig
29. JULI 2024
DAY 13 - NEW ORLEANS, LOUISIANA
Chum simer uf am 10i het d Fii gad abgklärt was sie wägem Linsäproblem chönti machä u a Fielmann äs Mail gschribä. Das chönti z lang gah u drum het ihri Schwo dört aglütä u d Situation erklärt (Danke vil mal). Ir zwüschäzyt himer üs parat gmacht und am viertel vor 12 zur Hüttä us uf Bananä suechi. Das hi mier i wenigä Minutä gschafft u gmerkt, dass mier üs sölltä icremä will d Sunnä umi mal öpis vo üs u NOLA wot wüssä. Safety first u witer ischs gangä is „Café Beignets“, was ä richtigä Reinfall isch xi. D Fii het das scho gspürt u gar nüt z Zmorgä gno usser ä Orangäsaft u Kaffi. D Evä het sich aber soo fescht uf ihri Beignets gfröit u näbeme Kaffi es paar bstellt. Dasmal hez no meh Puderzucker ka als ismal im Riverwalk Outlet. Sie het 1 abegwürgt, will wük fein si die o ned xi. Dr Kaffi isch vil z hiss xi bi beidne u mier hi nach 15 Minutä wartä, ke Bock ka üs ar Zungä z verbrennä u his lasi. Mier hi aber denkt, dass miers ja chönte spendä anstatt la stah. Mier si witer u hi üser Kaffis u Beignets amne Obdachlosä gschenkt, wos gärn entgägä gno het. Next Stop isch z „French Quarter“ xi wo mier ä Tour gmacht hi für üs u ca. i 1h düregloffe si. Äs isch ä so wunderschöni Gägend mit Architektur usem frühere NOLA! Wük i jederä Farb hez Hüsleni gha, überall Pflanzä oder äs Gärtli ufem Balkon / vorusse und ifach alti Wend, Türe und Fenschter. Mega stilvoll u charmant! Churz vor dä 2 himer hunger gha u öpis wellä ga Zmittagnä. Ismal womer si ga spazierä himer äs schöns Resti entdeckt. Äs isch z miz ir Stadt aber me muess zersch dürnes Gässli u när hez ä wunderschöne Gartä mit Liechterchöttene, Springbrünnä, Büüm und ifach mega romantisch! Mier hi nacheguget wo das gnau isch u si i däm Moment 15 Meter dervo entfärnt xi u si dört härä. Chum z glubä aber äs het i däm Moment ä Jazz Brunch gäh u da simer natürlech gärn gangä. D Uswahl, d Bedienig, z Ässä, ds Ambiente… alls wük alls isch besser u gspnder xi als dä Brunch ufem Schiff. Mier hi so chönä zueschlah u endlech umi mal Gmües u Salat chönä ässä so viel mier hi wellä. Alles isch frisch xi, sogar Flisch hi si gha u Bratä. Kaffii si si immer cho nachäfüllä u allgemein si sie üsserscht ufmerksam xi. Ds Resti hisst „The court of two sisters“ u mier hi scho ä endlos türi Rächnig erwartet aber nä ä.. pro Person mit meh als 20% Trinkgäld öppä 49$! Da chame absolut nüt sägä! Igtl. hettä mier umi richtig Hotel wellä aber ufem Wäg dört hi het üs ä Livenand i Bann zogä u üs vom 14:45 bis 16:30 ir Bar feschtghaltä. Die hi richtig geile Blues spilt u dr Sänger hez abartig gfüehlt. Ir Bar hez inä ka wo d Evä zum tanzä isch cho ufforderä u isch aber mega bsoffä xi u bim verlah vor Bar de no schier im Küder glandet, willer i Chübel ini gloffä isch. Das het d Evä a sinä Füehrigskünst scho vermuetet und därum ned all zu lang mit ihm tanzt, är heti mit ihrä drum uf d Bühni uechi zur Band wellä.. wär d Evä kennt.. kennt d Evä. D Evä het vor Band no ä CD kuft. Mier hi ir Bar no „Abita Brandstand“ Bier entdeckt, kes Sour aber es super Lager Bier! Wo mier am 5i zrug si xi himer üs zwäg gmacht für i Pool ga z badä womer im Hotel hi ka. Dört isch super hiss xi und mier si vo 17:30 - 19:15 chli dört ga plütterä u ga badä. Nächhär isch no ufem Programm gstandä, d Flüg i z checkä für am nägschtä Tag u duschä. Mier liebes hie z duschä mit so viel Platz! Dr inzig Nachtil isch, dass nie chalts Wasser chunt, ar Evä scheiss egal aber ar Fii ned will die Spinnmoorä gärn chalt duschet (gseht sie äch deswägä no us wie 16i?!). Üse Lyft Fahrer het üs am halbi 9 nomal zum Butchers Cochon gfahrä, womer das feinä Avocado Sandwich hi ka. Übrigens isch üs hie ufgfallä, dass aller männlechä Lyft Fahrer vo NOLA kes Wort redä. Die wiiblechä hingägä schnurä eim zuä als gebs kes morn! I dä anderä Stedt isches nie so xi, da hi aller gredet. Dasmal himer üs obwohls mega fein isch xi, für öpis anders entschidä, ir Hoffnig es git nomal sones Spitzämenü! Leider isch z „Pork Belly Sandwich“ vor Fii weniger fein xi als z anderä. Sie hez sehr gärn ka aber sie würd z nägscht Mal umi z anderä nä. D Evä het ä Burger gno u isch zfridä xi aber o sie würd es anders Mal umi z Sandwich vom erschtä Bsuech nä. Churz vor Ladäschluss simer am 21:45 id Frenchman Street gfahrä u mier hi ä männlechä Lyft Fahrer ka wo gredet het aber är isch o ned vo NOLA xi, drum zehlts nid! Är het rächt guet englisch chönä u d Evä hetis doch scho lang wunder gno, obs normal isch in NOLA, dass es so viel Rollstüehl het. Mier gseh wük andurend u überall. I ha ihre gsit, dass sie doch ruhig cha fragä u das het si gmacht. Dummerwiis het är z Wort „Wheelchair“ ned verschtandä u üs öpis afa erklärä wäg dä Lyft Richtlinie. D Evä het ihm versuecht z erklärä was sie igtl. gmint het u de heter gmint „aaah okay okay yes!“ u het umi afah verzelle wäg Lyft.. üs hez hinde drin innerlich schier putzt aber mier hi üs zämä gno. D Fii het ihm när o no versuecht z erklärä was d Evä gmint het aber o das het nüt bracht. Är het gsit är wüss ned was ä Wheelchair isch. Är het öpis verzellt wieme die Behindertä mit Lyft dued umefahrä. Da isch ihm d Fii is Wort gfallä wills links vo üs gad umi ä Rollstuehl het gha u sie ihm dä zigt het u nomal erklärt. Är hez ned tscheggt u d Fii het sich müessä häbä u d Evä hez spetistens den putzt wo sie d Fii het gseh zämänäh. Schlussendlech heter de aber öpis gsit, dasses normal sig aber miwr wüsse genau, är hez ned verstandä. Är isch so härzig xi aber und mier hi o mit ihm ä luschtigi u gueti Fahrt ka. Är isch ir USA will sini Schwo hie studiert u no z jung isch ellei z wohnä, drum isch är mit ihrä mit. Sie si aber vo Frankrich ursprünglech. Är het üs verzellt, dasser keni Kollege hie het u niemer kennt und d Fii het ihm empfohlä afa z tanzä. Willme niene so vil u schnäll Lüt kennelernt wie dert. Am viertel ab 10 simer acho u äs witers Mal iz „Spotted cat music club“. Dört hez ä Jazzband gha wo älwä Musig studiert, sie si alli sehr jung xi und d Sängerin het sone krassi Stimm ka! Uf dä Videos chunts leider ned so überä wie in ächt aber mier hi sältä sonä wahnsinns Stimm kört! Richtig chraftvoll! Sie hisst Amber Rachelle. Leider hi d Lüt ir Bar so viel u lut gredet, dasses schad isch xi um d Musig. Die isch när zwenig zur gältig cho. Ir Pousä si mier hurti iz „dba“ düri wo gad gägäüber isch glägä für ar Fii a üsem ledschdä Abä nomal z ledschdä Mal „Rocket pop sour“ Bier z richä. Sie wird gad 3 bstellä, dass sie das no cha usnützä, het si gmint! Voller Früüd u Hoffnig isch sie i di Bar u het bstellt. Är chunt zrug u het ar Fii gsit, dass es ihne usgange isch u sie kes meh hi dr ganz Abä! Da simer gangä u d Fii isch trurig xi, 1 Minutä speter simer aber nomal inä will sie het wellä ga fragä i wellere Bar, dasses das Bier no git. Dr Barkeeper hets ned gwüsst. Ufem Wäg inä hi mier übrigens bim Türsteher d ID umi müessä zigä obwohls max. 2 Minutä här isch xi sit mier die zigt hi ka u jedä Abä i därä Bar si xi scho.. äs het o ke Wartäschlangä ka oder so, dass är i där churzä Zyt umi so viel Gsichter gseh hetti. D Fii het ihm gsit, dass mier die ja gad vor 2 Minutä zigt hi ka aber är hez nem gwüsst. Das isch üs öfters scho ufgfallä, dass die albä ned so äs Gedächtnis für das hi. Vor allem hiz ja dört ned jedä Tag Schwizer ID’s u ganz sicher ned i so churzer Zyt so viel ufnand. Aber das isch ned mal halb so schlimm wie z Bier wo usgangä isch. Tja da het üsi Fii die ganzä Täg älwä z vil vo däm feinä Bier trunkä, dass sie kes meh hi! Mier si när i jedi Bar bis mir zrug ir Bourbon Street si xi, zum abcheckä obs irgendwo das Bier gäb! Leider leider ohni Erfolg. Underwögs himer derfür no beobachtet wie dr int Typ öperem a Charä gschiffet het. Mmmhh fein! Und ä chli unnötig? Ds Gebüsch näbä dran hetis doch o ta. Zrug ir Bourbon himer amnä Obdachlosä Gäld gä u sie id Bar mit Old school Rock / Punk Musig. Hie simer ned lang blibä, meh so fürne Absacker vorem is Bett gah. Chum simer nach öppä 20 Minutäl us dr Bar usä, isch dr Obdachlos womer vori Gäld hi gäh, allnä dr Mittelfinger am zigä xi wo kes hi gäh. O üs het är si mittlerwilä leer Bächer nomal entgägägstreckt, mier si witergloffä u o mier hi dr Finger zigt übercho, d Fii het per Zuefall ono gad inä im Agebot gha. Ä anderä Typ het das beobachtet u üs verzellt, dass är scho dr ganz Tag so am due sig und är o ned wüss wo das Gäld härä git, will Ässä oder Trinkä heter ned gseh bi ihm. Fasch bim Hotel acho himer denkt no ä Bananä z chufä fürä Folgetag bzw. am Morgä. Mittlerwile isch 01:15 xi u mir si inä Ladä ga ichufä wo 24h offä het. Am Morgä NACH dä 1 UNDER dr wuchä!! Mier liebes! Ifach das Feeling, äs isch so d Friihit! Bananä himer aber ned gfundä. Churz vor dä halbä 2 simer acho u hi no so viel Teenies, Chind u Erwachseni gseh wo zämä i Gassene am chillä si… anderi Wält das Amerika.
Üses hütigs Highlight: D Liveband am Nami womer per Zuefall entdeckt hi aber ou d Band am Abä mit dr Stimm vor Sängerin und dr spontan-authentisch Brunch im "The court of two sisters"
Comments