WOCHE 1 - 15. JULI BIS 22. JULI 2024
- EFii
- 17. Aug. 2024
- 44 Min. Lesezeit
Aktualisiert: 28. Aug. 2024
Üsi erschti Wuchä het chaotisch mit Flugverspätig und stornierter Hotelbuechig agfangä in New York. Trotz beeidruckende und aber o enttüschende Momentä, het d Fii i dere Stadt überraschenderwiis d Früüd am Velofahrä gfundä (JA, würklech iz!). Die endlos lengi Reis nach Memphis het üs unvorhärgsehnigi Herusforderigä bracht und speter de o Warnigä bis gfährlechi Situatione womer fasch drin glandet si - und ä unerwarteti Luscht uf Zigarettä. Ä ufregendä Start, wo üs scho früeh Vielfalt und Unberächäbarkit vo üserä Reis ufzeigt het! Viel Spass bim Läsä :)
15. JULI 2024
DI LEDSCHDÄ VORBERITIGÄ
Vom Mentig ufä Dsischtig, hi mier di ganz Nacht packt, d Wohnig usgmischtet, putzt, gwäschä und für üsi Airbnb Gescht vorberitet, wo üsi Wohnig für je 1 Monet wärdä bezieh. Beidi miteme totalä Schlafmanko, nüt richtigs im Magä u ifach ki Energie gha. So hi mir Schichtwis hurti äs Nücki gno. D Fii vom 21:00 - 23:00 u d Evä het vom 05:00 - 06:00 o no hurti ä „5 Minütigä“ Powernap gmacht. Obwohl mir üs vor jederä Reis vornähmä, dass es dasmal ki Stress wird gä u mir drus glernt hi, wüssä mir, dass es glich umi so wird cho u die wo üs besser kennä überraschts o ned :) Das si mier und z positive isch, dass es trotzdäm irgendwie immer funktioniert.
16. JULI 2024
HIREIS
Öppä am 07:15 si mier duä losgfahrä für zur Fii id Budä, wo mir ihres Outo si ga iquartiere und no versuecht hi z Check-in fürä Flug z machä. D App het ned funktioniert, d Websitä nid u de het d Fii dr Laptop no fürägno fürs ä so z probiere. Nägschts Problem: Laptop kaputt!
Dr Laptop wo sie äxtra nomal frisch ufgsetzt het ka für d Reis. Da het üses IT-Girl hurti d Skills uspackt, irgend es schwarzes komisches Fenschter ufta und mit paar Befählä das Züg gflickt. Trotzdäm isch z Check-in ned gangä u dEvä isch liecht i Stress cho. Also hi mir ki anderi Wahl gha als de halt am Flughafä z gugä. Churz nach dä 8ä si üsi liebi Nicole und dr Ayden (Fii‘s Gottäbueb) itroffä und hi üs abgholt für a Flughafä z fahrä. U obwohl mir doch gnuä Zyt iberächnet hi, hets die liebi Chauffeurin älwä chli z guet gmint mit üs und am Blitzer begägnet. Bis uf das und äs bizi Stou bir Verzweigig Züri / Winterthur hi mier ä sehr agnähmi u sicheri Fahrt dörfä ha - Danke vil mal liebi Nicole fürs häräbringä❤️
FLUGHAFÄ
Churz nach dä 10:00 si mier acho und z Check-in ga machä. Da het d Fii doch tatsächlech no d Powerbank usem Gepäck müessä grabä u is Handgepäck duä will das verbotä isch. DFii hets ar Evä denn ned wellä gloubä u denkt so giz gäbiger als dä Chlotz im Rucksack z ha. Chum simer vom Schalter wäg, het dFii stolz grinst „I ha no meh elektrisches im Gepäck, aber äs het mi iz ifach agschissä das o no us z packä“. Üsi Informatikerin het älwä ned verschtandä, dass das ned ganz ungfährlech isch… tja.
Dernach isch d Fii no uf d Bank ga Finanzä reglä u d Evä mitem Ayden u dr Nicole äs Kaffi ga näh. U de hi mier üs o scho müessä verabschiedä vo ihnä 2. Nach dr Security si mier no öpis ga Zmorgä, Zmittag u Znacht (vom Vorabä) ga ässä u zu üsem Gate. D Evä isch am umänärvöselä xi u het angscht gha z Gate dued zue (über 1h vor Abflug…?!) d Fii hez chilliger gno u uf di risigi Wartäschlangä verwisä wo alli scho am schtah si xi, für was wiss d Fii ned. D Evä wer aber o am liebschdä ga häräschtah usem Grund „De chöne mier ender hockä“…genau dä Gedankä het d Fii zwar o gha aber anders. D Fii hockt lieber lang am Gate u schtit de uf wes no so 5 Lüt ir Schlangä het, de ischme mischtens schnäller im Flüger u cha dört o zimli schnäll abhockä, logisch nid? Üsi Bachelor Absolventin findets effizienter lang azschtah, mit allnä glichzitig iz Flugi z quetschä u när irgendwenn z hockä. Für alli wo no niä si gflogä.. loset uf d Fii :) da isch dEvä aber angerer Meinig. Sie isch nämlech no ini vo dä 20 Glückspilzä xi wo gscannt u untersuecht isch wordä u wer dahär lieber früeh los. O hie denkt d Fii, dass dr Flüger glich ned ehnder flügt u mä nid ehnder im Flugi sitzt. Aber merket öich, we dir 4x SSSS ufem Ticket vermerkt heit, de heit lieber kes wiisses Nasepuder drbi ;)
ABFLUG
So oder so.. im Flüger himer definitiv lang chönä hockä, da mier zimli genau 1h Verspetig hi gha. Wieso wüssä mir ned aber halb so schlimm, mier hockä drin und hi alls pünktlech gschafft. Im Flugi hi mier ä Zweier Platz u niemer hinder dran, was sehr cool isch! Was ned so cool isch, dr Schreihals wo ä Reihä witer links vo üs hockt u ned Flugangscht het, sondern ifach dr Tarif dürägit! Äs richtigs New Yorker City Girlie älwä? Mier schetzä sä ca. 2 Jehrig ih und werä öpis ned passt (was sich ir Minutä so um die 2-3x ereignet) schreit si, schleht d Muetter und d Gschwüschterti. Zum Glück si mier beidi usgstattet mit Noise Cancelling Chopfhörer u chömä so oder so zu Schlaf. Dä mitem Schlaf het bir Evä besser klappt als bir Fii, wo dr Schlaf immer no ned findet. Äs isch i däm Flüger aber o trotz Dechinä u kuschlä verdammt Chalt xi. Mier hi halt o ned so Energie ka u si due froh xi, wo z Ässä isch bracht wordä. Mier hi äs feins Zmittag becho: Basilikum-Pesto Chicken-Gnocchi mit Spinet, Gugus Salat, chli Chees mit Knäckis UND amnä Tiramisu! D Fii het klari Prioritä gsetzt u als erschts natürlech z Tiramisu gässä :D Das verwunderet öppä niemer, wo üses Schläckmüli kennt. Vor luter Euphorie wie fein das isch xi (besser als i gwüssne Italiener Restis) het si ar Evä gad chli vom Gugus Salat aglöst (uf Dütsch: usglehrt). Speter het d Evä derfür d Fii mitem Wasser duschet. Mier 2 Tollpätsch föh üsi Reis scho guet ah.
Speter wo mier es feins „Bolognese-Calzone“ hi übercho, ischs witer gangä u d Fii hets irgendwie gschafft, z ganzä Salzpäckli überem Sitz und Tisch z vertilä - Bravo a därä Stell! Im grosse u ganzä isch dr Flug sehr agnähm verloffä, obschons ganz liechti Turbulenzä het ka. Was aber hie no z erwähnä gilt u häbet öich fescht: D Fii het uf däm Flug z erschtä Mal i ihrem Läbä „König der Löwen“ guget. O hie äs Bravo a därä Stell! Sie cha aber ned nachävollzieh werum mä ihrä immer gsit het, dasses äs Skandal isch dä ned gseh z ha. Us Eväs Sicht ä klari Bildigslückä! Speter hez ar Fii zwar ned wellä schlafä, aber chli dösä het si chönä u wo d Evä ufgwachet isch u zur Fii guget het, het sie z Gfüehl ka ä Küdersack hockt näb ihrä. D Fii het sich ipackt u me het no gad knapp dr Nasespitz gseh. Sie het sich aber so fescht zuegschnüert, dass üsä Tollpatsch sich nem het chöne entchnüpplä u us däm Küdersack schlüfä, d Evä isch zur Hilf cho. D Landig isch sehr idrücklech xi, willmä d Skyline het gseh, zwar ned guet aber me het scho ä erschtä Idruck becho wie riesig d Stadt muess si!
16. JULI 2024
WELCOME TO THE STATES!
Chum glandet, surprise: 30-45 Minutä wartä bis mir zum Gate chönä fahrä. Z positivä: üsä chli Schreihals von Nebenan isch igschlafä! Iz sis due 1.5h xi womer gwartet hi. 1h u 15 min agstande für d Immigration u die isch 3-4 min gange aber är het gar ke Bock ka. U d Evä isch natürlich umi verdächtig ufgfallä u het müesse Fingerabdrück u alles gäh! D Fii isch das mal sogar für Ü16 ghaltä wordä u het o ini dörfä! Da alls so lang isch gangä, hi ned mier uf z Gepäck gwartet sondern z Gepäck uf üs. Nachdäm mir ufe Zug si, hi mir umi chli öpis vor Skyline gseh und di erschti NYC-Abäsunnä wo würklech imme füürrote Liecht glüchtet und e rosaroti Szenä id Skyline zouberet het. Im Vordergrund si mir beschenkt wordä mitere coolä Sicht uf die typischä Vorstadt Hüsli und es het usgseh, wimes kennt vodä Filmä. Mitem Zug isches bis zur Station gange, wo när die verschidene Züg & Subways fahrä. Für üs isches also vom Flughafä zur „Jamaica“ Station gangä u vo dört himer d Subway gno richtig Stadt für i üses Hotel am Times Square. Das „werä“ ungefähr 1.5h Fahrtzyt xi bis zur Station „50 St“. Ir Subway hi mier scho richtigs New York Feeling übercho: Lüt, wo ihres Znachtässä mit dr Familiä hi ir Subway abghaltä oder sörigi, wo mit ihrer Schildchrot ufem Schoss am Gassi gah si. Ä Typ wo oben ohne isch am sini Buchhaar uspickä u ässä xi. Äs het o ä potenzielle Schreihals 2.0 ka, aber da het due d „Mom“ gad dr Tarif düri gäh u lut gsit „Shut up! SHUT UP!!!!“ u somit isch das erledigt xi. Derzue himer die verschiedenschte Musiggschmäcker kennäglernt will hie jedä lut ufem Handy oder dä Boxä sini Musig bringt ir Subway. Welcome to New York! Und nomal ä Unterbruch, will nach meh als 1h fahrä het d Subway d Kontrollä verlorä u de hi mir 3 Statione vorhär müesse usstige und üs ohni Internet mitem Subway Netz vor NYC bekanntmachä zum irgendwie i das Hotäl z cho. Nach witerä 3x umstiege und no 5 Minutä dürä Times Square spazierä, wo üs schomal d Müler het la offe ha, hi mir de ds Hotel gfundä.
HOTEL CHECK-IN NEW YORK CITY
Am 22:15 si mir dört acho, Yes! Endlich icheckä, duschä u ab id Stadt - hi mier denkt. Sie hi üs aber ned im System gfunde. Är het gsuecht u gmacht öppä ä Viertelstund lang u äs het sich usigschtellt, dass üsi Buechig im April isch storniert wordä. Das himer nach sorä langä Ris no chönä bruchä :) Aber mier his easy gno u zum Glück o ä super Rezeptionist gha wo üs vorgschlagä het nomal 4 Nächt z bueche, dass mir chöne ga ligä und mier mit dr Migros (z Hotel hi mier über Migros Ferien buechet) am nägschtä Tag aluege, was passiert isch. Das hi mier gmacht, hi CHF 1'200.00 für 4 Nächt mit dr Kreditchartä reserviert u si is Zimmer. Dört himer gad es Mail ad Migros gschribä, ir Hoffnig sie mäldä sich i dä nägschtä Stund, zu dere Zyt isch ir Schwiiz öppä scho fasch 5i am Morgä xi.
MIER SI ACHO U HEI HUNGER
Hungrig u gspannt uf d Stadt, si mier no hurti usigangä u hi sofort üses Comeback fürä Taco Bell wellä ha. Dört si mier im 2018 viel xi u hi „Nacho Fries u Tacos“ verdrückt. Die Nacho Fries giz numä düre Summer u drum isch das z erschtä xi, wo mir langersehnt ir USA hi müesse machä! Näbscht däm sich d Fii no äs „Reeses“ original ir USA gönnt het. Im Taco Bell si mier diräkt nostalgisch wordä und hi scho angscht ka, äs git sä nem. Aber dr Taco Bell het üs no nie im Stich glah und so hi mier nach 6 Jahr endlech umi die Nacho Fries zwüschä d Backä becho. Mier hi o no je 2 Tacos ka u si diräkt zrug versetzt wordä und hi dört d Nacht la usklingä (wi mier am nägschtä Tag erfahrä hi: Ar Evä ihri Schwo kennt üs natürlech u het genau gwüsst, dass mier i däm Taco Bell landä. Usem Gluscht usä hei sie sich när gad Tacos bstellt). När simer zrug iz Hotel u d Evä isch diräkt iz Bett kiit u innert Sekundä wäg trättä. D Fii het sich o Bettready gmacht und isch när o is Bett.
Mier si z BÄRN Dahimä am 07:15 usem Huus u am 22:15 zu NYC Zyt im Hotel acho. Das hisst mier si insgesamt 20 Stund am Reisä xi u vorhär no d Nacht dürägmacht etc. Das isch fang üsi Hiris u Akunft xi, jitz giz richtig los!
17. JULI 2024
DAY 1 - NEW YORK CITY, NEW YORK
Hüt Morgä isch d Evä scho öpis vor dä 8ä ufgwacht, d Fii ersch vor dä 9ä (wimesä kennt). Nachere Duschi hi mir üs parat gmacht, NYC ga z erkundä. D Migros het üs scho zruggschribä u somit isch für z Hotel jitz o gsorget. Willmä öppä 10-15 Minutä ufä Lift wartet, si mier duä d Stägä achigloffä was übrigens sehr idrücklech isch xi, wills üs a actionriichi szenenä us dä Filmä erinneret het. Mier si öppä am halbi 11 ifach druflos gloffä u hi fürnes passends Resti usschou ghaltä. Was bi üs 2 aber natürlech nie darf fehlä isch äs guets Kaffi am Morgä. Per Zuefall het sich das im „Blank street coffee“ gfundä und mier si gsattlet xi fürä Tag. D Fii het unbedingt no iz „Planet Fitness“ wellä ga gugä fürnes Fitness Abi z lösä u de si mier das no ga abklärä, aber leider isch das alls chli komplizierter xi als denkt u under „Worldwide Studio Access“ verschtöh d Amis öpis anders als mier hi denkt, nämlech maximal 10 Mal und numä in New York City. Mier sueche hie es anders Mal ä Lösig will mier hungrig si u d Evä süsch zur Diva wird u d Fii i Angscht müesst läbä. Ga ässä si mier iz „Sweetgreen“ u hi üs äs mega feins „caramelized garlic steak organic“ mit riis und gmües als bowl tilt. Mier his beidi sehr fein gfundä us gärn ka. Das het üs öppä 21$ gchostet ohni Trinkgäld. Nachem ässä hi mier äs churzes Pöiseli gmacht. Vo was? Das wüssemer o nid will mier hi bis dahärä no nid viel gmacht, aber äs isch sehr hiss z New York und das macht in Kombi mitem umälufä ifach müed. Mier hi usserdäm zerscht mal ä Cyber Truck gseh uf dr Strass u d Evä hez mega cool gfundä aber ned tscheggt, dasses ä Cyber Truck isch bzw. dasses dä git.
Am 12:30 si mier duä witer richtig Central Park gloffä u hi im Shopping Center näbedran „Columbus Circle“ ä Ladä gseh, wo sich d Fii nüiji Joggingschueh het wellä chufä. Äs het ä Statue gha wo d Fii als Hintergrund brucht het fürnes Foto vor Evä mit Aleitig wie posiere. D Evä het nid tschegget was die bestimmti Posä söll bis sie sich speter umdreid het und het gmint, dass d Fii numä Seich im Grind het. Öppe uf die 12:45 het d Fii im Ladä dr erscht Schueh probiert, wo d Evä als Physio ihre und ihrem „Runner‘s knee“ empfohlä het u d Fii isch begeisterer xi vo däm Schueh wie agnähm u bequem dä isch! Obwohl sie gad ke anderä meh het wellä aprobierä, hi mier de glich no ä halbstündigi Beratig gmacht u d Evä het klar d Funktion vom Schueh i Fokus gsetzt, anders als ar Fii. Für sie het dr Schueh natürlech „grau“ müesse si (was o süsch?!) und sä vom Design asprächä, da isch gad ä chli d Fashionqueen i ihrä füricho. Sie het due sälber o gmerkt, dass die vo ihre Userwähltä graue Schueh ifach für ihre Körper ned wärdä funktioniere u het dä Schueh kuft, wo sie als erschts probiert het. Dä isch türkis und findet sie farblech o schön, immerhin! Am 13:30 isches endlech witergangä i Central Park, dä isch numä gad über dr Strass xi. Für je 25$ hi mier 2 Velos gmietet (JA, d Fii isch VELO gfahrä!) u hi bewusst vore Versicherig für d Velos abgseh. Grund derfür isch folgendä: We z Velo gstohlä wer wordä, hetä mier ifach o eis gstohlä u hettä das zrug bracht. D Fahrt dürä Park isch so öpis vo unglublech xi! Allgemein isch dä Park üses bishärigä Highlight (hi ja o scho so vil Uswahl hehe) willmä ifach a jedem Eggä umi öpis z entdeckä het u hurti aghaltä isch für ga z gugä oder Fötelä. Vo verschiedenä Sportplätz, Spielplätz, Picknick Möglechkitä, igeti Pärk, riesigi Wiesenä, Ehöreni, Vögel, Zoo, Wasserfäll u Bäch usw. bis hin zurä igetä Huptstrass fürä Park (ned füre allgemein Verchehr) wome als Velofahrer, Jogger, Rollerblades, Outo usw. het chöne bruchä, hez ifach alls ka! Derzwüschä het o ging umi irgendwelchi Stend gha für Getränk, Glacä, Hot Dog‘s oder Frücht. Was de absolut Wahnsinn isch xi u vor allem d Fii us dä Sockä ghouä het, isch dr See im Park xi! Äs het zwar mehreri Seeä im Central Park aber dä isch nach ihrer Vorstellig gfüehlt öppe so gross wi dr Thunersee! Hindedran hetmä no paar Wulchächratzer gse und äs isch unglublech was das für Dimensione si i därä Stadt! Äs isch witer gangä mit üserä „chilligä“ Velotour, wo d Evä überhupt ned wie vo ihrä gwünscht isch gmüetlech xi, sondern meh äs Workout will d Fii zimli zackig underwägs isch xi ufem Velo und o richtig mal het wellä uskoschtä inä vo dänä „Idiote-Velofahrer“ z si u de isch sie mit Gnuss über jedi roti Amplä gfahrä (Ja äs isch wük winä Huptstrass). Öppä ir Hälfti vom Usfährti het d Fii gmerkt, dass d Evä Müeh het bim schaltä u ihrä scho dr Dumä wehtuet dervo. U churz vor Schluss het d Evä de o dr Sattel mal chli höijer gstellt u gäbiger chönä fahrä. D Fii het gmint, dass d Evä ufgrund vo ihrer Höheangscht dr Sattel so tüüf igstellt het. So sie die ledschdä Minutä no gmüetlech usgfallä u nach nid ganz 2h hi mier d Velos umi zrug gäh. Da hi när afa is äs paar Vitaminä härämüessä u so hi mier 2 Smoothies kuft u si nomal i Park gloffä u chli uf d Wiesä ga ligä u sünnelä. Ä Platz gad undermä wunderschönä Bum ire ruhige Umgäbig, wo mier hurti ä Halbstund erholt hi. Gstercht isches witergangä uf d Suechi nach Sneakers für d Evä. New York het am Abä Rägä u Gwitter gmuldä u da het d Evä chli wasserdichteri Schueh wellä ha. Die erschti Alufstell isch dr „TJ Maxx“ xi, wo aber eher ä allgemeine Store wi dr Target isch xi. Also simer witer u underwägs het sich d Fii ned la entgah ä „NYC Hotdog“ z ässä u wenigi Minutä speter hi mier dr Food Market (Urban Space) entdeckt u si dört o nomal ga ässä. O wes ned gross isch xi hez dört verschiedenschti Stend ka mit Ässä us aller Wält. D Evä het scho sitem vorhärig Tag gluscht uf Indisch u het äs Palak Paneer bstellt, d Fii Butter Chicken. Leider isches für d Evä chli ä Reinfall xi wills ihre ned gschmeckt het u o vil z scharf isch xi. Z Butter Chicken isch easy xi u d Fii het das när mit dr Evä tilt. Den si mier umi witer uf d Sneakers Suechi u si i Puma store, Nike Store, Adidas Store und i JD Store. Niene hets öpis passends gä und drum hi mier d Suechi verschobä ufene anderä Tag. Mier si gad ir Nechi xi vom „Bryant Park“ u due dört chli ga verwilä. Dä isch o ä sehr coolä Park ir Stadt wome jedä Tag verschiedeni Events, Attraktione und Möglechkitä het. Är isch überhupt ned gross (vlich wie di chlini Schanzä z Bärn) aber wük ä sehr charmevolle Park zmit ir Stadt. Im Summer giz hie o viel Live Konzärt oder Filmnächt, wo aber gad ä Tag vorhär weri xi. Am Morgä giz mischtens gratis Yoga, Thai Chi u anderi Kürs wome cha machä. D Fii würd gärn am 21:00 i Bachata Kurs u drum si mier richtig Hotel zrug. Für d Evä isches kritisch wordä u het nomal äs Kaffi brucht. Lang hi mier Usschou ghaltä nacherä Rösteri aber äs het gad nüt umägha u drum isches äs Kaffi usem Starbucks wordä, s het söllä si Zwäck erfüllä. Am 20:15 simer im Hotel xi u leider hez jitz nem glängt füre Bachata Kurs u drum isch im Hotel ifach Platz xi für d Evä zum nappä u d Fii isch under d Duschi für när a Bachata Social (Bachata only Usgang für Bachata Tänzer:Inne). Öppe am 22:15 si mier los dürä Rägä für zur Subway. Öppä am 23:00 si mier am Zielort acho: ä Rooftop Bar mit diräkter Sicht uf z Empire State Building - Hammer! Leider isch dr Bodä u die mischtä Lüt hie ned halb so dr hammer wie d Sicht gsy! Mier si churz vor dä 00:30 gangä u himglofe. Ar Fii isch ufgfallä wie sicher New York isch u kis Problem wer ellei um die Zyt himzlufä u het gmint das isch für Evä o so, genau i däm Moment wo sie das ihre verzellt, gumped ä Rattä usem Küder zur Evä u sie schreit luthals los u d Frou hinder üs nimmt o gad ä Gump. Das isch witzig xi, emel für d Fii. Was weniger witzig für sie isch xi, die ganzä Obdachlosä a fasch jedem Eggä. Das het sä rächt beschäftigt und bire Beckeri isch ä volle Küdersack xi mit so viel Gebäck drin wo fuetgschossä isch wordä u 2 Lüt si das alls am usäfischä xi zum ässä. O das isch New York und ghört leider derzue. Scho gli simer när im Hotel xi öppe am 01:15 und hi miterä guetä Müedigkit iz Bett chönä.
Üses hütigs Highlight: Velofahrä im Central Park (isch sogar ou ar Fii ihres Highlight)
18. JULI 2024
DAY 2 - NEW YORK CITY, NEW YORK
Hüt isch d Fii ehnder ufgwacht als d Evä. Am halbi 8i u das ohni Wecker. D Evä het ä Stund speter fang d Ugä uf becho u gmeinsam hi mier chli guget was hüt öppä so dr Plan wird. Dernach ab under d Duschi u am 10:15 ischs los ganzä. Natürlech isch äs guez Kaffi umi a erschter Stell gstandä. Das himer dasmal im „Four Five Coffee“ gholt u si zrug ufä Times Square spaziert wo mier miteme „Big Bus“ Agent überä Priis fürä „Hop-on-off" Bus hi verhandlet. Nach vielem Hi und Här und üs nachelufä, hi mier üs ufnä Priis geinigt wo zwar glich no tüür isch xi aber dr Omar (so heter ghissä) glich ned het müessä Hunger liidä u Krach mitem Boss bechunt. Hie ischs üs usserdäm mal z guet cho, dass üses Babyface looking Fii nid numä usgseht wi unter 16i sondern o dr Chinder Ticketpriis het chöne zahlä. Öppis vor dä halbä 12 simer los uf d Downtown Tour. D Audiotourstimm het ane Folg vo „Paw Patrol“ erinneret. Die erschtä Stopps hi mier übersprungä will mier die scho relativ guet z Fuess hi chönä abklapperä. Därum simer bis uf „Little Italy“ gfahrä wo mier öppä uf di 12i usgstigä si u diräkt mitem Duft vor Italienische Chuchi si i Begägnig cho. D Fii het i däm Moment gsit „Mhhh dä Gruch hani mega gärn!“, sie het aber ned ds Ässä gmint sondern D Boumaterialie vore Buschtell. Churz druf isch sie inä Souvenir Shop gsecklet, als gäbgs kes Morn. Äs het sich usägstellt, dass i däm Ladä ä Bachata Song gloffä isch u sie dört chli isch ga losä. Dr Verchüfer isch enttüscht xi, dass dr inzigscht Gast i däm Ladä für d Musig isch cho u ned für z shoppä. Uf di 12:30 hi mier üs im Restaurant „Casa d‘Angelo“ niederglah u mässig fein Zmittag gässä. D Fii hez vorhär googlet u het gmint, das tönt super. Schlussendlech het sie sich aber o chli vo dä schön blauä Ugä vom Resti Lockvogel la inspiriere wo vorem Resti d Lüt ini holt. Äs isch aber es typisch amerikanisches italienisch xi. D Pasta si ned mal Al dente xi und meh Sauce als öpis anders. Ufnes Glesli Vino wi sichs ir italienischä Kulturso ghört, hi mier aber ufgrund vom Priis verzichtet. 1 Glesli het hie zwüschä 16 & 33 Dollar koschtet. Äs Bier het um die 10 Dollar koschtet. Mier hi aber dr Hunger chöne besitigä u si gstercht xi für Tag. Witer isches gangä am halbi 2 i däm mier no chli dür Little Italy gschlenderet si u no i nägscht District „Soho“ si cho. Soho het üs sehr gfallä wills ä Charme het gha wo üs diräkt a Portland (Oregon) erinneret het. Äs het überall cooli Lokal u härzigi Gässleni ka u isch verbundä xi miteme warmä Gfüehl. Dört hi mir o dr coolscht Ichufsladä gseh. Mier hi numä Wasser wellä ga chufä u si usem Stunä fasch nem usecho, wie suber u gordnet ä Ladä cha si. Usserdäm so vielsitig und me het dr Idruck becho, jedä ir USA ernährt sich gsund u jedä Öpfel wird handpoliert bevor är iz Regal darf. Z Gmües wie frisch usem Gartä, putzt u ghoblet ir Chüehli. När simer am 14:10 ufä Big Bus u bis zur Wall Street gfahrä, wo mir usi gjagt si wordä wägä Buuarbitä. Het nüt gmacht, will mier sowieso ir Nechi vor Whitehall si gsy u d Fähri hi chöne nä u nach State Island fahrä. Das isch wahnsinnig schön xi will mier bir Hifahrt uf d Brooklyn Bridge, Brooklyn u diversi Brüggene gseh hi. D Fahrt isch öppä 25 Minutä gangä u änä acho, hi mier ä churzä Ufenthalt ka u si när aber gad mit dr nägschtä Fähri umi zrug will mier no d Sicht uf d Friihitsstatue hi wellä gseh. Das isch üserä Minig nach zwar unspektakulärer xi als erwartet aber chamä glich mal machä. Viel meh het üs d Sicht uf New York City gfallä u zum stunä bracht. Das isch alls übrigens gratis xi u d Fii het das zum Glück gwüsst, will süsch hettä mier üs allefalls no Tickets la adräije. Rund um d Whitehall hez fasch all 10 Meter Lüt, wo wärbä mit Tickets für uf d Fähri. Nächhär si mier z Fuess zum 9/11 Memorial und Museum gschlenderet. D Gedänksstett und z Museum si sehr idrücklech xi aber irgendwie für üs beidi nid wük griffbar. Äs isch mega guet gmacht z Museum mit verschiedenschtä Erinnerigä, persönleche aber o historischä Artefaktä, wo si zum Teil restauriert hi (Boarding Pass vo dä Flugzügentfüehrer) u zum Teil ifach usgstellt hi wie Attentat vorgfunde (Füürwehrouto). Usserdäm hez die originalä Stalwänd und witeri Bouelement vo dä Gebäude im Undergrund ka. Mä het gmerkt wi dä Museumswärter wichtig isch, Respäkt vor dä Opfer und ihrne Aghörize bi z phaltä. A gwüssne Orte hetme bischpiilswis ned dörfä fötelä. Allgemein hetmä ned dörfä umäsecklä oder luut si. So hetmä gspürt, dasses ä Ort vore riesige Tragödie isch, wo mier üs gad befindä. Bis am 19:00 simer im Museum xi u gad knapp alls mögä schaffä bevors zueta het. Näbedran si mier üs umi mal äs Kaffi ga gönnä (Blue Bottle Coffee). Bis iz isch das dr beschd Kaffi xi in New York, willer üs under anderem o a Kaffi z Portland erinneret het. Per Zuefall simer witer gloffä zum Brookfield Place u si gflasht wordä vomnä abartig schönä Bild mitem Sunnäuntergang, Wasser und Jersey City Skyline im Hintergrund! Mier si üs sicher xi: hie wi mier Znacht ässä u no gmüetlech öpis trinkä. Zersch aber chli i Sunnäundergang am Wasser entlang spazierä. So simer due ufzmal bim „Rockefeller/Battery Park“ glandet. Dä Park isch o umgäh xi vo Wasser, Skyline u Sunneundergang. Derzue ä riesigi Wiese miterä Bühni ure Liveband! Familienä, Päärli, Fründä u Arbeitskollege etc. si aller versammlet uf derä Wiesä xi u hi mitenand dr Abä gnossä. Öppe aller hi ä Picknick Dechi ka inklusive Znacht. Mier si due o uf d Wiesä ga höcklä u his ifach gnossä. Was fürne wunderschönä, romantische u trumhaftä Moment in New York City! D Evä het hie übrigens zerschtä Mal i ihrem Läbä Glüehwürmli gseh! D Fii isch überzügt, dass si z Zwöit im 2018 o scho gseh hi.
D Fii het sich ä Wisswii gönnt u d Evä het da o gärn äs paar Schlückli gno. Äs het ifach gad alls passt u mier si ersch am halbi 10i witer. Da isch natürlech fischter xi u mier si am Pier entlang gloffä, immer no uf dr Suechi nacheme Restaurant. O ä unglublech schöni Ussicht bi Nacht! Da mier das ir Schwiiz ned hi, hi mier relativ lang dä Ablick gnossä u uf üs la würkä. Mier si bis zum „Pier 40“ entlang gangä u si derzwüsche no Zueschouer wordä vomnä Basketball Frizytsspiel under Locals dört. Äs het viel Agebot a däm Pier entlang für Sport z machä, vor allem Basketball aber o Tennis si guet verträttä dört. Mier hi ohni Plan ifach mal d Ugä offägha u üs isch um die 22:15 es mega härzig Resti chli im Verstecktä i z'Oug gstochä! Das het vo wiitem scho mit sim Charme gworbä u üs igladä. Äs het usserdäm nach öpisem usgseh, wo numä d locals si. Das findä mir immer die coolschtä Plätz! So richtigi Insider halt. Uf jedä Fall hettä mirs wük nid besser chöne brichä. Das isch nämlech z beschdä Ässä xi, wo mir je i üsem Läbä imne Resti hi übercho cho - das isch ke Übertribig sondern d Wahrhit. Mier hi beidi äs „Hanger Steak“ usgwählt u d Evä hets ir Zytlupä gässä, dasses ned so schnäll fertig isch. D Fii hingägä hez schnäll wellä gniessä. Mier si sehr guet bedient wordä u üse Chällner het sone ruhige u fründleche Idruck gmacht! Mier hi no äs Dessert gno u d Fii het gluscht ka ufnes Kaffi, für d Evä isches scho z spat xi. Churzerhand het sie sich aber umentschiede, „Yolo“ het sie gmint u sich o eis gönnt! Mier si mit 25% Trinkgäld us däm Ladä usä! Ir USA si 15-20% Trinkgäld ä unusgsprochni Pflicht. Wär also vor het uf New York z gah u sich das ned möcht la entgah (äs het o Vegi Sache) darf üs gärn kontaktiere fürnä ultimativ Gheimtipp, wo kener Touris am Start si. D Fii het no mit dä Agstelltä gredet u gfragt ob das eher sones Local Ding isch, däm hi si zuegstumme. Äs chöme viel us dr Nachbarschaft aber o anderi New Yorker Awohner:Inne. Öpis meh als 1.5h si mier zrug zum Hotel spaziert dürnes witers cools Quartier „West Village“! Äs het ä hennä cooli Architektur ka, viel typischi „New Yorker“ Hüser mit derä grossä Stägä vordran, überall isch öpis gloffä u mä isch umgäh xi vo Beizenä, ini cooler als die anderi! O wes guet bsuecht isch xi, isches ned luut xi oder überfüllt. Äs het sini Rueh ka i däm läbhaftä District. Sicher öpis wo dürä Tag wie o Nacht sehenswärt isch! Am 1 am Morgä si mier endlech zrug xi im Gallivant Hotel u iz Bett. Was fürne Tag das isch xi! So viel schöni Idrück wo mier hi dörfä sammlä. Üses bishärigä Highlight isch dr Sunneuntergang xi im Battery Park mit Liveband und gmüetlechem Parkfeeling.
Üses hütigs Highlight: Gmeinsam dr Sunneundergang im Rockefeller Park (Battery Park) z gseh, inkl. Skyline und Spaziergang am River
19. JULI 2024
DAY 3 - NEW YORK CITY, NEW YORK
Mier si uf u hi besprochä, was mier a üsem ledschdä Tag no möchtä machä. Beidi würdä gärn ga joggä aber d Evä het Schmärzä im Chnöi u drum himer üs druf geinigt is Fitness ga Chraft z machä. Mier hi verschiedeni usägsuecht u dä Plan verworfä will 1 Tagesitritt 60$ choschtet pro Person. Also himer gsit, dass mir süsch am nägschdä Morgä gugä wis am Chnöi git u den würde ga joggä. Mier si am 10:15 los und is „Le Café Coffee“ üs üses wohlverdientä Kaffi ga schlürfä u derzue zmörgelä. Mier hi üs äs Avocado Toast (The everything toast) und Açai Bowl teilt. Derzue 2 Cappuccinos wo d Fii zu ihrem Favorit in New York küert het. Mier hi nomal äs zweits Toast gno u üs derzuä inä abglacht will d Fii am Vortag ä Instagram Story gmacht het vom Battery Park u das als „Gurtenfestival 2.0“ deklariert het us mega viel Lüt ned tschegget hi u gmint hi mier si wük ufem Gurtä. Im Hintergrund gsetmä jedoch d Skyline vo Jersey City und z Wasser. Drum verschtö mier nid, dass so viel denkä, dass mier wük ufem Güschä si. Öpis um die halbi 12i si mier witer u ire Stund zu dä Hudson Yards vo „The Edge“ acho. Am 13:00 ischs losgangä. Mitem Lift simer innert 52 Sekundä uf d Ussichtsplattform im 100. Stock transportiert wordä. Das entspricht are Höhi vo 335 Meter. Rund 45 Minutä simer obä xi. Äs isch relativ tüür für das was es härgit u dört obnä isch alls übertürt, sie wärbe miteme gratis Foto womä no vorem Lift macht, aber o das chostet när um die 10$. D Ussicht isch hammer, ke Frag! Aber für das was härgit würde miers ned nomal zahlä oder witerempfählä! När isches für üs nach Brooklyn witer gangä. Bevor mier uf d Subway si hi aber no paar Vitaminä ned dörfä fehlä! Drum hez umi Smoothies gä mit frische Frücht u Gmües drin! Mier hi beidi genau di gliche gno wie ismal im Central Park scho. Mier hi sogar währendem wartä vom Verchüfer Ärdbeereni übercho. Är isch eh mega lieb xi und luschtig! Ifach ä Typ wo guet druf isch u si Job u sis Läbä älwä sehr gärn het, das hi mier usegspürt bi ihm. Wo mier ihm hi wellä Trinkgäld gä, isches ned möglech xi mitem Charteterminal u mier hi ki Cash derbi ka. D Fii het ihm gsit, dass mier ihm sehr gärn öpis gäh hettä. Är het lächelnd gsit: „Just give me a smile!“. Das himer gmacht u är isch so happy xi. Sehr schöns Gfüehl xi, dass öper so bödelet isch und dr Job liebt u ifach fründlech isch. Will mier am Abä no dr „Summit One Vanderbilt“ hi wellä machä, simer zytlech chli bundä xi u hi därum d Subway gno für uf Brooklyn. Dört acho himer beidi ufs WC müesse u d Fii isch sich am verbrennä xi (vo Sunnäcreme het sie abgseh). D Evä het ar Fii z ultimativä Tool glehrt wome cha awendä gägene volli Blasä! Das het d Evä im Physiostudium glernt u äs het sogar gholfä! Gli druf simer i erscht „Market“ gangä, wo üs entgägä cho isch. Äs het wit u brit kener Touris gha u mier si gfüehlt die inzigschtä xi. Brooklyn isch irgendwie zimli ä ruhigi Gägend, emel da so mier si xi (usgstige si mier bim Botanischä Gartä). Im Market hi mier üser Notwendigkitä kuft u hi als äxtra Würscht no dörfä ga bislä. När simer witer gloffä am Botanisch Gartä entlang i „Prospect Park“. Hie hi mier beidi afa tscheggä, dass mier idr USA am reisä si. D Strassä, d Lädä u ifach d Umgäbig het üs erinneret az 2018 wo mier mitem Campervan dür d USA si touret. Überall o umi Fastfood Chettine ufnand u die britä Strassi. Öppä am viertel vor 4i si mier im Park acho u ifach mal gloffä. Anders als erwartet, isch dä Park riesig xi u mier hi ned alls gseh aber üs diräkt verliebt. D Evä het gmint „Das schmeckt wie früeher z Wohlä ir Chäsi!.
Dä isch vielfältig und so witlüfig! Perfekt für Familienä, Päärli, Sportbegeisterti aber o Einzelgänger. Gfüehlt überall isch umi öpis cho, wo z vorhärigä Asehä het mögä toppä! Jenschti Möglechkite düre Wald z spazierä, a See z gah, Baseball, Konzärt usw. hez ka. Üsä Favorit isch definitiv äs chlises Teichli mit Wasserfall xi. D Pflanzä ringsetum his chli igschlossä u gheimnisvoller la würkä. Chlineri Felsä hi das Teichli umrandet und z Wasser isch schön klar xi. Witer simer ufnes riesigs Fäld cho, wo fasch d Grössi vor Allmend erschliesst. Äs isch mega cool xi u witer simer zur Bühni cho vom därzitige „We celebrate Brooklyn“ Festival. Da si dr ganz Summer (Juni bis August) Live Konzärt und das gratis! Wük ä wunderschönä Park u no lang ned alls gseh! Schiins hez no ä richtig grossä See! Dä hi mier us Zytgründä nem gmacht. Am viertel vor 5i hi mier uf d Subway wellä für zrug uf New York City. Ar Evä ihri Kreditchartä isch ned gangä für z Ticket chufä. D Fii het d Kreditchartä ufem Handy gha aber es het hie ke kontaktlos Outomat zur Verfüegig gha. Cash himer o nüt ka. Also himer nacheme ATM Bankomat gsuecht u öper gfragt wo dr nägscht isch. D Frou, wo mier gfragt hi, het üs ganz cool gantwortet „Just go through“, mier söllä under dr Schrankä düri gah. I däm Moment isch sie sälber uf d Chnöi u schlüft under düri! Sie isch uf dr anderä Siitä xi u het üs dört ifach d „Notfalltürä“ ufta, dass mier hi chönä derdür lufä. Das schiint hiä normal z si u äs git älwä anders, wo sich ds NYPD muess drum kümmerä als sörigs. Mier si ir Subway chli idöset u wo mier ufgwachä si, himer gmerkt, dass üsi Täschene fehlä u mier si beroubt wordä. Just a joke man - Üs het numä d Smartwatch gfehlt. Spass, ok fertig iz. Was ned so z spassä isch, wo mier am 17:30 si zrug xi, ischs ar Fii nid so guet gangä im Buch u ifach so Sturm. D Blasä het sich o umi zu Wort gmoldä u z erlerntä Tool vor Evä, het hie nem chönä agwendet wärdä, wills vor Schmärze nem gange isch. Därum isch sie ifach ids nägschd beschdä Restaurant d Blasä ga erlösä. Wahrschiinlech hi mier ä chli wenig gässä für die riese Streckine bi voller Sunnä. Drum het schnäll öpis z Ässä här müesse u d Evä isch üs bim Bryant Park 2 New Yorker Hotdogs ga richä. Äs isch chli besser wordä u mier si zu däm Ort gloffä, wo zoberscht uf dr Lischtä gstandä isch für New York: Summit One Vanderbilt! Das isch die nüischti Ussichtsplattform z NYC, wo uf 3 verschiedene Etagene mega viel z biete het und alles reflektiert vom Sunneliecht. Äs isch alles us Glas und d Fii het das als 1 vo 7 Gschenk für d Evä zu üsem 7. Jahrestag im April vorgsehe ka. Drum simer schnäll dört hi, dass mier d Sunne vom Tag und dr Sunneuntergang dört hi! Das isch nämlech zu Sunneuntergangszyt am schönschdä (säge si). Chum simer dört xi, dr Schock: Usverchuft! Mier his üs äxtra ufghobä füre Fritig will den z Wätter am schönschdä isch xi. Dass es usverchuft wird si, hettä mier ned denkt aber ja, das het agschissä. D Fii isch no öper ga fragä für Tickets z tuschä will mier am nägschdä Tag ja uf Memphis witergö und anderi vlich o parat werä xi für 1 Tag speter z gah. Die, wo si isch ga fragä, hi sälber o ke Tickets ka u füre nägschd Tag buechet. D Fii isch so enttüscht xi, dass es ned klappt het u d Evä zwar o aber für sie isches weniger schlimm xi. D Evä het ar Fii när öpis gsit wo d Sorgä het la verflügä. De simer gangä u hi beschlossä zum Bryant Park witer z gah. Dört hez äs Konzärt gä, wo mir vore Rooftop Bar mit feine Pulled Pork Tacos u Getränk verfougt hi. Mier hi 2 spezielli Drinks gha, nume gad jewils dr falsch bstellt u när mitenand tuscht. Äs isch uh schön xi z zweit uf derä Dachterrasse u z Konzärt am louschä. Bis öppä am 21:00 si mier dört xi u när z Fuess iz Hotel zrug, acho si mier ca. am 21:45.
Üses hütigs Highlight: Vibe vor Rooftop-Bar us mit live Musik im Bryant Park.
20. JULI 2024
DAY 4 - NEW YORK CITY, NEW YORK
Hüt himer dr Fisch gfangä u si am 5i ufgstandä. Am 5:15 isches losgange richtig Subway für uf Brooklyn. Öpis vor dä 6e simer acho und no hurti zur Mannhattan Brügg ga gugä, was da so git. När simer zur Brooklyn Bridge, was üses igentleche Ziel isch xi. Mier hi dört wellä ä Morning Run machä u drüber joggä.ä, we „d Stadt wo nie schlaft“ ufwacht. Äs isch wunderschön xi, die Farbe in Kombination mit dr Skyline z gseh u o uf Brooklyn zrug z blickä. Unbeschriblech die Morgästimmig hiä!
Igentlich wers cool xi, üsä morgentlech Kaffi z richä, aber üses Wunschkaffi (Stumptown Coffee Roasters) womer o vom 2018 no kennä, isch z wit furt xi u üsi Alternative het no ned offä ka. Mier hi müesse pressiere, will mier uf Memphis witer reisä. De simer ohni Kaffi am 7i ufä Subway und när im Hotel ga duschä u pressiert für a Flughafä. Packt hi mier natürlech z mischtä scho am Vorabä.
REIS NACH MEMPHIS, TENNESSEE
Ungfähr am viertel vor 8i simer gangä u vollpackt überä Times Square gloffä zur Subway u lenger als gwohnt müesse wartä. Äs isch ä unglublechi Hitz i dänä Subway Statione, zwüschä 30 und 40 Grad. Ir Subway sälber sis när gfüehlt Minusgrad! Normalerwis hi mier churz anka u när agfangä äs Jäggli mitznäh für ir Subway. Aber jitz womer underwägs si a Flughafä, hi mier scho leng Hosi anka und das isch vor allem ar Fii bim lengä wartä bir Station chli zum Verhängnis wordä. Sövel gschwitzt hig si älwä no nie, het si gmint u het sich gfüehlt wine Springbrunnä. Endlech isch am viertel ab 8 ini cho u mier si ä Viertelstund gfahrä uf Queens u vo dört hi mier dr Bus gno a Flughafä „LaGuardia“, dä isch übrigens gratis xi. Am 9i si mier acho und üses Gepäck ga abgä u hi gseh, dass öppä 30% vo allnä Flüg „Cancelled“ si uf dr Taflä. Üsä het numä Verspetig (vorher: 10:50, neu: 11:30). Mier hi für öpis z trinkä wellä ga gugä. Üses Schläckmul het sich no äs winzigs M&M‘s Peanutbutter und 1 Reese‘s Riegel gönnt.
U jitz folgt ä chlini Quizrundi!
Was denksch du het üs dä Ichuf gchoschtet?
Mier hi für 1 Riegel, 1 chlises M&M‘s u 2 Fläschä Wasser 22$ zahlt! Das si öppä 20.00 CHF.
Mier si prompt dra erinneret wordä, dass mier am Flughafä si. Glohnt het sich das Gäld aber, das Züg isch hammer xi!
Jitz chunt ä witeri Quizfrag a die wo üses Züg würklech ufmerksam läsä: was het üs no gfehlt?
Was hi mier no ned ka wo Pflicht isch bi üs?
... Mier hi no kis Kaffi gha also si mier sofort uf d Suechi dernach. Hunger hi mier nach üserä Joggingrundi o gha. Äs het viel Uswahl ka u mier si dört ga gugä, wos üs am gsündischtä isch vorcho, leider o am wiitischtä Wäg vo üsem Gate. Nichts desto trotz si mier 10 Minutä dört härägloffe u üs gfröit ufnes gsunds u feins Zmorgä. Leider isch dört gar nüt xi, usser so chli öpis a Gipfeli u Muffins. Also simer umi umkehrt u hi denkt mir sueche witer. Irgendwenn hi mier beschlossä halt im Starbucks öpis znäh wo einigermassä nährt und ned fettig isch. Kaffis hi mier o kener guete gseh also isch Starbucks üse Zielort wordä. Mier hi dört wo mier uf Nahrigssuechi si gsy gad einä ka, dä isch sehr gross u leer xi, also perfekt für hurti öpis z holä u witer. D Evä het aber gmint es het no ä Starbucks bi üs am Gate, de chöntemer dert härä, will mier hettä eich o müesse pressiere. „Easy“. Da simer zrug richtig Gate und chöme zumene überfülltä Starbucks wo mier öppä 20 Minutä agstandä si. D Fii het es „Americano“ u d Evä äs „Vanilla Latte“ gno. Äs folgt ä chlini Uschlammerig, wo afangs Ouguscht vertüüft wird wärdä, we mier in Portland si.
(Für die wo ned verschtöh wime im Starbucks nume äs Americano cha näh: D Fii hettis älwä o ned chöne nachevollzieh bevor mier im 2018 z Portland verschtandä hi, was guete Kaffi isch u dr Starbucks meh mit Zucker als Kaffi z tüe het. Ds Americano im Starbucks findet d Fii aber easy! Also a alli wo gärn Kaffi trinkä: Mier empfählä öich Portland (Oregon), um d Kaffiliebi no richtig z entfaltä. Für alli wo ned gärn Kaffi trinkä: Göt uf Portland und probieret mal äs Kaffi dört, när redemer witer ;) )
Zässä hi mier dört o gno u si witer zum Gate. Churz vorem Gate isch scho umi ä Starbucks cho, d Evä het öppä dä gmint gha Dä isch o leer xi u mier hettä üs 2x das aschtah vo 20 Minutä chöne sparä aber egal, mier hi öpis gägä Hunger u Kaffi isch o am Start. Womer bim Gate si häräghöcklet isch üs bewusst wordä, was das igtl. fürnä schönä Flughafä isch u ellei d Wartesitze am Gate si älwä so komfortabel u usgrüschtet wi gwüssi Sitze ire Economy Class. Okay vilech chame das ned so verglichä aber äs het uf jedä Fall mega komfortabli Sitzä dört und öppe 4 verschiedeni Steckdosene und USB-C Buchsene pro Sitz! Hie hi mier also zmörgelet u gwartet ufs Boarding. Wasmä vlich no cha erwähnä isch, dass mier dä Flug buechet hi ka mit dr Abflugzyt 13:45! 1 Tag vorhär hi mier d Mäldig übercho, dasser vorverschobä wird uf 10:50. Derbi hi mier äxtra so buechet, dass mier z NYC am Morgä o no öpis hettä chönä machä. Ufzmal isch d Mäldig cho, dass dr Flug nomeh Verspetig het also hi mier chli Admin Sache erledigt oder ifach chli erholt. Am 11:10 hi mier de endlech chöne boardä. DAS isch es richtig chlises Flugi! Mit je 2 Sitze pro Siitä. Da gspürsch älwä alls! Aber z Fiji hi mier no chlineri Flugis gha, also kis Problem. Mier si am Notfallusgang ghocket u hi dür das ä Sitz gha mit mega Bifriihit u viel Platz. D Evä het erwähnt, dass mier d Verantwortig tragä imne Notfall die Tür ufzdue und dass aller use chönä u het sich vertrout gmacht mit dr Alitig wieme d Tür müesst uftue. D Fii hets witzig gfundä u afa sprüchlä u sich chli luschtig gmacht über die grossi Verantwortig, wo üs da isch ufglit wordä. Churz druf chunt ä Flugbegliter, chnöilet im Gang ab für mit üs beidnä u dene 2 uf dr andere Siitä z redä. Är het üsi mündlechi Bestätigung wellä, dass mier wüssä was z tüä isch imene Notfall. Mier hi ihn ufgrund vom Slang und Lärm i däm Flugi fasch ned verstandä, also heters üs öppe 3x erklärt u gfragt bismers halb verstandä hi. D Nachbare näbedran hi de ufzmal beidi „YES“ gsit u si Blick isch när zu üs zrug u är luegt d Evä ah für ihres Iverständnis u wo sie o „YES“ het gsit, heter älwä vergässä, dasser d Fii no ned gfragt het oder denkt sie chunt drus, will sie ar Evä öpis gsit het u är hez älwä so interpretiert als chem sie nachä. När heter no ds Sicherhits Prospäktli fürägno u erklärt, was mier när müesse machä bire Notlandig. Irgend sones Silti (Seili) ga befeschtigä am Flugzügflügel. Wo dass das isch himer ned usegfunde. Nachem Briefing isch ar Fii klar wordä, dass d Evä alls vorhär ärnscht gmint het u das real isch. Irgendwenn isch ä Info cho, dass mier no ufä Pilot müessä wartä u när göngs los. Mier hi 1h im Flugi mit wartä verbracht, bis när d Durchsag isch cho, dass sie fürne nüije Pilot müesse luege u die wo wellä zrug is Terminal dörfä gah. Mier hi üs entschiede im Flugi z wartä will mier eh scho di ganz Zyt fasch am ischlafä si xi u mier mit sorä Notfall-Verantwortig erholt müesse si u no chli näppä. Aller si ufgschtandä, hi z Handgepäck us dä Schächt gno u hi wellä usem Flugi usstigä, da chunt nomal d Mäldig, dasses es Missverständnis gäb u mier aller söllä Platz nä u wartä. Aller hi z Züg umi verrumt u si abghocket. Chum gmacht, isch die nägschdi Durchsag cho, dass jitz aller müessä usschtigä bis si ä nüije Pilot hi und mier söllä bim Terminal wartä. D Fii isch underdessä z Personal ga fragä, ob de Pilot verschlafä het. Öppe 1 Stund brüche si no, äs si schlussendlech zwar när öppe 1.5h xi aber am 13:50 hi mier due endlech nomal chönä dr ganz Boarding Prozäss machä. Was o nomal het müessä gmacht wärdä isch üsi Ifüehrig irä Notfallsituation. O dasmal heter üs aller einzeln nachenand aguget u gfragt, ob mir wüssä was z tüä isch. Verstandä hi mier zwar immer no nüt aber d Aleitig isch klar xi, also „YES“. Am 14:10 isch de d Mäldig cho, dass mier gli los chönä. Am 14:45 si mier due när wük losgflogä!
Üses Fazit vo New York: Mier findä New York sehr tüür (meh als d Schwiiz) aber wie dr Housi üs scho vorgwarnt het eifach "MEGA!". Äs isch ä sehr grossi Vielfalt vorhandä zwüschä Natur ire Grossstadt, Sportmöglechkeite, Sightseeing, Kulinarik u dr gsamt Vibe i därä Stadt het üs gfallä. Viel Lüt träffä sich i dä Pärk zum Picknickä oder ifach äs Abeprogramm z gniessä. D Lüüt si viel nätter als mier ursprünglech denkt hi. Z nägscht mal würdä mier lenger cho (so 5 Täg werä sicher z Minimum wome sött hie si)
MEMPHIS, TENNESSEE
16:05 isch üsi Landäzyt xi in Memphis und mier si 1 wiiteri Stund meh ir Vergangähit acho. In New York si mier 6h hinder dr Schwiiz xi und jitz sis 7h. Für uf Memphis hi mier nach all däm Wartä etc. ned no 1h mitem ÖV mögä fahrä u hi drum äs „Lyft“ bstellt (ähnlech wie Uber). Mitem Outo sis nämlech numä 15 Minutä z fahrä. Üse Fahrer dr Bobby het ufem Foto ganz lieb u härzig usgseh, het d Fii gmeint u zigts ar Evä. „Dä gseht us wi eine, wo ide Ichoufscenter würd ga umeballerä!“, het d Evä gmint u älwä scho denkt was dä mit üs macht. D Fii als Oberlendere isch dört dürä chli glassniger. So ergänzä mier üs doch guet. Öppä 5 Minutä himer gwartet u när isch dr Bobby cho z fahrä mit sim „Outo“. Dä Charä het drigseh wi frisch vor Müllhaldi. Di ganzi rächtig Outosite isch idrückt gsy und aus lodelet nume so umä. Egal. Mier si hinderi richtig Kofferrum u d Fii fragt ihn no so, ober Platz het hinde in. Är het gmeint, sicher. Da düemer dr Kofferrum uf u alls voll Waffä! Ni seich… aber das plus 1 Lichä het sich d Evä älwä vorhstellt ka. Im Kofferuum hez einigermassä Platz gha, näbe Wärchzüg, Outoteilu, Küder u mier hi gar ned so gnau guget was da no drin ume liegt. Zumne gad usdr Resärve z locke, fragt d Evä ihn, was de mit sim Outo sig passiert. Dadruf heter gfragt, öbmer di rächti oder di linki Sitä meine. Ersch denn heimer gseh, dass dr link Spiegu o vrbrätschet isch u äuä o ke richtigi Fänster meh het. D Fii het no wellä wüssä, wieso är de dued Lyft fahrä (är isch Buechhalter), obs ihm ifach Spass machi oder wieso genau. Da heter afah verzellä u natürlech hez o hie dermit z tüä ka, dass sis Outo kaputt isch u är isch sogar so lieb xi, dass är üs het wellä demonstrierä was gnau kaputt isch u het üs no gad vorgwarnt „ned erchlüpfe.. i ziges öich..“, da het d Evä aber scho interveniert u füri grüeft „nei! nei!! scho guet muesches ned zigä!“, d Fii hetis aber schono interessiert. Bi sim Fahrschtiil hez üs aber o ned verwunderet, dass är sone Schrottcharä het. Die rächti Siitä vom Outo sigi so, will ihm eine us „Texas“ sig drigfahrä. So wie dä über die rotä Amplenä fehrt, leht sich o la vermuetä wie das evtl. passiert isch. Mier si de no meh is Gspräch cho u öpis vom erschtä wo dr Bobby üs in Memphis empfiehlt isch, dass mier ufe Schiessplatz söllä, schiessä machi Spass, heter gmint. D Fii het zur Evä überegluegt zum prüefä, ob sich d Evä wohlfüehlt, da sie scho mit däm Vorurtil vom ballerä isch i das Outo ghocket. Speter bim Thema was d USA fürnes friis Land isch, heter o erwähnt, dass mä ifach jedem cha sägä wasmä wot und machä. Okay äs tönt iz vlich schlimmer als es isch.. drum: dr Bobby isch schlussendlich ä super liebe xi u mier his guet gha mit ihm, aber er isch definitiv chly creepy gsy. Är het üs sogar dervor gwarnt nach dä 9e no uf dä Strassä umäzloufe, will den di kriminelle fürä chömä. Am 17:30 simer emel sicher i üsem Airbnb acho. D Empfangshalle isch richtig so wime sichs ins Memphis vorstellt, es elters adeligs Gebäude mit Marmor u Stägä! Für aller wo üs ging schöni Ferie wünschä u mier versueche z erklärä, dass Reisä nit gleich Feriä si… genau das wer umi sone Moment wome merkt wie astrengend Reise o cha si, im Gägäsatz zu Feriä wome eher d Erholig i Fokus setzt. Mier hi nach denä Strapazenä u sitem 5i uf u Sport gmacht, wenig gässä u gschlafä afä mal chli müesse da hockä u chillä. Bevor mier richtig gö ga ässä, si mier üsere Pflicht nachigange, überall wo mier si „Nacho Fries“ z ässä vom Taco Bell u hi üs mit „Uber Eats“ la lieferä. D Fii isch die när ar Strass ga abholä vom Uber Fahrer. Dä isch richtig lieb xi u sie hi no zämä gschnurret über d Reis wo mier no so härägöh aber o, dass är irä Wuchä uf „New Orleans“ züglet wäg sirä Fründing u dört ufeme Öl-Transport-Schiff wird schaffä. D Fii findets richtig cool, wie d Amis so offe si und ned so reserviert, das het üs beidnä sehr gfehlt. Mier si gad zämä d Nacho Fries am gniessä xi u ufzmal hez öppe am 19:00 ar Türä klopft. Zersch ischs ned klar xi, obs wük bi üs isch xi oder ned u d Fii het normal witer gschnurrt. Ar Evä si fasch d Fries im Hals blibä steckä u het dr Fii befohlä ruhig z si, will sie angscht het gha, d Ibrächer chöme. D Fii hez besser gfundä witer z redä, im Wüssä äs isch öpper da u somit dr falsch Zytpunkt fürnä Ibruch. Äs het es zweits Mal klopft u d Evä het ar Fii z schnurrä wellä underbräche mit „Pssst pssst!“ D Fii isch zur Türä gloffä für ga z gugä. D Evä het sich älwä scho überlit wo ga versteckä. D Fii het ufta u äs isch ä Klempner xi, wo öpis het wellä cho flickä. Das heter hurti gmacht u isch de umi gangä. D Evä het no ar Gayle gschribä (d Gayle isch d Gastmom vo Eväs Mam xi, während ihrem USA Jahr), will die ir Nechi vo Memphis wohnt mit dr Familie u mier üs evtl. hette chönä träffä. Sie dued gad z Facebook uf und chas ned glubä… d Gayle und ihri Familie si i däm Momemt, so wie i dä ledschdä Täg in New York City xi u het z Hotel sogar ir Nechi vo üsem Hotel ka. Super.. das isch zwar irgendwie witzig aber mier findes gad mega schad, himer die Chance verpasst. We mier ihrä chli ehnder hettä wellä schribä, hetemers gmerkt u üs vilech z New York chöne träffä. Das isch wük schad u dumm gloffä. Am 18:45 himer üs afa parat machä u am 20:15 los für id Stadt ga z ässä. Mier si dür Memphis gfloffä bis zum Restaurant „The Majastetic Grill“ u überall isch chli öpis los xi, sogar uf dr Strass si si mit Outos underwägs xi wimese us dä Filmä kennt, d Frisurä vo dä Ihimischä zum Teil ou! Ab u zue isch ä Kutschä dürä gfahrä und het lüt umetransportiert. Üs hi d Rösser lid ta will die Kutschenä, zum Til chli uf Party usgrichtet si xi. Näbscht Familiene hez o Päärli gha, wo hinder drin luut Musig glost u Party gmacht hi. När wärdä die Rösser ir Nechi vor Beale Street (die bekanntischti Strass z Memphis, wo d Strass entlang 1 Bar nach dr andere mit Live Musig chunt) umekutschiert. Am 20:45 himer Platz gno im Resti duss hi d Chartä gstudiert u bstellt. D Muggi hi üs gad chli gno aber janu, derfür ischs warm. Womer uf z Ässä hi gwartet, himer besprochä was mier dasmal fürne Grund findä, für sones tüürs Znacht. Mier findä nämlech immer Gründ. Hüt isches xi, will mier üs das nachdäm strengä Tag verdient hi. Mier hi äs Filet Mignon mit Rüebli u Brokkoli gha. D Fii het dr Brokkoli am beschdä gfundä, d Rüebli si nämlech zuckeret xi u ds Flisch nimmt sie immer so roh wis git, dasmal isches roh weniger guet xi als ar Evä ihres wo „Medium“ gart isch wordä. O we sis nomal het müesse la drufdue us chli meh als „Medium“ het wellä. Den isches när wük super fein xi, sogar d Fii hetis lieber so gno als „rare“ u das wot de öpis hissä! Währendem Ässä hi mier d Lüt beobachtet oder d Strassäbahn, wo o beliebt isch in Memphis. Äs isch scho gad ganz äs anders Feeling hie aber üs gfallts. Ab u zue si o so richtigi Partybussä verbi gfahrä, wo die bsoffnigä zur Attraktion gmacht hi. Da sisi obe druf gstandä u hi tanzet u gsungä u paar vo denä älwä am liebschdä ohni Chlider. Äs isch witzig xi zum zuegugä u wi d Amis Party machä. Am 22:00 ischs witer gangä id Beale Street u si afä mal derdür. Hie zahltmä übrigens 5$ Itrittsgebühr u mä wird gfilzt. Das isch öppe wieme z Bärn i Usgang wot u bir Aarbergergass müesst Itritt zahlä und no dürsuecht wird. Polizi u alls vor Ort, also sie versueche scho so Schiessereie etc. z verhinderä. Us jedem Eggä, vo jederä Siitä u us jederä Bar ertönt hie Musig! Richtig cooli Blues Musig aber o Rock ghörtmä hie und da zwüschä dä belüchtetä Tafeli a jederä Kneippä hervor! Äs isch dr Wahnsinn u me wiss gar ned wo losä oder wo inä! Ir Mitti ungfähr simer due ine Bar namens „Rum Boogie Cafe“ wo d Liveband gad ä richtig geile Song gspielt het u d Stimm vor Sängerin het üs i Bann zogä! Hie nomal 5$ für ini z cho (isch glub Trinkgäld für d Band). Mier hi Platz gno ir underä Etage (me hetti no e Stock ueche chöne) u hi 2 lokali Bier bstellt. Will mier d Priisä langsam kennä himer numä äs chlises Bier gno unds bi 1 Bier lasi. Das isch o völlig easy xi ä so will mier hi 2 verschiedeni Bier gno u d Fii het das vor Evä lieber gha, d Evä dummerwiis o. Somit hetis eh kes 2 gä. Äs isch richtig cool xi das Feeling mit dr Liveband und wie d Lüüt abgö derzuä! Am Afang hez no ned so viel Lüt gha aber glich hetmä tanzt u gsungä zämä! Mier hi vor allem Früüd gha abeme elterä Päärli wo zämä tanzt het, sich küsst u ifach mega härzig si xi mitenand. Das isch so schön xi z gseh, wi sies zämä gniessä! När hez no paar Froue i üsem Alter gha wo zämä tanzt hi u dr Maa vom vorhär erwähntä Päärli isch zu dene u sä ga ufforderä für z tanzä aber die inti het ned wellä, drum isch är zrug zu sir Frou u het mit ihrä witer tanzt. Da isch die anderi vo dene Frou ihm tanzend hindernache u het ihn u sini Frou zu ihne gholt u de hi si aller zämä tanzt dört u glachet! Was fürne cooli hammer Stimmig! D Band isch richtig guet xi u isch o nach a dä Zueschouer xi, das hetmä gspürt u isch bsunders schön xi. Me het ned z Gfüehl gha, die maches für z Gäld oder als Touri Attraktion, sondern wük gmerkt wie die das Läbä und Früüd dran hi us gärn tilä. Pünktlech am 00:00 isch d Band fertig xi u mier si o gangä will mier wük uf dr Schnurrä xi. Underwägs himer üs no 3 feini Cookies als Mitternachtssnack gholt, die wärdä warm verchuft u somit ä richtigä Gaumenschmaus! Mier si beidi zfridä u müed is Bett u innert Sekundä wäg xi.
Z Fazit vo Memphis ufe erst Blick: Heftigä Slang, wome teils chum versteit, fetti Chäre mit massive Gangster-Fäuge, töntä Schibä rundherum u luter Musik.
Üses hütigs Highlight: Z joggä über d Brooklyn Bridge inkl. Sunneufgang und d Live Musig in Memphis
21. JULI 2024
DAY 5 - MEMPHIS, TENNESSEE
Obwohl d Evä ar Fii gsit het, dass sie se de ir USA umi ging muess wachrüttlä (will das im 2018 immer so isch xi), isches iz irgendwie so, dass d Fii bis uf inisch immer vorhär wach isch u hüt o am 8i uf isch. D Evä het bis öppä am halbi 11 no pfuset u das het d Fii ihrä gönnt u natürlech wird hie niemer wachgrüttlet. D Fii het i där Zyt chli Admin gmacht. Mier si gmüetlech underwägs u hi när de zämä versuecht es „real american coffee“ z machä mitere Filterkaffimaschine, ure Chuchi wi us dä Filmä. Öppä ä Halbstund himer insgesamt brucht mit studierä, machä, Kaffi chochä usw. Am 12i isch üs d Evä no ä Bagel ga holä, womer zum Kaffi chönä ässä u derzue no d Stürerklärig vor Fii machä. Wo d Evä underwägs isch xi fürs Zmorgä richä, isch si nach kenä 10m ar Amplä vorä Familiä uf englisch agsprochä wordä. Si hei wöuä wüssä, wo dr nägschd Starbucks isch. D Evä het das gstresst, dass sie fürnä Ihimischi isch ghaltä wordä u het sich überlit, wie sie miteme guetä Memphis/Südstaatä Slang cha sägä „I weiss es nid, i bi Touri“. Schlussendlech hetsi de mau usebracht, dass si ersch e Tag da isch u si iz aber zumenä Kafi gieng, wo besser aus dr Starbucks isch. Si si de drufigstige u heisä gfragt, vo wo si chömi. Da isch de usecho, dasses o Schwizer si u sogar ir Länggass (Bärn) wohnä. Was fürne luschtigä Zuefall. Nach 2 feinä Bagles, wo d Evä üs gholt het u Kaffi, hi mier Rächnigä gmacht, Stürerklärig u chli öpis für z Polarsteps / Blog. Am 15:45 himers gseh und äs Workout gmacht. Nachem Sport ure usgiebige Duschi simer am halbi 6 los i Walgreens (Ichufsladä) will mier öpis z Ässä hi welle chufe u Protein züg. s het meh Süesses gha als süsch öpis, keni Frücht, ke Ässä.. ifach chabis aber Proteinriglä hez gha. Am 6i simer när definitiv miteme Lyft los für id Nachbarschaft „Cooper Young“ u churz vor de halbe 7 acho. Üsi Lyft Fahrerin, Wendy, het verzellt, dass sie zwar z Memphis ufgwachsä isch aber use wot, wäg dr Kriminalität. Jedä bringt jedä ifach um, wo zämä Krach het, anstatt z redä u ä Lösig z suechä. Mehrhitlech mordä also Lüt, wo sich kennä. Mier si acho u chli i där coolä Gägend umägspaziert u guget. Scho bim zuchäfahrä, hez üs sehr gfallä. D Wendy isch o Fan gsy u het gmint, dass sie albä dahärä chunt für ifach d Hüser azgugä. Schlussendlech simer is „Alchemy“ ga Znacht ässä u äs isch z gsündischtä u günschtigschtä xi sit mier ir USA si. Üsi Chällnerin isch o hammer xi und mega cooli Gspräch womer mit ihrä hi ka. Sie het übrigens o gsit, dass sie in Memphis wohnt, aber dringend usewot wäg dr Kriminalität. Sie het sogar ä Band namens „Screamers“ und isch speter vlich o a däm Ort azträffä wo mier wi gah. Mier hi äs Lyft bstellt u si witer u uf di halbi 9i acho ar Blues Jam Session im „Wild Bill‘s Juke Box“. D Lyft Fahrere het üs verabschiedet mit mir söue ufpasse, mir sige hie ihre "Neigborhood". Bim inächo heimer gad gmerkt, dass mier di inzigschtä Touris u di izigschtä Wissä si. D Evä het gmint, dass ihrä gad bewusst wird, wies isch ir Underzahl z si, u sich ned zueghörig z füehlä obwohl das hie ned so isch u sie mega uf üs zuechöme u schnurrä usw. Sie sit zur Fii irgendwenn im Verluf vom Abä „I gloubä im Härz bini chli schwarz!“, will miers so füehlä gad! Es isch dr Bescht Blues im authentischtä Schuppä gsy, womesech cha vorsteue. Hie chamä übrigens immer no drin ruckä (rouchä) und was o erlubt isch, dassme si iget Alkohol darf mitbringä, Fläschä wiis! D Fii hez älwä chli z fescht gfüehlt will sie het gsit „hie würdi iz sogär ä Zigi ruckä!, ifach für z Feeling z erwiterä!, sie isch sogar i Market näbä dran für z chufä aber när irgendwie 30$ zahlä für Zigis u Fürzug wäg 1 Zigi, het sä de o chli übertribä dünkt u hez lasi. Irgendwenn isch ä Maa zu üs cho schnurä wo ir Band Gitarrä spielt wo uftritt. Mier hi sicher ä Viertelstund gredet u cooli Tipps becho für Nashville u New Orleans (är kennt beides sehr guet willer dört gwohnt het). Am 23:45 simer abgholt wordä vom Lyft u zrug is Appartment gfahrä. Dr eint vor Bar isch no mit usä cho, wills älwä ä gfährlechiri Hood isch xi. d Lyft Fahrere, Dionne, higs emel o fasch ned chönä glubä, dass sie üs dört muess abholä u het gmint sie gseht ned richtig! D Fii het gmint „Mier wi z richtigä Memphis gseh u ned Touristä Chabis“ u sie isch fasch dürädreit ab dr Fii u het gsit, dass sogar sie „Gstrapped isch“, was bedüdet sie treit ä Waffä mit sich. Wieder öpper meh wo üs erklärt het, dass Memphis uf Platz Nummer 1 vo de gfährlechschtä Stedt isch ir USA! Mir heis super lustig mit ihrä gha. Bim usstigä het sie sich no zur Fii umdreit u gseit „And you… you better stay your ass in the boring touristic places!“. Womersä de gfragt hi wo die gfährlechschti Gägend isch het sie klar gsit: wahrschinlech dört wo dir gad sit xi! U sie fahri üs de nümme dört härä. Da isch üs när o klar xi, wieso üs dr Bsitzer vor Bar het usebegleitet. D Fii ma sich erinnerä, dass 2 Jüngeri Mannä (sehr wahrschinlech no ned mal 20) vor dr Bar si gstandä u üs aguget hi u hi afa winkä u redä, churz bevor dr ander isch usecho. Ar Fii schiints no ned so bewusst z si, will si het gmint „die si jünger xi als mier u so dünni Gstell, die hetemer locker mögä!“. Am 00:00 simer zrug xi und hi drüber glachet, was mier für Gangsters si u si när de mal is Bett. Für üsi Sicherhit het d Fii dä potenzielle Ibrächer sogar no ä Stolperfallä bout, dass d Evä besser cha schlafä nach dänä Gschichtä.
Üses hütigs Highlight: Ganz klar dr local Blues-Abe im Wild Bill's. Für d Fii chunt hie no öpis witers derzue: d Dionne wo üsi Lyft Fahrt zurä sehr luschtigä u unterhaltsame Rückfahrt gmacht het.
22. JULI 2024
DAY 6 - MEMPHIS, TENNESSEE
D Fii isch am halbi 8 ufgwachet aber het nomal d Ugä zueda bis am 9i u d Evä isch nach dä 10e mal fürächo. Mier hi guget was mier no wi machä und ob Graceland üs über 80$ pro Person Itritt wärt isch. Das isches ned will mier nume no 1 Tag Memphis hi und öpis vor Stadt a sich wettä gseh. D Evä het verzellt, dass sie mal googlet het nach Memphis und zerschtä wo chunt sig e Schiesserei wo chürzlech passiert isch und äs git ä eigete Youtube Channel vorä bestimmtä Tankstell mit Schiessereie (Memphis gas station shootings). Es schint also würk ar Tagesordnig zsi. När simer ab under d Duschi u uf di viertel vor 12 los ganes Kaffi richä näbädran iz „Crazy Gander Coffee“. Am 12i hi mier üs ufä Wäg gmacht richtig Big River Crossing. Das isch ä Brügg wo die 2 Staate „Tennessee“ und „Arkansas“ trennt. Da simer am River entlang härä gloffä u dür diversi Pärk, wo sehr schön si xi für als Spielplatz mit Chind oder o ifach numä öpis ga trinkä / ässä, o Picknicke chame dört. Dr Spaziergang dört hi isch schön xi aber hiss, so hi mier durend ä gratis Sauna derbi gha und si verschwitzt dür Memphis. Überä Mississippi River sälber himer öppe 15 Minutä ka mit ab u zu no äs Foto machä. All 10 Meter isch ä Security Kamera cho und öppä all 100 Meter ä Emergency Station, aber d Fii meint i där Zyt womä de Notfallchnopf drückt het, bis öpper chunt, ischmä scho lang abgmurxt u im Mississippi River. D Brügg sälber himer in Total ire halb Stund überquert. Also am 14:00 simer ganz änä acho u hi hurti ä chlini Proviant-Pousä gmacht, mit Nüssli u trochene Frücht, z gsündschde womer im geschtritä Walgreens gfundä hi. Am 14:15 simer umi zrug uf Tennessee gloffä und chli weniger als 30 Minutä gha. Irgendwie isch dr glich schwarz Wagä bi üs umegfahrä wie bevor mier über die Brügg si u d Evä hez verdächtig gfundä, bis si gseh het, dass da Chind drin si u sich chli beruhigt. Da het d Fii ihrä die Angscht aber verstercht idäm si gsit het: „Du wisch ja ned wie di Chind si da ini cho“. Super ifüehlsam üsi Fii. Am halbi 4 simer bim „Central BBQ“ acho womer de endlech öpis richtigs si ga ässä. Das isch üs vo verschiedene empfohlä wordä u o im Lonely Planet z findä, vor allem z „Pulled Pork“ isch schiins äs Highlight! Mier hi verschiedenigs Flisch gno, pulled Pork, pulled Chicken u Beef Brisket. Derzue himer Gmües bstellt u hi Rüebli u Bohnä us dr Büchsä übercho und irgendwelches grüens Züg wo si öppä sälber ned wüssä was es isch, will uf dr Chartä isches agschribä mit „greens“. Im gsamtä isches aber fein xi, vor allem z Fliisch. D Fii het hiä äs Bier probiert us San Francisco wo mega fruchtig isch und mier his beidi sehr gärn gha, äs hisst „Nordic Jam“ und anderi Bier hi o sehr fein tönt. När simer witergloffe u öpe am viertel vor 5i no gad pünktlech acho im „Hotel Peabody“ wo mega beliebt isch für d Entä, wo zwüschä 11:00 und 17:00 im Hotel umelufe u när übernä rotä Teppich i Lift loufe u umi igstallet wärdä. Only in America… mier si nach derä Attraktion zrug iz Appartment und am halbi 6 dahimä xi. Am 19:00 simer witer für iz Fitness u hi 2h dört trainiert. Dahimä isch z Training für d Fii witergangä will si für ihri beide Showgruppene, wo si derbi isch, no güebt het. D Evä het i där Zyt chli chillt. Nach fasch 2h Tanztraining ischs ar Fii nem so guet gangä u Sturm wordä. Wahrschiinlech chli z viel xi mit inä anderä Staat spazierä, wenig ässä, 2h Fitness und när no fasch 2h Tanztraining u das alls no mit ganz Tag Sunne und Hitz. Ä chalti Duschi hetere guet ta u mier hi üs när no öpis chlises Znacht gmacht u ifach chli ruhiger gmacht u no packt u d Evä is Bett. D Fii het no paar Sachä erledigt u isch am 01:15 iz Bett.
Üses hütigs Highlight: Für d Evä z Ambiente u z Beef Brisket im Central BBQ. Für d Fii z Fitness, dr Spaziergang überä Mississippi River und z "Nordic Jam" Bier im Central BBQ.
Comments